ഇടവേള കഴിഞ്ഞെത്തുന്ന പുതിയ മലയാള ചിത്രം ജയസൂര്യയുടെ 'വെള്ളം'; തിയേറ്ററുകളിൽ ആവേശമായി ഫെബ്രുവരി നാലിന് മമ്മൂട്ടിയുടെ പ്രീസ്റ്റ്; അപൂർണ്ണമായ മാർച്ചിലെ പട്ടികയിൽ അറബിക്കടലിന്റെ സിംഹം ഇല്ല; വിജയ് ആരാധകരുടെ ആവേശം ഉണർവ്വാകുമെന്ന പ്രതീക്ഷയിൽ മലയാള സിനിമ; പുതിയ ചിത്രങ്ങളുടെ റിലീസ് തീയതി ഇങ്ങനെ

കൊച്ചി: ജയസൂര്യ ചിത്രം 'വെള്ളം' ആകും വലിയൊരു ഇടവേളയ്ക്ക് ശേഷം തിയേറ്ററിൽ റിലീസാകുന്ന മലയാള ചിത്രം. ജനുവരി 22നാണ് റിലീസ്. വാങ്ക്, ലവ് എന്നീ ചിത്രങ്ങൾ തൊട്ടടുത്ത ആഴ്ചയെത്തും. കോവിഡിന് ശേഷം തിയേറ്ററിൽ എത്തുന്ന ചിത്രങ്ങളുടെ പട്ടിക പുറത്തു വന്നു. മാസ്റ്ററിന് തിയേറ്ററുകളിൽ ലഭിച്ച പ്രതികരണം ചലച്ചിത്ര മേഖലയിൽ ഉണർവുണ്ടാക്കിയിട്ടുണ്ട്. ഏപ്രിലിൽ വലിയ ചിത്രങ്ങൾ ഉൾപ്പെടെ തിയേറ്ററുകളിൽ എത്തുമെന്നാണ് പ്രതീക്ഷിക്കപ്പെടുന്നത്.

പട്ടിക പ്രകാരം 12 ചിത്രങ്ങളാണ് ഫെബ്രുവരിയിൽ റിലീസ് ചെയ്യുക. ഫെബ്രുവരി നാലിന് റിലീസ് ചെയ്യുന്ന മമ്മൂട്ടി ചിത്രം പ്രീസ്റ്റും ഇതിൽ ഉൾപ്പെടും. ഫെബ്രുവരി 12 - സാജൻ ബേക്കറി, ഓപ്പറേഷൻ ജാവ, യുവം; ഫെബ്രുവരി 19 - മരട് 357, വർത്തമാനം, വെളുത്ത മധുരം; ഫെബ്രുവരി 26 - സഹ്യാദ്രിയിലെ ചുവന്ന പൂക്കൾ, ടോൾ ഫ്രീ 1600 600, സണ്ണി, അജഗജാന്തരം എന്നിങ്ങനെയാണ് അടുത്ത മാസത്തെ മറ്റു റിലീസുകൾ. മോഹൽകുമാർ ഫാൻസ് എന്ന ചിത്രവും ഫെബ്രുവരിയിൽ എത്തുമെങ്കിലും ഡേറ്റ് തീരുമാനമായിട്ടില്ല.

അതേസമയം, മാർച്ച് മാസത്തിൽ നാല് സിനിമകൾ മാത്രമാണുള്ളത്. നാലാം തീയതി നിഴൽ/കോൾഡ് കേസ്, 12ന് മൈ ഡിയർ മച്ചാൻസ്, ഇവ, 21ന് സുനാമി എന്നിവയാണ് മാർച്ചിലെ റിലീസുകൾ. നിരവധി സിനിമകൾ പുറത്തിറങ്ങാനുള്ള സാഹചര്യത്തിൽ റിലീസിങ്ങുമായി ബന്ധപ്പെട്ട് മറ്റു പ്രശ്നങ്ങൾ ഉണ്ടാകാതിരിക്കാനാണ് പ്രൊഡ്യൂസേഴ്സ് അസോസിയേഷൻ പട്ടിക തയ്യാറാക്കിയിരിക്കുന്നത്. പുറത്തിറങ്ങാനുള്ള ചിത്രങ്ങളുടെ നിർമ്മാതാക്കളുമായി സംസാരിച്ച് ധാരണയിലെത്തിയ ശേഷമാണ് പട്ടിക തയ്യാറാക്കിയിരിക്കുന്നതെന്ന് അസോസിയേഷൻ ഭാരവാഹി പറഞ്ഞു. തിയറ്റർ ഉടമകളുടെയും വിതരണക്കാരുടെയും സംഘടനകൾക്ക് പട്ടിക കൈമാറിയിട്ടുണ്ട്.

മോഹൻലാലിന്റെ അറബിക്കടലിന്റെ സിംഹം മാർച്ച് 26ന് റിലീസ് ചെയ്യുമെന്ന് പ്രഖ്യാപിച്ചിട്ടുണ്ട്. എന്നാൽ ഈ ചിത്രം പട്ടികയിൽ എടം നേടിയിട്ടില്ല. മാർച്ച് 19വരെയുള്ള റിലീസാണ് പട്ടികയിലുള്ളത്. അതുകൊണ്ട് തന്നെ അടുത്ത പട്ടികയിൽ അതും ഇടം പിടിക്കുമെന്നാണ് സൂചന.