കെ റെയിൽ കല്ലിടലിനെതിരെ കൂട്ട ആത്മഹത്യാ ഭീഷണിയുമായി നാട്ടുകാർ; എതിർത്ത സ്ത്രീകൾ അടക്കമുള്ളവരെ വലിച്ചിഴച്ചു ഭീതിയിലാഴ്‌ത്തി പൊലീസും; അമ്മമാരെ അറസ്റ്റു ചെയ്യുന്നത് കണ്ട് നിലവിളിച്ച് കുഞ്ഞുങ്ങൾ; ഭീതിയിൽ മാടപ്പള്ളി; ലാത്തിക്കരുത്തിൽ കെ റെയിൽ കല്ലിട്ട് പിണറായിയുടെ പിടിവാശി
കോട്ടയം: കോട്ടയം മാടപ്പള്ളി മുണ്ടുകുഴിയിൽ കെ റെയിൽ കല്ലിടലിനെതിരെ നാട്ടുകാരുടെ പ്രതിഷേധം. മനുഷ്യശൃംഖല തീർത്തായിരുന്നു പ്രതിഷേധവുമായി നാട്ടുകാർ രംഗത്തുവന്നപ്പോൾ ലാത്തിവീശി പ്രതിഷേധക്കാരെ തുരത്തുകയായിരുന്നു പൊലീസ്. കല്ലുമായെത്തിയ വാഹനത്തിന്റെ ചില്ല് പ്രതിഷേധക്കാർ തകർത്തു. നാട്ടുകാർ റോഡ് ഉപരോധിക്കുകയാണ്. കല്ലിടൽ നടപടിക്രമം പാലിക്കാതെയെന്നാണ് പ്രതിഷേധക്കാർ ആരോപിക്കുന്നത്.
പ്രതിഷേധം കനത്തതോടെ സ്ത്രീകൾ അടക്കമുള്ളവരെ വലിച്ചിഴച്ചു കൊണ്ടു അറസ്റ്റു ചെയ്തു. നാടിനെ ഭീതിയിലാഴ്‌ത്തും വിധത്തിലായിരുന്നു പൊലീസിന്റെ നടപടി. കുഞ്ഞുങ്ങൾ അടക്കമുള്ളവർ നോക്കി നിൽക്കെയാണ് സ്ത്രീകളെ വലിച്ചിഴച്ചു കൊണ്ട് പൊലീസ് നീങ്ങിയത്. അമ്മമാരെ പൊലീസ് അറസ്റ്റു ചെയ്യുന്നത് കണ്ട് കുഞ്ഞുങ്ങൾ അടക്കമുള്ളവർ പൊട്ടിക്കരഞ്ഞു. പ്രദേശത്ത് ഭീതി വതച്ചു കൊണ്ടായിരുന്നു പൊലീസ് നടപടി ഉണ്ടായിരുക്കുന്നത്.
കോട്ടയം ജില്ലയിൽ കെ റെയിലിനെതിരായ സമരം ശക്തമാകുകയാണ്. വലിയ പ്രതിഷേധമാണ് മുണ്ടുകുഴിയിൽ നാട്ടുകാരുടെ ഭാഗത്തു നിന്നുണ്ടായത്. കല്ലുമായെത്തിയ വാഹനം തുടർന്ന് തിരികെപ്പോകേണ്ടതായി വന്നു. മനുഷ്യശംഖല തീർത്ത് നാട്ടുകാർ ഉദ്യോഗസ്ഥർക്കെതിരെ പ്രതിഷേധിക്കുകയും ആക്രോശിക്കുകയുമാണുണ്ടായത്. കൂട്ട ആത്മഹത്യ നടത്തുമെന്ന് സമർക്കാർ പറഞ്ഞു. മണ്ണെണ്ണ ഉയർത്തി കാട്ടി പ്രതിഷേധിക്കുന്ന അവസ്ഥയുമുണ്ടായി.
ജില്ലയിൽ 16 പഞ്ചായത്തുകളിലൂടെയാണ് സിൽവർ ലൈൻ കടന്നുപോകുക. 14 വില്ലേജുകളെ പദ്ധതി ബാധിക്കും. വിവിധ രാഷട്രീയ പാർട്ടികൾ സംയുക്തമായാണ് പ്രതിഷേധം നടത്തിയത്. ജോസഫ് എം പുതുശ്ശേരി അടക്കമുള്ള യുഡിഎഫ് നേതാക്കൾ സ്ഥലത്തെത്തിയിരുന്നു. ബിജെപിയുടെ ശക്തമായ സാന്നിധ്യവും പ്രതിഷേധത്തിലുണ്ട്. ഈ മാസം 24ന് സംസ്ഥാന അധ്യക്ഷൻ കെ സുരേന്ദ്രൻ പങ്കെടുക്കുന്ന സംരക്ഷണ ജാഥ ബിജെപി കോട്ടയം ജില്ലയിൽ സംഘടിപ്പിക്കുന്നുണ്ട്.
എറണാകുളം മാമലയിലും കെ റെയിലിനെതിരെ പ്രതിഷേധം ഉണ്ടായി. അതിരടയാള കല്ല് സ്ഥാപിക്കാനെത്തിയ ഉദ്യോഗസ്ഥരെ നാട്ടുകാർ തടഞ്ഞു. ഉദ്യോഗസഥരെ വീടുകളിലേക്ക് പ്രവേശിപ്പിക്കാതെ നാട്ടുകാർ തടഞ്ഞു. പുരയിടങ്ങളിലാണ് ഇവിടെ കല്ലുകൾ സ്ഥാപിക്കേണ്ടത്. നാട്ടുകാരും ഉദ്യോഗസ്ഥരും തമ്മിൽ തർക്കമുണ്ടായി.
കെ റെയിൽ ഉദ്യോഗസ്ഥരും പൊലീസുകാരും മാത്രമാണ് എത്തിയത്. സർവ്വേ ഉദ്യോഗസ്ഥരെത്താതെ സർവ്വേ നടത്താനാവില്ലെന്ന നിലപാടിലാാണ് നാട്ടുകാർ. തുടർന്ന് പൊലീസിന്റെ സുരക്ഷയോടെ മതിലുകളും ഗേറ്റുകളും ചാടിക്കടന്നാണ് കല്ലുകൾ സ്ഥാപിക്കുന്നത്.
