മുംബൈ ഭീകരാക്രമണത്തിന്റെ സൂത്രധാരൻ സാക്കിയുർ റഹ്മാൻ ലഖ്‌വി പാക്കിസ്ഥാനിൽ അറസ്റ്റിലായെന്ന് റിപ്പോർട്ടുകൾ; അറസ്റ്റ് തീവ്രവാദവുമായി ബന്ധപ്പെട്ട പണമിടപാടിന്റെ പേരിൽ
ന്യൂഡൽഹി: മുംബൈ ഭീകരാക്രമണത്തിന്റെ സൂത്രധാരനായ സാക്കിയുർ റഹ്മാൻ ലഖ്‌വി പാക്കിസ്ഥാനിൽ അറസ്റ്റിലായെന്ന് റിപ്പോർട്ടുകൾ. തീവ്രവാദവുമായി ബന്ധപ്പെട്ട പണമിടപാടിന്റെ പേരിലാണ് ലഷ്കറെ തൊയ്ബ കമാൻഡറായ സാക്കിയുർ റഹ്മാൻ ലഖ്‌വിയെ അറസ്റ്റ് ചെയ്തിരിക്കുന്നത് എന്നാണ് റിപ്പോർട്ടുകൾ വ്യക്തമാക്കുന്നത്. മുംബൈ ഭീകരാക്രമണത്തിനുശേഷം യുഎൻ സമിതി ഭീകരപട്ടികയിൽ ഉൾപ്പെടുത്തിയിട്ടുള്ള ലഖ്‌വി 2015 മുതൽ ജാമ്യത്തിലാണ്. റാവൽപിണ്ടിയിലെ ജയിലിൽ കഴിയുമ്പോഴാണ് ലഖ്‌വി ഒരു കുഞ്ഞിന്റെ പിതാവായത്. ലഖ്‌വിയുടെ ജയിൽവാസം തട്ടിപ്പാണെന്ന ആരോപണം ഇന്ത്യ ഉയർത്തിയിരുന്നു.
ഇതുമായി ബന്ധപ്പെട്ട് പാക്കിസ്ഥാനിലെ പഞ്ചാബിൽ ലഖ്‌വിക്കെതിരെ കേസ് രജിസ്റ്റർ ചെയ്തിരുന്നു. പിന്നാലെയാണ് അറസ്റ്റ്. പഞ്ചാബ് ഭീകരവിരുദ്ധ വിഭാഗമാണ് ഇയാൾക്കെതിരെ കേസെടുത്തിരിക്കുന്നത്. ഇയാൾ തീവ്രവാദ പ്രവർത്തനങ്ങൾക്കായി പണം സമാഹരിക്കുകയും അതുപയോഗിച്ച് ഒരു ആശുപത്രി നടത്തുകയും ചെയ്തതായി കണ്ടെത്തിയിട്ടുണ്ട്.
സാക്കിയുർ റഹ്മാൻ ലഖ്‌വിക്ക് പ്രതിമാസ ചെലവിനായി 1.5 ലക്ഷം പാക്കിസ്ഥാൻ രൂപ നൽകാൻ പാക്കിസ്ഥാന് യുഎൻ രക്ഷാകൗൺസിൽ ഉപരോധ സമിതി അനുമതി നൽകിയിരുന്നു. ഭക്ഷണത്തിന് 50,000 രൂപ, മരുന്നിന് 45,000 രൂപ, മറ്റ് ആവശ്യങ്ങൾക്ക് 20,000 രൂപ, അഭിഭാഷകഫീസ് 20,000 രൂപ ഗതാഗതത്തിന് 15,000 രൂപ എന്ന നിരക്കിലാണ് ലഖ്‌വിക്കു പാക്കിസ്ഥാൻ സർക്കാർ ധനസഹായം നൽകുന്നത്. യുഎൻ സമിതിക്ക് പാക്കിസ്ഥാനിലെ ഇമ്രാൻ ഖാൻ സർക്കാർ നൽകിയ അപേക്ഷ പരിഗണിച്ചാണ് അനുമതി നൽകിയിരിക്കുന്നത്.
മുംബൈ ആക്രമണത്തെ തുടർന്ന് ലഖ്‌വിയെ യുഎൻ ആഗോള ഭീകരനായി പ്രഖ്യാപിച്ചിരുന്നു. 2008ൽ നടന്ന മുംബൈ ഭീകരാക്രമണത്തിൽ 166 പേർ കൊല്ലപ്പെടുകയും 300ൽ അധികം പേർക്ക് പരിക്കേൽക്കുകയും ചെയ്തിരുന്നു. പാക്കിസ്ഥാനിൽ നിന്നുള്ള 10 ലഷ്കറെ തൊയ്ബ ഭീകരരാണ് ആക്രമണം നടത്തിയത്. ആറ് വർഷത്തോളം പാക്കിസ്ഥാനിൽ തടവിൽ കഴിഞ്ഞ സാക്കിയുർ റഹ്മാൻ ലഖ്‌വി 2015ൽ ആണ് മോചിതനായത്.
