ഈറോഡ്: സ്ത്രീധനം കുറഞ്ഞുപോയെന്ന് ആരോപിച്ച് ഭാര്യയെ വർഷങ്ങളോളം നിരന്തരം പീഡിപ്പിക്കുകയും മർദ്ദിക്കുകയും ചെയ്ത സർക്കാർ ഡോക്ടർ അറസ്റ്റിൽ. കന്യാകുമാരി ജില്ലയിലെ എളക്കോട് സർക്കാർ ആശുപത്രിയിലെ ഡോക്ടറായ അനൂപ് (36) ആണ് അറസ്റ്റിലായത്.

അനൂപിന്റെ ഭാര്യയും ഈറോഡ് സർക്കാർ ആശുപത്രിയിലെ ഡോക്ടറുമായ ദിവ്യസറോണ നൽകിയ പരാതിയുടെ അടിസ്ഥാനത്തിലാണ് അറസ്റ്റ്. 2010 ലാണ് ഈറോഡ് കെ.കെ. നഗറിൽ താമസിക്കുന്ന ദിവ്യസറോണയും അനൂപും വിവാഹിതരായത്. 117 പവൻ സ്വർണവും 32 ലക്ഷം രൂപയും നൽകിയാണ് അന്ന് ദിവ്യസറോണയുടെ മാതാപിതാക്കൾ വിവാഹം നടത്തിയത്.

ഇത്രയും വാങ്ങിയിട്ടും അന്നുമുതൽ സ്ത്രീധനം പോരായെന്നും വീണ്ടും 10 ലക്ഷം രൂപകൂടി വേണമെന്നും ആവശ്യപ്പെട്ട് അനൂപ് ദിവ്യയെ മർദിക്കുകയും ഭീഷണിപ്പെടുത്തുകയും ചെയ്യുന്നുണ്ടായിരുന്നു . ഇതിന്റെ പേരിൽ ഒരു വർഷത്തോളമായി ഇരുവരും അകന്നുകഴിയുകയായിരുന്നു. മറ്റൊരു വനിതാ ഡോക്ടറുമായി അനൂപ് അടുപ്പത്തിലാണെന്നും ദിവ്യ അറിഞ്ഞു.

ഇതിനിടെ അനൂപ് ബാങ്ക് ലോക്കറിൽ സൂക്ഷിച്ചിരുന്ന സ്വർണം ദിവ്യ അറിയാതെ എടുത്തു. . ഇതുമായി ബന്ധപ്പെട്ട് ദിവ്യ പൊലീസ് സ്റ്റേഷനിൽ പരാതി നൽകിയെങ്കിലും തുടർ നടപടിയുണ്ടായില്ല . തുടർന്ന്, ദിവ്യസറോണ ചെന്നൈ ഹൈക്കോടതിയെ സമീപിച്ചു. കോടതിയിൽനിന്ന് ദിവ്യക്ക് അനുകൂലമായ വിധി വന്നതോടെ ഈറോഡ് വനിതാപൊലീസ് അനൂപിനെ വിളിച്ചുവരുത്തി അറസ്റ്റ് ചെയ്തു. അനൂപിനെ ഈറോഡ് കോടതിയിൽ ഹാജരാക്കി ഗോപിചെട്ടിപ്പാളയം ജയിലിൽ റിമാൻഡ് ചെയ്തു.

യുവഡോക്ടർ അറസ്റ്റിൽ

മറുനാടന്‍ മലയാളി

    മറുനാടന്‍ മലയാളി ബ്യൂറോ