കോഴിക്കോട്: തികച്ചും ഒരു നാട്ടും പുറത്തെ പെൺകുട്ടിയായിരുന്നു കോഴിക്കോട് കൊയിലാണ്ടിയിലെ മലയിൽ ബിജിഷ. എല്ലാവരോടും വളരെ സ്‌നേഹത്തോടുമാത്രം ഇടപെടുന്ന പെൺകുട്ടി. അതുകൊണ്ട് തന്നെ ബിജിഷയുടെ ആത്മഹത്യ നാട്ടുകാരെയും വീട്ടുകാരെയും ഒരു പോലെ സങ്കടത്തിൽ ആഴ്‌ത്തി. ഡിസംബർ 12-ന് ആയിരുന്നു ബിജിഷ തന്റെ വീട്ടിൽ തൂങ്ങി മരിച്ചത്. എന്നാൽ ബിജിഷയുടെ മരണം കഴിഞ്ഞ് ഒരു മാസം പിന്നിടുമ്പോൾ ബിജിഷ കൊണ്ടു നടന്ന രഹസ്യങ്ങൾ അറിഞ്ഞ് ഞെട്ടിത്തരിച്ചിരിക്കുകയാണ് നാട്ടുകാരും വീട്ടുകാരും.

ബിജിഷ രണ്ട് ബാങ്ക് അക്കൗണ്ടുകളിൽ നിന്നായി ഒരു കോടിയോളം രൂപയുടെ ഇടപാട് നടത്തിയിട്ടുണ്ടെന്നാണ് പൊലീസ് പറയുന്നത്. എന്നാൽ ബിജിഷ എന്തിനാണ് ഇത്രയും വലിയ തുകയുടെ ഇടപാട് നടത്തിയതെന്നോ ആർക്ക് വേണ്ടിയാണ് ഇടപാട് നടത്തിയതെന്നോ വീട്ടുകാർക്കോ സുഹൃത്തുകൾക്കോ ഒന്നുമറിയില്ല. കോടികളുടെ പണം ബിജിഷയുടെ അക്കൗണ്ടിൽ വന്നു പോയതറിഞ്ഞതിന്റെ ഞെട്ടലിലാണ് വീട്ടുകാർ. ഈ പണം എങ്ങോട്ടാണ് പോയതെന്നും ആർക്കും അറിയില്ല.

ഈ പണത്തിന് പുറമെ ബിജിഷയുടെ വിവാഹത്തിന് വേണ്ടി കരുതി വെച്ച 35 പവൻ സ്വർണവും വീട്ടുകാർ അറിയാതെ അവർ ബാങ്കിൽ പണയം വെച്ച് പണം വാങ്ങിയിട്ടുമുണ്ട്. ഇതും എന്തിനാണെന്ന് വീട്ടുകാർക്കറിയില്ല. ഇത്രയേറെ ഇടപാട് നടത്തിയിട്ടും ആരും ബിജിഷയുടെ മരണ ശേഷം പണം ആവശ്യപ്പെട്ട് വീട്ടിലേക്ക് വരികയോ ബന്ധുക്കളെയോ മറ്റോ ബന്ധപ്പെടുകയോ ചെയ്തിട്ടില്ലെന്നും വീട്ടുകാർ പറയുന്നു വീട്ടുകാർ. ഈ പണം ബിജിഷ എന്തു ചെയ്‌തെന്നും ആർക്കാണ് ഈ പണം കൈമാറിയതൈന്ന ചോദ്യവും പൊലീസിനെയും കുഴപ്പിച്ചിരിക്കുകയാണ്.

എന്താണ് ബിജിഷയ്ക്ക് സംഭവിച്ചത് എന്നതാണ് ദുരൂഹമായിരിക്കുന്നത്. സംഭവത്തിന്റെ സത്യാവസ്ഥ പുറത്തുകൊണ്ടു വരണമെന്നാവശ്യപ്പെട്ട് നാട്ടുകാർ ആക്ഷൻ കമ്മിറ്റിയും രൂപീകരിച്ചിട്ടുണ്ട്. പണം വാങ്ങിയതും കൊടുത്തതും മുഴുവൻ ഗൂഗിൾ പേ പോലുള്ള യു.പി.ഐ ആപ്പുകൾ വഴിയായതിനാൽ പൊലീസിനും വിവരം ലഭിക്കുന്നില്ല. പണം കടം ചോദിച്ചവരോട് ആപ്പ് വഴി തന്നാൽ മതിയെന്ന് പ്രത്യേകം പറഞ്ഞിരുന്നതായും പൊലീസ് പറയുന്നു. മരിക്കുന്നതിന് മുമ്പ യു.പി.ഐ ആപ്പുകൾ വഴി പണമിടപാട് നടത്തിയതിന്റെ തെളിവുകളെല്ലാം നശിപ്പിക്കാനുള്ള ശ്രമവും ബിജിഷ നടത്തിയിരുന്നുവെന്നാണ് പൊലീസ് ചൂണ്ടിക്കാട്ടുന്നത്. തുടർന്ന് ദുരൂഹത തോന്നിയ പൊലീസ് ബാങ്കിലെത്തിയാണ് പണമിടപാടിന്റെ വിവരങ്ങൾ ശേഖരിച്ചത്.

സ്വകാര്യ ടെലികോം കമ്പനിയുടെ സ്റ്റോറിൽ ജോലി ചെയ്ത് വരികയായിരുന്ന ബിജിഷ ഇത്രയേറെ പണമിടപാട് നടത്തിയിട്ട് എന്തു ചെയ്തുവെന്നാണ് ആർക്കും മനസ്സിലാവാത്തത്. ബി.എഡ് ബിരുദധാരികൂടിയായ ബിജിഷ ഇങ്ങനെ ചതിക്കപ്പെട്ടുവെന്ന് നാട്ടുകാർക്കും വിശ്വസിക്കാനാവുന്നില്ല. നാട്ടിലൊക്കെ ഏറെ ഉർജസ്വലയായ കുട്ടിയെന്ന നിലയിൽ വലിയ ബഹുമാനമായിരുന്നു നാട്ടുകാർക്ക്. ഇടയ്ക്ക് താൽക്കാലിക അടിസ്ഥാനത്തിൽ പഠിച്ച സ്‌കൂളിൽ തന്നെ ക്ലാസെടുക്കാനും പോയിരുന്നു.

ഡിസംബർ 12 ന് പതിവ് പോലെ ജോലിക്ക് പോയ ബിജിഷ തിരിച്ച് വന്നാണ് കൊയിലാണ്ടിയിലെ വീട്ടിൽ തൂങ്ങി മരിച്ചത്. മരിച്ച ദിവസം രാവിലെ പോലും വളരെ സന്തോഷവധിയായി നാട്ടുകാരോടും സുഹൃത്തുക്കളോടും ഇടപെട്ട ബിജിഷയെ പലരും ഓർക്കുന്നുമുണ്ട്. ബിജിഷയുടെ മരണത്തിന്റെ സത്യാവസ്ഥ എത്രയും പെട്ടെന്ന് പുറത്തുകൊണ്ടുവരണമെന്ന് വീട്ടുകാരും ആവശ്യപ്പെടുന്നു.

 

മറുനാടന്‍ മലയാളി

    മറുനാടന്‍ മലയാളി ബ്യൂറോ