ന്യൂഡൽഹി: കോൺഗ്രസിന്റെ ചിഹ്നമായ കൈപ്പത്തിക്കെതിരെ തെരഞ്ഞെടുപ്പ് കമ്മീഷന് പരാതി നൽകി ബിജെപി നേതാവ്. പോളിങ് ബൂത്തിൽ ചിഹ്നം പ്രദർശിപ്പിക്കരുതെന്ന ചട്ടത്തിന്റെ ലംഘനമാണെന്ന് ചൂണ്ടികാട്ടിയാണ് കോൺഗ്രസിന്റെ കൈപ്പത്തി ചിഹ്നം മരവിപ്പിക്കണമെന്നാവശ്യപ്പെട്ട് സുപ്രീം കോടതി അഭിഭാഷകനും ബിജെപി നേതാവുമായ അശ്വിനി കുമാർ ഉപാധ്യായ തെരഞ്ഞെടുപ്പ് കമ്മീഷന് പരാതി നൽകിയത്. ശരീരത്തിന്റെ ഭാഗമായതിനാൽ തന്നെ പോളിങ് ബൂത്തുകളിൽ കോൺഗ്രസിന്റെ ചിന്ഹം വ്യാപകാമായി പ്രദർശിപ്പിക്കുന്ന സാഹചര്യമുണ്ടാകുന്നുവെന്നാണ് പരാതിയിൽ പറയുന്നത്.

കൈപ്പത്തി ചിഹ്നം അടിയന്തരമായി മരവിപ്പിക്കണമെന്നാണ് പരാതിയിലെ ആവശ്യം. മുഖ്യ തെരഞ്ഞെടുപ്പ് കമ്മീഷണർക്കാണ് പരാതി നൽകിയത്. മനുഷ്യ ശരീരത്തിന്റെ ഭാഗമായ ഏക തെരഞ്ഞെടുപ്പ് ചിന്ഹമാണ് കൈപ്പത്തിയെന്നും ഇത് ഒരിക്കലും മാറ്റിവെക്കാൻ കഴിയാത്തതാണെന്നുമാണ് പരാതിയിൽ പറയുന്നത്. പോളിങ് ബൂത്തിന്റെ 100 മീറ്റർ പരിധിയിൽ യാതൊരു വിധി പ്രചാരണവും പാടില്ലെന്നിരിക്കെ കൈപ്പത്തി ചിഹ്നം വോട്ടർമാരെ വോട്ടെടുപ്പ് നടക്കുമ്പോൾ പോലും സ്വാധീനിക്കാൻ കഴിയുന്നതാണെന്നും പരാതിയിൽ പറയുന്നു.