മുംബൈ: പതിനാറ് പേരുടെ മരണത്തിനിടയാക്കിയ മുംബൈ പരസ്യ ബോർഡ് ദുരന്തത്തിൽ, പരസ്യ ബോർഡ് സ്ഥാപിച്ച കമ്പനിയുടെ ഡയറക്ടർ ഭാവേഷ് ഭിൻഡേ അറസ്റ്റിൽ. ദുരന്തത്തിന് പിന്നാലെ ഇയാൾ ഒളിവിൽ പോയിരുന്നു. മുംബൈ പൊലീസിന്റെ ക്രൈംബ്രാഞ്ച് സംഘം രാജസ്ഥാനിലെ ഉദയ്പൂരിൽനിന്നാണ് ഇയാളെ അറസ്റ്റ് ചെയ്തത്.

കഴിഞ്ഞ ദിവസമുണ്ടായ കനത്തമഴയിൽ, ഘാട്കോപ്പറിൽ സ്ഥാപിച്ചിരുന്ന 100 അടിയുള്ള കൂറ്റൻ പരസ്യബോർഡ് തകർന്നുവീഴുകയായിരുന്നു. ഈഗോ മീഡിയ പ്രൈവറ്റ് ലിമിറ്റഡ് എന്ന പരസ്യ ഏജൻസിയാണ് പരസ്യ ബോർഡ് സ്ഥാപിച്ചിരുന്നത്. ഇതിന്റെ ഡയറക്ടറാണ് ഭിൻഡെ. അനധികൃതമായാണ് പരസ്യബോർഡ് സ്ഥാപിച്ചിരുന്നത്.

പന്ത്നഗറിലെ ബി.പി.സി.എൽ. പെട്രോൾ പമ്പിനു സമീപം തിങ്കളാഴ്ച വൈകീട്ട് നാലരയോടെയാണ് അപകട നടന്നത്. പെട്രോൾപമ്പിൽ ഇന്ധനം നിറയ്ക്കാനെത്തിയ വാഹനങ്ങളിൽ ഉണ്ടായിരുന്നവരും വഴിയാത്രക്കാരുമാണ് മരിച്ചത്. 75 ഓളം പേർക്ക് അപകടത്തിൽ പരിക്കേറ്റിരുന്നു. പരമാവധി 40 അടി ഉയരത്തിൽമാത്രമേ ബോർഡ് സ്ഥാപിക്കാവൂ എന്ന നിയമം ലംഘിച്ചാണ് കൂറ്റൻ പരസ്യബോർഡ് സ്ഥാപിച്ചിരുന്നത്.