ഏത് സമയത്ത് വിളിച്ചാലും എംഡിഎംഎ വിളിപ്പുറത്തെത്തിക്കും ; കൊരട്ടിയിലെ ആവശ്യക്കാരെ കാണാനെത്തിയപ്പോൾ കിട്ടിയത് മുട്ടൻപണി ; ബൈക്കിൽ എംഡിഎംഎ വിതരണം ചെയ്യുന്ന ദമ്പതികൾ അറസ്റ്റിൽ

തൃശൂർ : ബൈക്കിൽ എംഡിഎംഎ വിതരണം നടത്തുന്ന ദമ്പതികൾ അറസ്റ്റിൽ. കൂർക്കഞ്ചേരി സ്വദേശികളായ അജ്മൽ, ഭാര്യ പവിത്ര എന്നിവരാണ് കൊരട്ടി പൊലീസിന്റെ പിടിയിലായത്. ഏതു സമയത്തു ഫോണിൽ വിളിച്ചാലും എംഡിഎംഎയുമായി വിളിപ്പുറത്തെത്തുന്ന ദമ്പതികളെക്കുറിച്ച് കൊരട്ടി ഇൻസ്‌പെക്ടർ ബി.കെ.അരുണിനാണ് രഹസ്യവിവരം ലഭിച്ചത്.

കിട്ടിയ ഫോൺ നമ്പറിൽ, ഇൻസ്‌പെക്ടർ ഇവരെ വിളിച്ച് എംഡിഎംഎ ആവശ്യപ്പെട്ടു. രണ്ടു ഗ്രാമിന് പതിനായിരം രൂപയാണ് വില പറഞ്ഞത്. കച്ചവടം ഉറപ്പിച്ചതോടെ അർധരാത്രിയിൽ കൊരട്ടിയിൽ എത്താമെന്ന് ഉറപ്പുനൽകി.ബൈക്കിൽ നൈറ്റ് റൈഡിനു പോകുന്നവരാണെന്ന് പറഞ്ഞാണ് ഇരുവരും പൊലീസ് പരിശോധനയിൽ രക്ഷപ്പെടാറുള്ളത്. ബൈക്കിൽ വരുന്ന ദമ്പതികളെ ചിലപ്പോൾ പൊലീസ് പരിശോധനയിൽ ഒഴിവാക്കാറുമുണ്ട്.

ഇതു മുതലാക്കിയാണ് എംഡിഎംഎ കച്ചവടം തകൃതിയായി നടത്തിയത്.എന്നാൽ കൊരട്ടിയിൽ മഫ്തിയിൽ പൊലീസ് നേരത്തെ സ്ഥാനം ഉറപ്പിച്ചു.ബൈക്കിൽ എത്തിയ അജ്മലും പവിത്രയും എംഡിഎംഎ കാണിച്ചതിനു പിന്നാലെ കയ്യോടെ അറസ്റ്റ് ചെയ്യുകയായിരുന്നു. ദമ്പതികൾക്ക് എംഡിഎംഎ വിറ്റയാളെ പൊലീസ് തിരിച്ചറിഞ്ഞിട്ടുണ്ട്. ഇയാളെ പിടികൂടാനുള്ള ശ്രമത്തിലാണ്.

സെയിൽസ്മാനായ അജ്മൽ, കഞ്ചാവ് കേസിലെ പ്രതി കൂടിയാണ്. ബ്യൂട്ടീഷ്യനായ പവിത്ര, കൊല്ലം ഈസ്റ്റ് സ്റ്റേഷനിൽ പോക്‌സോ കേസിലെ പ്രതിയും. പ്രായപൂർത്തിയാകാത്ത പെൺകുട്ടിയെ പീഡിപ്പിക്കാൻ പ്രതികൾക്കു സൗകര്യം ഒരുക്കിയെന്നാണ് കുറ്റം.