കൊച്ചിയിൽ മൂന്നുവയസ്സുകാരൻ ഓടയിൽ വീണു ; അഴുക്കുവെള്ളത്തിൽ മുങ്ങിപ്പോയി ; അമ്മയുടെ അവസരോചിത ഇടപെടൽ രക്ഷയായി

കൊച്ചി: കൊച്ചി പനമ്പിള്ളി നഗറിൽ അമ്മയ്ക്കൊപ്പം നടന്നുപോയ മൂന്നുവയസ്സുകാരൻ ഓടയിൽ വീണു പരിക്കേറ്റു. നടപ്പാതയുടെ വിടവിലൂടെ കുട്ടി ഓടയിലേക്ക് വീഴുകയായിരുന്നു. പനമ്പിള്ളി നഗർ ഗ്രന്ഥപ്പുര ലൈബ്രറിക്ക് സമീപം വോക്ക് വേയിലെ ഓടയിൽ വച്ചാണ് സംഭവം.

അഴുക്കുവെള്ളത്തിൽ പൂർണമായും മുങ്ങിപ്പോയ കുട്ടി, ഒഴുകിപ്പോകാതിരുന്നത് അമ്മയുടെ അവസരോചിതമായ ഇടപെടൽ മൂലമാണ്. പൊടുന്നനെ ഓടയിലേക്കിറങ്ങിയ അമ്മ കുട്ടിയെ കാലുകൊണ്ട് ഉയർത്തിപ്പിടിച്ചു.

അമ്മയുടെ നിലവിളി കേട്ട് ഓടിയെത്തിയ ചെറുപ്പക്കാരാണ് കുട്ടിയെ ഓടയിൽ നിന്നും പുറത്തെടുത്തത്. വീഴ്ചയുടെ ആഘാതത്തിൽ പരിക്കേറ്റ കുട്ടിയെ സ്വകാര്യ ആശുപത്രിയിൽ പ്രവേശിപ്പിച്ചു. പരിക്ക് ഗുരുതരമല്ലെങ്കിലും 24 മണിക്കൂർ കുട്ടിയെ നിരീക്ഷണത്തിലാക്കി.