സ്‌കൂൾ വിട്ട് മടങ്ങിയ പത്തുവയസ്സുകാരന് നേരേ ലൈംഗികാതിക്രമം; 42-കാരൻ അറസ്റ്റിൽ
മല്ലപ്പള്ളി: സ്‌കൂളിൽനിന്ന് വീട്ടിലേക്ക് മടങ്ങിയ പത്തുവയസ്സുകാരനുനേരേ ലൈംഗികാതിക്രമം കാട്ടിയയാൾ പിടിയിൽ. കല്ലൂപ്പാറ ചെങ്ങരൂർ പാട്ടത്തിൽ വീട്ടിൽ സുധീഷ് കുമാറാണ് (42) കീഴ്‌വായ്പൂർ പൊലീസിന്റെ പിടിയിലായത്. പോക്സോ നിയമപ്രകാരമാണ് കേസ്. തിങ്കളാഴ്ച വൈകീട്ട് മൂന്നിന് സ്‌കൂൾ ബസ്സിറങ്ങി വീട്ടിലേക്ക് നടന്നുപോയ കുട്ടിയോടാണ് ഇയാൾ ലൈംഗികമായി അതിക്രമംകാട്ടിയത്. ഭയന്ന കുട്ടി വീട്ടിലെത്തി അമ്മയോട് വിവരം പറഞ്ഞു.
അമ്മ സ്റ്റേഷനിൽ വിളിച്ചറിയിച്ചതിനെ തുടർന്ന് വനിതാ പൊലീസ് വീട്ടിലെത്തി കുട്ടിയുടെ മൊഴി രേഖപ്പെടുത്തി. പൊലീസ് ഇൻസ്‌പെക്ടർ വിപിൻ ഗോപിനാഥിന്റെ നേതൃത്വത്തിൽ ചെങ്ങരൂരുള്ള വീട്ടിൽനിന്ന് സുധീഷ് കുമാറിനെ കസ്റ്റഡിയിലെടുത്തു. സ്റ്റേഷനിലെത്തിച്ച ഇയാളെ ഫോണിലൂടെ കുട്ടിയെ കാണിച്ച് തിരിച്ചറിഞ്ഞു. ചോദ്യംചെയ്യലിൽ കുറ്റം സമ്മതിച്ചതായി പൊലീസ് പറഞ്ഞു.
എസ്‌ഐ. കെ.സുരേന്ദ്രൻ കെ, എ.എസ്. ഐ. അജു, സി.പി.ഒ.മാരായ ജെയ്‌സൺ, ജെസ്‌ന, ശരണ്യ, രതീഷ്, അൻസീം, ശശികാന്ത്, സജിൽ എന്നിവരും അന്വേഷണത്തിൽ പങ്കെടുത്തു.
