മാരക മയക്കുമരുന്നുമായി വാളയാറിൽ യുവാക്കൾ പിടിയിൽ; എൻജിനീയറിങ് വിദ്യാർത്ഥികളടങ്ങുന്ന സംഘത്തിൽ നിന്നും പിടികൂടിയത് 20 ഗ്രാം മെത്തഫിറ്റമിൻ

പാലക്കാട്: മാരക ലഹരിമരുന്നായ മെത്തഫിറ്റമിനുമായി വാളയാറിൽ യുവാക്കൾ എക്‌സൈസിന്റെ പിടിയിലായി. 20 ഗ്രാമുള്ള ലഹരിവസ്തുവുമായി എൻജിനീയറിങ് വിദ്യാർത്ഥികൾ ഉൾപ്പെടെ നാലുപേരെയാണ് പിടികൂടിയത്.ബംഗളൂരുവിൽ നിന്നും എറണാകുളത്തേക്കുള്ള യാത്രയ്ക്കിടെ എക്‌സൈസ് സംഘം യുവാക്കളെ പിടികൂടുകയായിരുന്നു.

നജിൽ മുഹമ്മദ്, സഞ്ജീദ് അലി, മുഹമ്മദ് സജീദ്, അശ്വിൻ എന്നിവരാണ് അറസ്റ്റിലായത്. എറണാകുളം, കണ്ണൂർ, കോഴിക്കോട് സ്വദേശികളാണിവർ.സംസ്ഥാനത്തേക്ക് കഞ്ചാവിന്റെ വരവ് കുറഞ്ഞതോടെ സിന്തറ്റിക് ഡ്രഗുകളുടെ വരവ് വർദ്ധിച്ചതായാണ് മാരക മയക്കുമരുന്നുകളുമായി വിവിധയിടങ്ങളിൽ നിന്നും യുവാക്കളും വിദ്യാർത്ഥികളുമടങ്ങുന്ന സംഘങ്ങൾ പിടികൂടുന്നതിൽ നിന്നും വ്യക്തമാക്കുന്നതെന്നാണ് എക്‌സൈസിന്റെ വിലയിരുത്തൽ.