മേയർക്കെതിരായ കോൺഗ്രസ് പ്രതിഷേധത്തെ കായികമായി നേരിടാനാണ് സി പി എമ്മിന്റെ തീരുമാനമെങ്കിൽ അതേ നാണയത്തിൽ തിരിച്ചടിക്കും; നട്ടെല്ലില്ലാത്ത പൊലീസ് സി പി എമ്മിന്റെ ക്വട്ടേഷൻ ഏറ്റെടുത്ത് കോൺഗ്രസിനെ വിരട്ടാമെന്ന് കരുതേണ്ടെന്നും കെ.സുധാകരൻ

തിരുവനന്തപുരം: മേയർക്കെതിരായ കോൺഗ്രസ് പ്രതിഷേധങ്ങളെ കായികമായി നേരിടാനാണ് സി പി എമ്മിന്റെ തീരുമാനമെങ്കിൽ അതേ നാണയത്തിൽ തിരിച്ചടിക്കുമെന്ന് കെ പി സി സി പ്രസിഡന്റ് കെ സുധാകരൻ. മേയറുടെ വഴി തടഞ്ഞ കെ എസ് യു പ്രവർത്തകരെ ഡി വൈ എഫ് ഐ, സി പി എം ക്രിമിനലുകൾ ക്രൂരമായി കൺമുന്നിലിട്ട് തല്ലിചതച്ചിട്ടും പൊലീസ് നിഷ്‌ക്രിയമായി നോക്കിനിന്നെന്നും കെ എസ് യു പ്രവർത്തകരെ കയ്യാമം വെച്ച പൊലീസ് അക്രമികളായ സി പി എം പ്രവർത്തകരെ വെറുതെ വിടുകയും ചെയ്‌തെന്നും സുധാകരൻ പറഞ്ഞു. സി പി എമ്മിന്റെ ക്വട്ടേഷൻ ഏറ്റെടുത്ത് കോൺഗ്രസിനെ വിരട്ടാമെന്ന് പൊലീസ് കരുതണ്ടെന്നും സുധാകരൻ അഭിപ്രായപ്പെട്ടു.

'യുവാക്കളുടെ ആത്മാഭിമാനത്തിന് വിലപറഞ്ഞ തിരുവനന്തപുരം മേയർക്കെതിരായ കോൺഗ്രസിന്റെ ജനകീയ പ്രതിഷേധത്തെ കായികമായി നേരിടാനാണ് സി പി എമ്മിന്റെ തീരുമാനമെങ്കിൽ അതേ നാണയത്തിൽ തിരിച്ചടിക്കും. സംസ്ഥാന സർക്കാരും സി പി എമ്മും തുടർച്ചയായി വഞ്ചിച്ച സംസ്ഥാനത്തെ യുവാക്കളുടെ പ്രതിഷേധമാണ് കെ എസ് യു പ്രവർത്തകർ രേഖപ്പെടുത്തിയത്. മേയറുടെ വഴി തടഞ്ഞ ചുണക്കുട്ടികളായ കെ എസ് യു പ്രവർത്തകരെ ഡി വൈ എഫ് ഐ, സി പി എം ക്രിമിനലുകൾ ക്രൂരമായി കൺമുന്നിലിട്ട് തല്ലിചതച്ചിട്ടും പൊലീസ് നിഷ്‌ക്രിയമായി നോക്കിനിന്നു. കൊടിയ മർദ്ദനമേറ്റുവാങ്ങിയ കെ എസ് യു പ്രവർത്തകരെ കയ്യാമം വെച്ച പൊലീസ് അക്രമികളായ സി പി എം പ്രവർത്തകരെ വെറുതെ വിടുകയും ചെയ്തു.

അധികാരത്തിന്റെ തണലിൽ സി പി എം പ്രവർത്തകർ തിണ്ണമിടുക്ക് കാട്ടാൻ മുതിരുമ്പോൾ അതിന് കെ എസ് യുവിന്റെ കുട്ടികളെ ബലിയാടാക്കാമെന്ന് പൊലീസ് സ്വപ്നം കാണണ്ട. സി പി എമ്മിന്റെ വാറോല അനുസരിച്ചാണ് മേയർക്കെതിരെ പ്രതിഷേധിക്കുന്ന കെ എസ് യു, കോൺഗ്രസ് പ്രവർത്തകരെ പൊലീസ് അറസ്റ്റ് ചെയ്യുന്നത്. അതേസമയം മേയർക്കെതിരായ ഗുരുതര ആരോപണം അന്വേഷിച്ച് കേസ് രജിസ്റ്റർ ചെയ്യാനോ, പ്രിൻസിപ്പാളിനെതിരെ കൊലവിളി നടത്തുന്ന എസ് എഫ് ഐ പ്രവർത്തകർക്കെതിരെയോ സംരംഭകരുടെ മേൽ കുതിരകേറുന്ന ഇടതു തൊഴിലാളി സംഘടനയുടെ നേതാക്കൾക്കെതിരെയോ നടപടി സ്വീകരിക്കാൻ നട്ടെല്ലില്ലാത്ത പൊലീസ് സി പി എമ്മിന്റെ ക്വട്ടേഷൻ ഏറ്റെടുത്ത് കോൺഗ്രസിനെ വിരട്ടാമെന്ന് കരുതണ്ടെന്നും സുധാകരൻ പറഞ്ഞു.