സാമ്പത്തിക ഭദ്രതയുള്ളപ്പോൾ മാത്രം യാത്ര ചെയ്താൽ പോര; സാമ്പത്തിക ബുദ്ധിമുട്ട് ഉള്ളതുകൊണ്ട് വസ്ത്രം ധരിക്കേണ്ട എന്ന് ആരെങ്കിലും പറയുമോ? കാറുകൾ വാങ്ങുന്നതിനെ ന്യായീകരിച്ച് കാനം രാജേന്ദ്രൻ

തിരുവനന്തപുരം: സാമ്പത്തിക നിയന്ത്രണത്തിനിടെയും പി ജയരാജൻ അടക്കമുള്ളവർക്ക് കാറു വാങ്ങുന്നതിനെ ന്യായീകരിച്ച് സിപിഐ സംസ്ഥാന സെക്രട്ടറി കാനം രാജേന്ദ്രൻ. സാമ്പത്തിക ഭദ്രതയുള്ളപ്പോൾ മാത്രം യാത്ര ചെയ്താൽ പോര. സാമ്പത്തിക ബുദ്ധിമുട്ട് ഉള്ളതുകൊണ്ട് വസ്ത്രം ധരിക്കേണ്ട എന്ന് ആരെങ്കിലും പറയുമോ. സർക്കാരിന്റെ സാധാരണ ചെലവുകൾ മാത്രമാണിതെന്നും കാനം രാജേന്ദ്രൻ.

അതിനിടെ കടുത്ത സാമ്പത്തിക നിയന്ത്രണത്തിനിടെ സർക്കാർ കൂടുതൽ കാറുകൾ വാങ്ങുന്നു. ഹൈക്കോടതി ജഡ്ജിമാർക്കായി പുതുതായി നാല് കാറുകൾ വാങ്ങാൻ ഉത്തരവിറങ്ങി. ഖാദി ബോർഡ് വൈസ് ചെയർമാൻ പി ജയരാജന് കാർ വാങ്ങാൻ ഉത്തരവിറങ്ങിയ അതേ ദിവസമാണ് ജഡ്ജിമാർക്ക് കാറുകൾ വാങ്ങാനുള്ള ഉത്തരവും പുറത്തിറങ്ങിയത്.

ഈ മാസം 17 നാണ് ഹൈക്കോടതി ജഡ്ജിമാർക്ക് നാല് പുതിയ കാറുകൾ വാങ്ങാനുള്ള ഉത്തരവ് ആഭ്യന്തര വകുപ്പ് പുറത്തിറക്കിയത്. ഹൈക്കോടതി രജിസ്ട്രാറുടെ കത്തിന്റെ അടിസ്ഥാനത്തിലാണ് സർക്കാർ തീരുമാനം. ആ6െ ഇന്നോവാ ക്രിസ്റ്റ് ഡീസൽ കാറുകൾ വാങ്ങുന്നതിന് കാർ ഒന്നിന് 24 ലക്ഷം അനുവദിച്ചാണ് ഉത്തരവ്. ഇതേ ദിവസം തന്നെയാണ് സിപിഎം നേതാവും ഖാദി ബോർഡ് വൈസ് ചെയർമാനുമായ പി ജയരാജന് 35 ലക്ഷം രൂപയ്ക്ക് കാർ വാങ്ങാനുള്ള ഉത്തരവ് വ്യവസായ വകുപ്പിൽ നിന്ന് പുറത്തിറങ്ങിയത്.

ജഡ്ജിമാർക്ക് കാർ വാങ്ങാനുള്ള തീരുമാനം മന്ത്രിസഭാ തീരുമാനമായി സർക്കാർ അറിയിച്ചിരുന്നെങ്കിലും ജയരാജന് കാർ അനുവദിക്കുന്നത് മാധ്യമങ്ങളിൽ നിന്ന് മറച്ച് വെക്കുകയും ചെയ്തു.