ബന്ധുവീട്ടിലെത്തിയത് ഞായറാഴ്‌ച്ച വൈകുന്നേരത്തോടെ; ബന്ധുക്കൾ വീട്ടിലെത്തിയതോടെ കണ്ടത് സന്ദർശക കിണറിൽ മരിച്ച നിലയിൽ; ആലപ്പുഴയിൽ മധ്യവയസ്‌കയുടെ മരണത്തിൽ പൊലീസ് അന്വേഷണം തുടങ്ങി

ആലപ്പുഴ: ബന്ധുവീട്ടിൽ എത്തിയ വീട്ടമ്മയെ കിണറ്റിൽ മരിച്ചനിലയിൽ കണ്ടെത്തി. ഓലകെട്ടി അമ്പലം സ്വദേശി പരേതനായ അനന്തന്റെ ഭാര്യ മീരയെയാണ് (58) ബന്ധുവീട്ടിലെ കിണറ്റിൽ മരിച്ച നിലയിൽ കണ്ടെത്തിയത്.

ഞായറാഴ്ച വൈകുന്നേരമാണ് സംഭവം. സഹോദരനായ തൃക്കുന്നപ്പുഴ പള്ളിപ്പാട്ട് മുറി പട്ടരുമടത്തിൽ അനുമോന്റെ വീട്ടിൽ എത്തിയതായിരുന്നു മീര. ഇവർ വീട്ടിലെത്തിയ സമയം വീട്ടുകാർ ആരും സ്ഥലത്തില്ലായിരുന്നു. പിന്നീട്, ഇവർ എത്തിയപ്പോൾ മീരയെ വീട്ടിൽ കണ്ടില്ല.

തുടർന്ന് ഏറെ നേരത്തെ തെരച്ചലിന് ശേഷം അഞ്ചരയോടെയാണ് വീട്ടുമുറ്റത്തെ കിണറ്റിൽ വീണ നിലയിൽ കണ്ടത്. തുടർന്ന് മീരയെ പുറത്തെടുത്തെങ്കിലും അപ്പോഴേക്കും മരിച്ചിരുന്നു. മൃതദേഹം പോസ്റ്റ്മോർട്ടത്തിനായി ഹരിപ്പാട് താലൂക്ക് ആശുപത്രി മോർച്ചറിയിലേക്ക് മാറ്റി. തൃക്കുന്നപ്പുഴ പൊലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചു.