വഴി ചോദിക്കാനെന്ന വ്യാജേന അടുത്ത് നിർത്തി സ്‌കൂൾ വിദ്യാർത്ഥിനിക്ക് നേരെ നഗ്നതാ പ്രദർശനം; പ്രവാസിയായ 42 കാരൻ അറസ്റ്റിൽ
പറവൂർ: സ്‌കൂൾ വിദ്യാർത്ഥിനിക്ക് നേരെ നഗ്‌നത പ്രദർശനം നടത്തിയ പ്രവാസി അറസ്റ്റിൽ. വടക്കേക്കര പൊലീസ് സ്റ്റേഷൻ പരിധിയിൽ സ്ഥിതിചെയ്യുന്ന സ്‌കൂളിൽ പഠിക്കുന്ന 14 -കാരിക്കു നേരെ നഗ്‌നത പ്രദർശനം നടത്തിയ കൊടുങ്ങല്ലൂർ വെമ്പല്ലൂർ വില്ലേജ് കൈതക്കാട്ട് വീട്ടിൽ പ്രതീഷിനെ ( 42 )യാണ് പോക്‌സോ കേസിൽ അറസ്റ്റു ചെയ്തിട്ടുള്ളത്.
വൈകിട്ട് മൂന്നേകാലോടെ സ്‌കൂൾ വിട്ട് വിദ്യാർത്ഥിനി തനിയെ നടന്നു പോകുന്നത് കണ്ട പ്രതീഷ് കാറിൽ പുറകെ ചെന്ന് വഴി ചോദിക്കാൻ എന്ന വ്യാജേന അടുത്ത് നിർത്തി, അടുത്തേക്ക് വിളിച്ച് വിദ്യാർത്ഥിനിക്ക് നേരെ നഗ്‌നത പ്രദർശനം നടത്തുകയായിരുന്നു.
ഭയന്നുപോയ കുട്ടി വീട്ടിലേക്ക് ഓടിപ്പോവുകയും മതാപിതാക്കളെ വിവരം അറിയിക്കുകയായിരുന്നു. കാറിനെ കേന്ദ്രീകരിച്ചുള്ള അന്വേഷണത്തെ തുടർന്നാണ് പ്രതിഷ് പിടിയിലാവുന്നത്. ദീർഘകാലം പ്രവാസിയായിരുന്ന ഇയാൾ സമീപകാലത്താണ് നാട്ടിൽ താമസമാക്കിയത്. ഇയാൾ സഞ്ചരിച്ച കാറും പൊലീസ് കസ്റ്റഡിയിൽ എടുത്തു.
മുനമ്പം ഡി.വൈ.എസ്‌പി എം.കെ മുരളിയുടെ നിർദ്ദേശപ്രകാരം വടക്കേക്കര സിഐ സൂരജ് വി സി,എസ് ഐ ഷെറി എം. എസ് എ.എസ് .ഐ മാരായ റസാഖ്, ഷൈൻ, ഗ്രേസി എന്നിവർ ഉൾപ്പെട്ട പൊലീസ് സംഘമാണ് കേസ് അന്വേഷണം നടത്തിയത്.
