തിരുവനന്തപുരം: പുരുഷന്മാർക്കുള്ള സ്ഥിരം കുടുംബാസൂത്രണ മാർഗ്ഗമായ നോ-സ്‌കാൽപൽ വാസക്ടമി (എൻ.എസ്.വി) ക്യാമ്പുകൾ ഡിസംബർ ഒന്ന്, രണ്ട്, മൂന്ന് തീയതികളിൽ തിരുവനന്തപുരം ജില്ലയിൽ സംഘടിപ്പിക്കുമെന്ന് ഡി.എം.ഒ ഡോ. ബിന്ദു മോഹൻ അറിയിച്ചു. പൂർണമായും സൗജന്യമായ എൻ.എസ്.വി ലളിതവും സുരക്ഷിതവും രക്തസ്രാവമില്ലാത്തതും വേദനാരഹിതവുമാണ്. എൻ.എസ്.വി കഴിഞ്ഞ് അരമണിക്കൂറിനുള്ളിൽ വീട്ടിൽ പോകാം. ഡിസംബർ ഒന്നിന് നെടുമങ്ങാട് ജില്ലാ ആശുപത്രിയിലും രണ്ടിന് ആറ്റിങ്ങൽ താലൂക്ക് ആശുപത്രിയിലും മൂന്നിന് തിരുവനന്തപുരം ജനറൽ ആശുപത്രിയിലും രാവിലെ 10 മണി മുതൽ 1 മണി വരെയാണ് ക്യാമ്പ് സംഘടിപ്പിക്കുന്നത്. ക്യാമ്പ് നടക്കുന്ന ആശുപത്രിയിലേക്ക് നേരിട്ടോ അടുത്തുള്ള ആരോഗ്യപ്രവർത്തകർ വഴിയോ എത്താം. ആരോഗ്യ സ്ഥാപനങ്ങളിൽ നിന്നും ക്യാമ്പ് നടത്തുന്ന ആശുപത്രികളിലേക്കും തിരിച്ചും വാഹന സൗകര്യം ഉണ്ടായിരിക്കും. സർക്കാർ ഉദ്യോഗസ്ഥർക്ക് സ്പെഷ്യൽ ക്യാഷ്വൽ ലീവ് ലഭിക്കും. എൻ.എസ്.വിക്ക് വിധേയമാകുന്ന എല്ലാവർക്കും 1100 രൂപ ധനസഹായം ലഭിക്കും. ഈ അവസരം പരമാവധി പ്രയോജനപ്പെടുത്തണമെന്ന് ഡി.എം.ഒ അഭ്യർത്ഥിച്ചു.