കോട്ടയം: ഗിയർ മാറ്റാൻ ശ്രമിക്കുന്നതിനിടെ ലിവറിനു സമീപം പാമ്പിനെ കണ്ട് ഭയന്ന ഡ്രൈവർക്ക് ലോറിയുടെ നിയന്ത്രണം നഷ്ടപ്പെട്ടതോടെ വാഹനം അപകടത്തിൽപ്പെട്ടു. യാത്രയ്ക്കിടെ സമീപത്തുള്ള ഒരു സംരക്ഷണഭിത്തിയിലേക്ക് ലോറി ഇടിച്ചുകയറിയശേഷം മറിയുകയായിരുന്നു. കോട്ടയം പിണ്ണാക്കനാട് പൈഗറൂട്ടിൽ മല്ലികശ്ശേരിക്ക് സമീപമായിരുന്നു സംഭവം.

തിങ്കളാഴ്ച രാവിലെ 9.15-ഓടെയാണ് അപകടം. വിളക്കുമാടത്തുനിന്ന് മല്ലികശ്ശേരിയിലേക്ക് വീടുനിർമ്മാണത്തിനുള്ള പാറപ്പൊടി കയറ്റിപ്പോവുകയായിരുന്നു ലോറി. ഗിയർ മാറ്റുന്നതിനിടെ ലിവറിനുസമീപം പാമ്പ് കിടക്കുന്നത് ശ്രദ്ധയിൽപ്പെട്ടു.

ഇതോടെ പരിഭ്രാന്തനായ ഡ്രൈവർക്ക് ലോറിയുടെമേലുള്ള നിയന്ത്രണം നഷ്ടമായി. പിന്നാലെ വാഹനം സമീപത്തുള്ള സംരക്ഷണ ഭിത്തിയിലേക്കും തുടർന്ന് ഒരു ഇലക്ട്രിക് പോസ്റ്റിലേക്കും ഇടിച്ചുകയറിയശേഷം മറിയുകയായിരുന്നു.

അപകടത്തിൽ ആർക്കും പരിക്കുകളില്ല. ലോറിയുടെ മുൻഭാഗം തകർന്നു. ലോറി ഇടിച്ചുമറിഞ്ഞയുടൻ തന്നെ പാമ്പും വാഹനത്തിൽനിന്ന് പുറത്തുകടന്ന് സമീപപ്രദേശത്തേക്ക് കയറിപ്പോയി.

മറുനാടന്‍ മലയാളി

    മറുനാടന്‍ മലയാളി ബ്യൂറോ