കോഴിക്കോട്: വീട്ടുവളപ്പിലെ തെങ്ങ് റോഡിന് കുറുകെ വൈദ്യുതി ലൈനിലേക്ക് കടപുഴകി വീണ് ഗതാഗതം തടസ്സപ്പെട്ടു. കട്ടാങ്ങൽ - ഓമശ്ശേരി റോഡിൽ മലയമ്മ പെട്രോൾ പമ്പിന് സമീപം ഇന്ന് വൈകീട്ട് നാലരയോടെയാണ് സംഭവം. റോഡിന് സമീപം താമസിക്കുന്ന പുതിയപറമ്പത്ത് ഖദീജയുടെ വീട്ടുവളപ്പിലെ തെങ്ങ് സമീപത്തെ റോഡിന് കുറുകെ വീഴുകയായിരുന്നു. സമീപത്തു കൂടി കടന്നുപോകുന്ന 11 കെ.വി ലൈനിന് മുകളിലായാണ് തെങ്ങ് വീണത്. ഒരു ഇലക്ട്രിക് പോസ്റ്റും തകർന്നിട്ടുണ്ട്. ഈ സമയത്ത് വാഹനങ്ങൾ ഒന്നും ഇല്ലാതിരുന്നതിനാൽ അപകടം ഒഴിവാകുകയായിരുന്നു.

വാഹനങ്ങൾക്ക് പോകാൻ സാധിക്കാത്ത വിധത്തിൽ തെങ്ങ് വീണതിനാൽ അൽപസമയം ഗതാഗതം തടസ്സപ്പെട്ടു. പിന്നീട് മുക്കം അഗ്‌നിരക്ഷാ സേന സ്ഥലത്തെത്തി മരം മുറിച്ചു മാറ്റിയാണ് ഗതാഗതം പുനഃസ്ഥാപിച്ചത്. മുക്കം ഫയർ സ്റ്റേഷൻ ഓഫീസർ എം.അബ്ദുൽ ഗഫൂറിന്റെ നേതൃത്വത്തിൽ ഗ്രേഡ് അസിസ്റ്റന്റ് സ്റ്റേഷൻ ഓഫീസർ പയസ് അഗസ്റ്റിൻ, ഫയർ ഓഫീസർമാരായ എം.സി സജിത്ത് ലാൽ, കെ. അഭിനേഷ്, വി. സലീം, ടി.പി ഫാസിൽ അലി, ആർ. വി. അഖിൽ, കെ. എസ്. വിജയകുമാർ എന്നിവർ നേതൃത്വം നൽകി.