പമ്പ: ശബരിമല തീർത്ഥാടനവുമായി ബന്ധപ്പെട്ട് പമ്പ, കക്കാട്ടാർ, അച്ചൻകോവിലാർ എന്നീ നദികളിൽ ജില്ലാ ഭരണകൂടവും പൊലീസ് വകുപ്പും നിർദേശിച്ച സ്ഥലങ്ങളിൽ അപകട ഭീതി ഒഴിവാക്കുന്നതിന് ജലസേചന വകുപ്പിന്റെ ആഭിമുഖ്യത്തിൽ ബാരിക്കേഡുകളും സുരക്ഷാബോർഡുകളും സ്ഥാപിക്കുന്നത് പൂർത്തിയാകുന്നു.പമ്പാ സ്‌നാന സരസിലെ ജല ലഭ്യത ഉറപ്പു വരുത്തുന്നതിന് തടയണകളുടെ പ്രവർത്തനവും പരിപാലനവും ജലസേചന വകുപ്പാണ് നിർവഹിക്കുന്നത്. ബലിതർപ്പണം നടത്തുന്ന ഭാഗത്ത് തീർത്ഥാടകർക്ക് സ്‌നാനം ഉറപ്പാക്കുന്നതിന് കക്കിയാറിൽ താൽകാലിക തടയണ നിർമ്മിച്ച് ജല വിതാനം നിയന്ത്രിച്ച് ജലലഭ്യത ഉറപ്പുവരുത്തുന്നു.
പമ്പാ, അച്ചൻകോവിൽ നദികളിൽ തീർത്ഥാടകർ സ്‌നാനം നടത്തുന്ന എല്ലാ കടവുകളിലും സുരക്ഷാ ബോർഡുകൾ വിവിധ ഭാഷകളിൽ സ്ഥാപിച്ചും ബാരിക്കേഡുകൾ നിർമ്മിച്ചും തീർത്ഥാടകരുടെ സുരക്ഷ ഉറപ്പാക്കും. കൂടാതെ തീർത്ഥാടനം സുരക്ഷിതവും സുഗമവും ആക്കുന്നതിന് ജില്ലാ ഭരണകൂടത്തിന്റെ നിർദേശങ്ങൾക്ക് അനുസരിച്ച് ആവശ്യമായ പ്രവൃത്തികൾ സമയ ബന്ധിതമായി ഏറ്റെടുത്ത് നടപ്പാക്കി വരുന്നു.
നിലവിൽ പമ്പാ നദിയുടേയും കക്കിനദിയുടേയും തീരത്ത് 1250 മീറ്റർ നീളത്തിൽ സ്‌നാനഘട്ടങ്ങൾ ജലസേചന വകുപ്പ് പരിപാലിച്ച് പോരുന്നു. പമ്പാ - ത്രിവേണിയിലെ സ്‌നാന സരസിലെ ജലത്തിന്റെ മലിനീകരണം തടയുന്നതിന് വേണ്ടിയും, ജലനിരപ്പ് നിയന്ത്രിക്കുന്നതിന് വേണ്ടിയും ആറു വിസിബികൾ ജലസേചന വകുപ്പ് പരിപാലിക്കുന്നുണ്ട്. കൂടാതെ പമ്പയിൽ തീർത്ഥാടകർക്ക് സ്‌നാനം ചെയ്യുന്നതിന് ഷവർ യൂണിറ്റുകൾ ജലസേചന വകുപ്പ് നിർമ്മിച്ച് നൽകുകയും പരിപാലിക്കുകയും ചെയ്തു വരുന്നു. 2018ലെ പ്രളയത്തിൽ ഭീമമായ കേടുപാടുകൾ സംഭവിച്ച പമ്പാ - ത്രിവേണിയിലെ ഞുണങ്ങാർ പാലത്തിന്റെ പുനർനിർമ്മാണ പ്രവർത്തനങ്ങൾ അവസാന ഘട്ടത്തിലാണ്.
പ്രധാന പ്രവർത്തനങ്ങൾ: പമ്പാ നദിയിലെ ജലവിതാനം നിയന്ത്രിക്കുന്നതിനും മലിനീകരണം കുറയ്ക്കുന്നതിനും നദിയിലെ ഒഴുക്ക് നിയന്ത്രിക്കുന്നതിന് സ്ഥിരം തടയണകളെ പ്രവർത്തന സജ്ജമാക്കും. പമ്പാ, കക്കി നദിയിലേക്ക് മാലിന്യം നിക്ഷേപിക്കുന്നത് ഒഴിവാക്കുന്നതിന് സുരക്ഷാ വേലി സജ്ജമാക്കും. പന്തളം വലിയ കോയിക്കൽ ക്ഷേത്രത്തിന് സമീപമുള്ള തടയണയുടെ താഴ്ഭാഗത്തും നദിയിലെ മറ്റ് വിവിധ കടവുകളിലും താൽക്കാലിക വേലിയും സുരക്ഷാ ബോർഡുകളും സ്ഥാപിക്കും.
നീരൊഴുക്ക് കുറയുന്ന അവസരങ്ങളിൽ ജലവിതാനം ക്രമീകരിക്കുന്നതിന് പമ്പാ ത്രിവേണിയിലെ ബലിതർപ്പണ ഭാഗത്തും വടശേരിക്കര കാരക്കാട് തോടിന് കുറുകയും താൽകാലിക തടയണ നിർമ്മിക്കും. പമ്പാ ത്രിവേണിയിൽ ജലസേചന നിർമ്മിതികളായ സ്‌നാന ഘട്ടങ്ങളുടേയും, ജലസേചന കാര്യാലയത്തിന്റെയും അറ്റകുറ്റപണികൾ. റാന്നി ചെറുകോൽ പഞ്ചായത്തിൽ തിരുവാഭരണ പാതയിൽ കലുങ്കിന്റെ നിർമ്മാണം. പന്തളം വലിയ കോയിക്കൽ ക്ഷേത്രത്തിന് സമീപം കൊട്ടാരകടവിന്റെ പുനർനിർമ്മാണം. അനുബന്ധമായി സ്‌നാനഘട്ടത്തിന്റെ നിർമ്മാണവും ചേർന്നുള്ള തീരസംരക്ഷണ പ്രവർത്തനങ്ങളും.
