ആവശ്യത്തിന് ഗസ്റ്റ് അദ്ധ്യാപകരെ നിയമിക്കണമെന്ന് ആവശ്യം; തൃശൂർ കേരളവർമ്മ കോളേജിൽ അദ്ധ്യാപകരെ തടഞ്ഞുവച്ച് എസ്എഫ്‌ഐ സമരം; തീരുമാനമാകും വരെ സമരം തുടരുമെന്ന് എസ് എഫ് ഐ പ്രവർത്തകർ

തൃശൂർ: തൃശൂർ കേരളവർമ്മ കോളേജിൽ അദ്ധ്യാപകരെ തടഞ്ഞുവച്ച് എസ് എഫ് ഐ സമരം. ആവശ്യത്തിനുള്ള ഗസ്റ്റ് അദ്ധ്യാപകരെ നിയമിക്കണം എന്നാവശ്യപ്പെട്ടാണ് എസ് എഫ് ഐ സമരവുമായി രംഗത്തുവന്നത്. സ്റ്റാഫ് കൗൺസിൽ നടക്കുന്ന ഹാളിൽ ആണ് എസ് എഫ് ഐ പ്രവർത്തകർ അദ്ധ്യാപകരെ തടഞ്ഞു വെച്ചിരിക്കുന്നത്.

വിദ്യാർത്ഥികളുടെ സമരം തുടങ്ങിയിട്ട് ഒരു മണിക്കൂറോളമായിട്ടുണ്ട്. സ്റ്റാഫ് മീറ്റിംഗിനിടെയാണ് എസ് എഫ് ഐ പ്രവർത്തകർ സമരവുമായി റൂമിലേക്ക് എത്തിയത്. ഗസ്റ്റ് അദ്ധ്യാപകരെ നിയമിക്കുന്ന കാര്യത്തിൽ തീരുമാനം എടുക്കും വരെ സമരം തുടരുമെന്ന തീരുമാനത്തിലാണ് സമരക്കാർ.

പൊലീസ് സ്ഥലത്തെത്തിയെങ്കിലും വിഷയത്തിൽ ഇടപെട്ടിട്ടില്ല. പ്രതിഷേധം സമാധാനപരമായിട്ടാകും നടത്തുകയെന്നാണ് വിദ്യാർത്ഥികൾ വ്യക്തമാക്കിയിട്ടുള്ളത്.