'നാളെയെൻ നാടും വരും'; മെസ്സിക്കും നെയ്മറിനും റൊണാൾഡോയ്ക്കും കട്ടൗട്ടുകൾ നിറയുന്ന കേരളത്തിൽ വേറിട്ട് പാത്രമംഗലം; 52 അടിയിൽ പാടവരമ്പത്ത് ഉയർന്നത് സുനിൽ ഛേത്രിയുടെ വമ്പൻ കട്ടൗട്ട്

തൃശ്ശൂർ:ലോകമെങ്ങുമുള്ള ഫുട്‌ബോൾ ആരാധകരെല്ലാം ആവേശത്തിന്റെ കൊടുമുടിയിലെത്തി നിൽക്കുന്ന വേളയിൽ കേരളത്തിലും ആരാധക ആവേശം അത്യുന്നതിയിലാണ്.ബ്രസീലും, അർജന്റീനയും, ജർമ്മനിയും, പോർച്ചുഗലും ഒക്കെ ആരാധകർ ഏറെയുള്ള ടീമുകളാണ്.ഇതിന് പിന്നാലെ സൂപ്പർതാരങ്ങളുടെ കട്ടൗട്ടുകളും കേരളത്തിലുടനീളമുള്ള കവലകൾ തോറും ഉയർന്നു കഴിഞ്ഞു.മെസ്സിയും നെയ്മറും, ക്രിസ്റ്റിയാനോയും തന്നെയാണ് എല്ലായിടത്തും നിറഞ്ഞു നിൽക്കുന്നത്.എന്നാൽ ഇക്കൂട്ടത്തിൽ ഏറെ വ്യത്യസ്തമായ ഒരു കട്ടൗട്ടുമായി എത്തിയിരിക്കുകയാണ് തൃശൂരിലെ പാത്രമംഗലം എന്ന പ്രദേശത്തെ ആരാധകർ.

ലോകകപ്പിൽ യോഗ്യത നേടിയിട്ടില്ലെങ്കിലും ഇന്ത്യൻ നായകൻ സുനിൽ ഛേത്രിയുടെ വമ്പൻ കട്ടൗട്ടാണ് ഇവിടെ ഉയർത്തിയിരിക്കുന്നത്. പ്രവാസികളായ ചിലരുടെ ശ്രമഫലമായാണ് ഇന്ത്യൻ ടീമിന് അഭിവാദ്യങ്ങൾ അർപ്പിച്ചുകൊണ്ട് സുനിൽ ഛേത്രിയുടെ കട്ടൗട്ട് ഇവിടെ ഉയർത്തിയിരിക്കുന്നത്.ഏകദേശം 52 അടിയോളം വരുന്ന ഈ കട്ടൗട്ട് നോക്കെത്താ ദൂരത്തോളം പരന്നുകിടക്കുന്ന നെൽപാടത്തിന്റെ കരയിലാണ് സ്ഥാപിച്ചിരിക്കുന്നത്. 'നാളെയെൻ നാടും വരും' എന്ന വാചകവും കട്ടൗട്ടിന് താഴെ രേഖപ്പെടുത്തിയിരിക്കുന്നു.

എല്ലാവരും അർജന്റീനയ്ക്കും, ബ്രസീലിനും പുറകെ പോവുമ്പോഴും തങ്ങളുടെ രാജ്യം എന്നെങ്കിലും വിശ്വമാമാങ്കത്തിൽ സാന്നിധ്യം അറിയിക്കുമെന്ന ശുഭാപ്തി വിശ്വാസത്തോടെയാണ് ഈ കട്ടൗട്ട് ഇവിടെ ഉയർത്തിയിരിക്കുന്നത്.ലോകകപ്പ് പോലെയൊരു വലിയൊരു പ്ലാറ്റ്ഫോമിൽ ഇന്ത്യ പങ്കെടുക്കുന്ന കാലം വിദൂരമല്ല. ഇന്ത്യൻ ഫുട്‌ബോളിന് വേണ്ടത്ര പരിഗണന കിട്ടുന്നില്ലെന്നതാണ് വാസ്തവം. അങ്ങനെയുള്ളപ്പോൾ ഞങ്ങളെങ്ങനെ മറ്റൊരു രാജ്യത്തിന് വേണ്ടി ആർപ്പ് വിളിക്കും? ഞങ്ങൾക്കുറപ്പുണ്ട് ഇന്ത്യ ഒരുനാൾ ലോകകപ്പിൽ കളിക്കും, അതിനായാണ് ഞങ്ങൾ കാത്തിരിക്കുന്നത്'

ലോക ഫുട്‌ബോളിൽ മെസ്സിക്കും, ക്രിസ്റ്റിയാനോയ്ക്കും ഒപ്പം നിലവിൽ ഏറ്റവും കൂടുതൽ ഗോൾ നേടിയവരുടെ പട്ടികയിൽ മൂന്നാമതുള്ള താരമാണ് സുനിൽ ഛേത്രി.അതിനാൽ തന്നെ താരത്തിന് നൽകുന്ന ഒരു ആദരം കൂടിയായാണ് ഈ ചെറുപ്പക്കാർ ഇതിനെ കാണുന്നത്.
ഇന്നലെ വൈകീട്ട് സ്ഥാപിച്ച കട്ടൗട്ട് ഇന്ത്യൻ ആരാധകർ ഏറ്റെടുത്തു കഴിഞ്ഞു. മിക്ക സോഷ്യൽ മീഡിയ പ്ലാറ്റ്ഫോമുകളിലും ഇതിന്റെ ദൃശ്യങ്ങൾ നിറയുകയാണ് ഇപ്പോൾ. അടുത്തിടെ കോഴിക്കോട് പുള്ളാവൂരിലെ പുഴയിൽ സ്ഥാപിച്ച കട്ടൗട്ടുകൾ ആഗോള ശ്രദ്ധ നേടിയതിന് പിന്നാലെയാണ് പാത്രമംഗലത്ത് ഇന്ത്യൻ നായകന്റെ കട്ടൗട്ട് സ്ഥാപിക്കപ്പെട്ടിരിക്കുന്നത്.