കണ്ണൂർ ജില്ലാ സ്‌കൂൾ കായിക മേള ഞായറാഴ്ച നടത്തരുത്; മതബോധന ക്ലാസുകളെ ബാധിക്കുന്നത് ക്രൈസ്തവർക്ക് ബുദ്ധിമുട്ടുണ്ടാക്കും; എതിർപ്പുമായി തലശ്ശേരി രൂപത
കണ്ണൂർ: ജില്ല സ്‌കൂൾ കായിക മേള ഞായറാഴ്ച നടത്തരുതെന്ന് തലശ്ശേരി അതിരൂപത. കണ്ണൂർ ജില്ലാ അത്‌ലറ്റിക് മീറ്റ് മാറ്റിവെക്കണമെന്നാണ് അതിരൂപത പാസ്റ്ററൽ കൗൺസിൽ ആവശ്യപ്പെടുന്നത്. ക്രൈസ്തവർ വിശുദ്ധമായി ആചരിക്കുന്ന ഞായറാഴ്ച തന്നെ കായികമേള നടത്താനുള്ള തീരുമാനം ക്രൈസ്തവർക്ക് ബുദ്ധിമുട്ടുണ്ടാക്കുന്നതാണെന്നുംതലശ്ശേരി അതിരൂപത വികാരി ജനറാൾ ആന്റണി മുതുകുന്നേൽ അഭിപ്രായപ്പെട്ടു.
മതബോധനമടക്കമുള്ള ക്ലാസുകളെ തടസ്സപ്പെടുത്തുന്ന ഇത്തരം പ്രവണതകൾ അംഗീകരിക്കാനാവില്ല. ഒക്ടോബർ എട്ട് ഞായറാഴ്ച നടത്തുമെന്നറിയിച്ച കായികമേള മറ്റൊരു ദിവസത്തിലേക്ക് മാറ്റണമെന്ന് അതിരൂപത പാസ്റ്ററൽ കൗൺസിൽ ജനറൽ സെക്രട്ടറി ഫാ. ജോസഫ് മുട്ടത്ത്കുന്നേൽ, പാസ്റ്ററൽ കൗൺസിൽ സെക്രട്ടറി ജോർജ് തയ്യിൽ, എ.കെ.സി.സി ഗ്ലോബൽ ഡയറക്ടർ ഫാ.ഫിലിപ്പ് കവിയിൽ എന്നിവർ ആവശ്യപ്പെട്ടു.
അതേസമയം, ശനിയാഴ്ച അദ്ധ്യാപകരുടെ ക്ലസ്റ്റർ യോഗമുള്ളതിനാലാണ് മേള ഞായറാഴ്ചയിലേക്ക് നീണ്ടതെന്നും വിഷയം വിദ്യാഭ്യാസ വകുപ്പിന്റെ ശ്രദ്ധയിൽപെടുത്താമെന്നും സംഘാടകർ അറിയിച്ചു. കണ്ണൂർ ജില്ലാ അത്‌ലറ്റിക് മീറ്റ് 5,6,8 തീയതികളിൽ തലശ്ശേരിയിൽ വച്ചാണ് സംഘടിപ്പിക്കുന്നത്.
