ബാലച്ചേട്ടൻ ഐ സി യുവിൽ തന്നെ ആണ്; ഇന്നലെ കണ്ടപ്പോൾ പുള്ളിക്ക് ആകെയുള്ള വിഷമം ഒരുകാര്യത്തിൽ മാത്രം; മുമ്പ് സംഭവിച്ചത് പോലെ ഇത്തവണയും അദ്ദേഹം ശക്തമായി തിരിച്ചുവരും; നടൻ ബാലയുടെ ആരോഗ്യവിവരങ്ങൾ പങ്കുവച്ച് ഭാര്യ എലിസബത്തിന്റെ കുറിപ്പ്
കൊച്ചി: കരൾ സംബന്ധമായ അസുഖത്തെ തുടർന്ന് കൊച്ചിയിലെ സ്വകാര്യ ആശുപത്രിയിൽ ചികിത്സയിൽ കഴിയുന്ന നടൻ ബാലയുടെ വിവരങ്ങൾ ഭാര്യ എലിസബത്ത് പങ്കുവച്ചു. ഫേസ്‌ബുക്കിലാണ് കുറിപ്പ്.
ബാല ഐ സി യുവിൽ തന്നെയാണെന്നും വാർത്ത പുറംലോകമറിഞ്ഞതാണ് അദ്ദേഹത്തിന് ആകെയുള്ള വിഷമമെന്നും അവർ ഫേസ്‌ബുക്കിൽ കുറിച്ചു.ബാല ശക്തമായി തിരിച്ചുവരുമെന്നും എല്ലാവരും പ്രാർത്ഥിക്കണമെന്നും കുറിപ്പിൽ പറയുന്നു.
ഫേസ്‌ബുക്ക് കുറിപ്പിന്റെ പൂർണ്ണരൂപം
ബാലച്ചേട്ടൻ ഐ സി യുവിൽ തന്നെ ആണ്. ഇന്നലെ കണ്ടപ്പോൾ പുള്ളിക്ക് ആകെയുള്ള വിഷമം വാർത്ത പബ്ലിക്കായതാണ്. എല്ലാവരോടും പുള്ളി ഓക്കെയാണെന്ന് പറഞ്ഞു. അദ്ദേഹം ഒരു സ്ട്രോംഗ് പേഴ്‌സൺ ആണ്. കഴിഞ്ഞ മൂന്ന് നാല് വർഷങ്ങളായി ഇതുപോലെയുള്ള എമർജൻസികൾ ഉണ്ടായെങ്കിലും അദ്ദേഹം ശക്തമായി തിരിച്ചുവന്നു. ഇത്തവണയും അദ്ദേഹം ശക്തമായി തിരിച്ചുവരും. അദ്ദേഹത്തിന് വേണ്ടി പ്രാർത്ഥിക്കണം.
മകൾ അവന്തിക, ആദ്യ ഭാര്യ അമൃത സുരേഷ്, നടൻ ഉണ്ണി മുകുന്ദൻ, നിർമ്മാതാവ് ബാദുഷ തുടങ്ങിയവർ ഇന്നലെ ബാലയെ ആശുപത്രിയിൽ സന്ദർശിച്ചിരുന്നു.
അതസമയം, ബാലയുടെ ആരോഗ്യ സ്ഥിതി തൃപ്തികരമാണെങ്കിലും കരൾ മാറ്റിവയ്ക്കുന്നതാണ് ഉചിതമെന്ന് അമൃതാ ആശുപത്രി കരൾ രോഗ വിദഗ്ദ്ധൻ ഡോ. എസ്. സുധീന്ദ്രൻ. ബാലയുടെ കരളിന്റെ പ്രവർത്തനം 20 ശതമാനം മാത്രമാണെന്നും മരുന്നു കഴിച്ച് മാറ്റിയെടുക്കാൻ ബുദ്ധിമുട്ടാണെന്നും അദ്ദേഹം മറുനാടനോട് പറഞ്ഞു. കഴിഞ്ഞ 3 വർഷമായി കരൾ രോഗത്തിന് അമൃതയിൽ ചികിത്സ നടത്തി വരികയായിരുന്നു ബാല. കഴിഞ്ഞ മൂന്നാഴ്ചയായി വളരെ അധികം മോശമായ ആരോഗ്യ സ്ഥിതിയിലേക്ക് പോകുകയായിരുന്നു.
ആശുപത്രിയിലെത്തുമ്പോൾ വളരെ മോശമായ ആരോഗ്യ നിലയിലായിരുന്നു ബാല. പിത്തരസം വളരെ കൂടുതലും രക്തം കട്ടപിടിക്കാത്ത അവസ്ഥയിലുമായിരുന്നു. ഐ.സി.യുവിലെ ചികിത്സയിൽ ആരോഗ്യ സ്ഥിതി മെച്ചപ്പെട്ടു വരുന്നെങ്കിലും ലിവർ സിറോസിസ് പിടിപെട്ട കരൾ സാധാരണ കരൾ പോലെ ആരോഗ്യത്തോടെ വീണ്ടും വളരില്ല. മരുന്നുകൾ ഉണ്ടെങ്കിലും അത്രകണ്ട് ഫലപ്രദമാകില്ല. അതു കൊണ്ട് തന്നെയാണ് കരൾ മാറ്റിവയ്ക്കണമെന്ന് നിർദ്ദേശിച്ചിരിക്കുന്നത് എന്നും ഡോ. എസ്.സുധീന്ദ്രൻ പറഞ്ഞു.
കേരളത്തിൽ മസ്തിഷ്‌ക മരണം സംഭവിച്ചവരുടെ കരൾ ലഭ്യത വളരെ കുറവാണ്. അതിനാൽ ബന്ധുക്കളുടെ കരളിന്റെ പകുതി മുറിച്ചു വച്ചാണ് അവയവമാറ്റ ശസ്ത്രക്രിയ നടത്തുന്നത്. അക്കാര്യം ബന്ധുക്കളെ അറിയിച്ച് അതിനുള്ള നിയമ നടപടികളും തയ്യാറെടുപ്പുകളും നടത്തിക്കൊണ്ടിരിക്കുകയാണ്. ദാതാവിനെ ലഭിച്ചാലും കുറച്ചു ദിവസങ്ങളോളം നിയമ നടപടികൾ പൂർത്തിയാക്കാനായി എടുക്കും. കൂടാതെ മസ്തിഷ്‌ക മരണം സംഭവിച്ചവരുടെ അവയവം ലഭിക്കാനായി ആശുപത്രിയിലെ പട്ടികയിൽ രജിസ്റ്റർ ചെയ്തിട്ടുമുണ്ട്;-ഡോ.എസ്.സുധീന്ദ്രൻ.
രണ്ട് ദിവസം മുൻപാണ് ബാലയെ അമൃതാ ആശുപത്രയിൽ ചികിത്സയിൽ പ്വേശിപ്പിച്ചത്. പാലാരിവട്ടം മാമംഗലത്തെ വീട്ടിൽ വച്ച് ഛർദ്ദിച്ച് അവശനായി ബോധം മറഞ്ഞതോടെയാണ് സുഹൃത്തുക്കളും സഹായികളും ചേർന്ന് അമൃതാ ആശുപത്രിയിലെക്ക് എത്തിക്കുന്നത്. തീവ്രപരിചരണ വിഭാഗത്തിൽ നിന്നും ജി.ഐ. ഐ.സി.യുവിലേക്ക് പ്രവേശിപ്പിക്കുകയും അടിയന്തിര ചികിത്സ നൽകുകയും ചെയ്തു. പരിശോധനയിൽ കരളിന്റെ പ്രവർത്തനം താറുമാറാണെന്നും ലിവർ സിറോസിസ് പിടിപെട്ടു എന്നും കണ്ടെത്തി. തുടർന്നാണ് കരൾ മാറ്റി വയ്ക്കണമെന്ന നിർദ്ദേശം ബന്ധുക്കളെ അറിയിച്ചത്.
വിവരമറിഞ്ഞ് ബാലയുടെ സഹോദരൻ ശിെൈവ ന്നയിൽ നിന്നും ആശുപത്രിയിലെത്തി. മുൻഭാര്യ അമൃതാ സുരേഷ് ബന്ധുക്കളുമൊന്നിച്ച് മകൾ പാപ്പുവുമായി ബാലയെ കാണാനെത്തി. ഉണ്ണി മുകുന്ദനും ബാദുഷയും ഗോപീ സുന്ദറും അമ്മ സംഘടനയുടെ ഭാരവാഹികളും ആശുപത്രിയിലെത്തിയിരുന്നു. വിദഗ്ദ്ധ ചികിത്സ ലഭ്യമാക്കാനായി എല്ലാവിധമായ കാര്യങ്ങളും അവർ ചെയ്തു. കരൾ ദാതാവിനെ കണ്ടെത്താനുള്ള ശ്രമത്തിലാണ് ഇപ്പോൾ ബന്ധുക്കളും സുഹൃത്തുക്കളും. നിലവിൽ ബാലയുടെ ആരോഗ്യ സ്ഥിതിയിയിൽ ആശങ്കപ്പെടേണ്ടെന്ന് ആശുപത്രി അധികൃതർ വ്യക്തമാക്കി.
