ട്രെയിൻ എത്തുന്ന സമയത്ത് സ്റ്റേഷനിലെത്താനായില്ല; വ്യാജ ബോംബ് ഭീഷണി ഉയർത്തിയത് അടുത്ത സ്റ്റേഷനിൽ എത്തി തീവണ്ടിയിൽ കയറാൻ; അതിബുദ്ധി വില്ലനായപ്പോൾ പഞ്ചാബുകാരൻ ഷൊർണ്ണൂരിൽ പിടിയിലായി; രാജധാനി എക്സ്‌പ്രസിൽ കയറാൻ കുബുദ്ധി കാട്ടിയത് ജയ്സിങ് റാത്തർ
പാലക്കാട്: സ്റ്റേഷൻ വിട്ട ട്രെയിനിൽ കയറാൻ യാത്രക്കാരൻ ഉയർത്തിയത് ബോംബ് ഭീഷണി. രാജധാനി എക്സ്‌പ്രസ്സിൽ കയറാനാണ് യാത്രക്കാരൻ വ്യാജ ബോംബ് ഭീഷണി മുഴക്കിയത്. ഇതേ തുടർന്ന് പഞ്ചാബ് സ്വദേശി ജയ്സിങ് റാത്തർ തൃശ്ശൂരിൽ അറസ്റ്റിലായി.
എറണാകുളത്ത് നിന്നും ട്രെയിൻ പുറപ്പെട്ടപ്പോഴാണ് സംഭവം. ട്രെയിനിൽ കയറാൻ കഴിയാതെ വന്ന യാത്രക്കാരനാണ് ഭീഷണി മുഴക്കിയത്. ഭീഷണിയെ തുടർന്ന് ഷൊർണൂരിൽ ട്രെയിൻ നിർത്തിയിട്ടു. ഭീഷണി മുഴക്കിയ യാത്രക്കാരൻ ഷൊർണൂരിലേക്ക് പുറപ്പെട്ടു. ഷൊർണൂരിൽ ബോംബ് സ്‌ക്വാഡ് പരിശോധന നടത്തുന്നതിനിടെ യാത്രക്കാരൻ ട്രെയിനിൽ കയറി. ആരാണ് ഭീഷണിക്ക് പിന്നിലെന്ന് അന്വേഷിച്ച പൊലീസ് പ്രതിയെ തിരിച്ചറിഞ്ഞു. ഇതോടെ ഇയാൾ പിടിയിലായി.
എറണാകുളത്ത് നിന്ന് യാത്രക്കായി ജയ്സിങ് ടിക്കറ്റ് ബുക്ക് ചെയ്തിരുന്നു. ഇന്നലെ അർധരാത്രിയോടെയാണ് സംഭവം. തിരുവനന്തപുരത്ത് നിന്ന് പുറപ്പെട്ട ട്രെയിൻ 11.30 യ്ക്ക് എറണാകുളത്ത് എത്തി. ജയ്സിംഗിന് ഈ സമയത്ത് സ്റ്റേഷനിൽ എത്താനായില്ല. ഇതോടെയാണ് ഇദ്ദേഹം ട്രെയിനിന് ബോംബ് ഭീഷണിയുണ്ടെന്ന് വിളിച്ച് പറഞ്ഞത്. പരിശോധനയ്ക്കായി ട്രെയിൻ പിടിച്ചിട്ടാൽ അതുവരെ യാത്ര ചെയ്ത് ട്രെയിനിൽ കയറാനായിരുന്നു പദ്ധതി. എന്നാൽ അന്വേഷണം ഇത് പൊളിച്ചു.
ട്രെയിൻ തൃശ്ശൂരിൽ പിടിച്ചിടുമെന്നാണ് ജയ്സിങ് കരുതിയത്. എന്നാൽ പിടിച്ചിട്ടത് ഷൊർണൂരിലായിരുന്നു. ഇതോടെ ഷൊർണൂർ വരെ ജയ്സിങ് യാത്ര ചെയ്തു. ഈ സമയത്ത് ആരാണ് ബോംബ് ഭീഷണിക്ക് പിന്നിലെന്ന് പൊലീസും ആർപിഎഫും പരിശോധിക്കുന്നുണ്ടായിരുന്നു. പ്രതിയെ തിരിച്ചറിഞ്ഞ അന്വേഷണ സംഘം രാത്രി തന്നെ ഇയാളെ അറസ്റ്റ് ചെയ്തു.
