അഞ്ചു വർഷം മുൻപു കുറിപ്പിൽ മാലിന്യം കൈ വിട്ടുപോകുന്ന പ്രശ്‌നമാകുമെന്നു ആശങ്ക പ്രകടിപ്പിച്ചു; അത് എന്റെ മാത്രം ആശങ്കയായിരുന്നില്ല; ആ കത്തു ഞാൻ മുഖ്യമന്ത്രിക്കും നൽകി; എന്റെ അമ്മയെപ്പോലെ എത്രയോ അമ്മമാർ പുകയുന്ന കൊച്ചിയിലെ വീടുകളിലുണ്ട്; ബ്രഹ്‌മപുരത്തെ കത്തലിൽ വേദനയും ആശങ്കയും പങ്കുവച്ച് മോഹൻലാൽ
കൊച്ചി: എന്റെ അമ്മയെപ്പോലെ എത്രയോ അമ്മമാർ പുകയുന്ന കൊച്ചിയിലെ വീടുകളിലുണ്ട് എന്നതാണു ഏറെ ദിവസമായി എന്റെ ഏറ്റവും വലിയ വേദനയെന്നു മോഹൻലാൽ. പൊഖറാനിൽ ഇന്ത്യാ-പാക് അതിർത്തിയിലാണ് ലാലുള്ളത്. ഷൂട്ടിങ് തിരിക്ക്. ഇതിനിടെയിലും അമ്മയെ ബന്ധപ്പെടുന്നു. പക്ഷേ ആശങ്കയ്ക്ക് കുറവില്ല. ബ്ലോഗ് എഴുതുമ്പോൾ ഈ പ്രശ്‌നം മോഹൻലാൽ ഉയർത്തിയതാണ്. മുഖ്യമന്ത്രിക്ക് കത്ത് പോലും എഴുതി. എന്നാൽ ഇതിനെല്ലാം പിന്നിൽ ചിലർ രാഷ്ട്രീയം ആരോപിച്ചു. ഇതോടെ സൂപ്പർതാരം മൗനത്തിലായി. ഇപ്പോൾ ബ്രഹ്‌മപുരം കത്തുകയാണ്. മാലിന്യമലയിലെ തീ എന്ന് അണയുമെന്ന് ആർക്കും റിയില്ല.
പുകയുന്ന ഈ കൊച്ചിയിൽ ആയിരക്കണക്കിനു അമ്മമാരും മുതിർന്ന ആളുകളും ജനിച്ചു വീണ കുട്ടികളും വിങ്ങി വിങ്ങി കഴിയുന്നു എന്നതു പേടിപ്പെടുത്തുന്ന സത്യമാണെന്നും ലാൽ പറയുന്നു. ഇവരുടെയൊക്കെ ശ്വാസകോശങ്ങളിലെത്തുന്ന പുക രോഗങ്ങളിലേക്കാണവരെ കൊണ്ടുപോകുന്നത്. ജീവിതം മുഴുവൻ അവരിതു അനുഭവിക്കേണ്ടി വന്നേക്കാം. ഇതു പ്രകൃതി ദുരന്തമോ കാലാവസ്ഥാ വ്യതിയാനമോ അല്ല. മനുഷ്യനുണ്ടാക്കിയ ദുരന്തമാണ്. ഞാൻ പൊഖറാനിൽ ഷൂട്ടിങ്ങിലാണ്. പലരും പറഞ്ഞു ലാൽ രക്ഷപ്പെട്ടുവെന്ന്.ആരും സ്ഥിരമായി അന്യ നാട്ടിൽ താമസിക്കില്ലല്ലോ. അതുകൊണ്ടുതന്നെ താൽക്കാകമായി നാടുവിട്ട ആരും രക്ഷപ്പെടുന്നില്ല.അവരേയും ഇതെല്ലാം നാളെമോ മറ്റന്നാളോ കാത്തിരിക്കുന്നുണ്ടെന്നും നടൻ പറയുന്നു.
തിരുവനന്തപുരത്തായിരുന്നു ലാൽ ജനിച്ചു വളർന്നത്. അച്ഛനും അമ്മയും തിരുവനന്തപുരത്തായിരുന്നു. അച്ഛന്റെ മരണ ശേഷവും അമ്മ മുടവന്മുകളിൽ തുടർന്നു. പിന്നീട് ആരോഗ്യ പ്രശ്‌നങ്ങൾ കാരണം അമ്മയുടെ ചികിൽസ കൊച്ചിയിലായി. മോഹൻലാലും കൊച്ചിയിൽ സ്ഥിര തമാസക്കാരനായി. ചെന്നൈയിലും വീടുണ്ട്. എന്നാലും കൂടുതലും അമ്മയ്‌ക്കൊപ്പം കൊച്ചിയിൽ. ഇപ്പോൾ ലിജോ പല്ലിശേരിയുടെ മലൈക്കോടയിലെ വാലിബൻ എന്ന സിനിമയുടെ ഷൂട്ടിംഗിലാണ്. ഇതിനിടെയാണ് ബ്രഹ്‌മപുരത്തെ ദുരന്തമെത്തുന്നത്. പണ്ടെഴുതിയ കത്തിനെ കുറിച്ചും മോഹൻലാൽ ഇപ്പോൾ പൊതു സമൂഹത്തെ ഓർമ്മിപ്പിക്കുന്നുണ്ട്.
മോഹൻലാലിന്റെ പഴയ വീഡിയോ ചുവടെ
ഇത് ആരുടെ വീഴ്ചായാണെന്നു തർക്കിക്കുമ്പോൾ ഇതിനുള്ള അടിയന്തര പരിഹാരം ചർച്ച ചെയ്യാതെ പോകുന്നു. എത്ര അലക്ഷ്യമായാണു നാം ഇതു കൈകാര്യം ചെയ്‌തെന്നു തിരിച്ചറിയുന്നത് ഇപ്പോഴാണ്.ഈ പുക കൊച്ചിയിൽ മാത്രം നിൽക്കുമെന്നു കരുതരുത്. അതു ലോകത്തിന്റെ പല ഭാഗത്തും പല തരത്തിൽ എത്തുന്നുണ്ട്. ടൂറിസം, ഹോട്ടൽ തുടങ്ങിയ വ്യവസായങ്ങളിലെല്ലാം ഇതിന്റെ പുക ബാക്കി നിൽക്കും. കൊച്ചിപോലെ വൃത്തികേടായി മാലിന്യം കൈകാര്യം ചെയ്യുന്ന ഏതെങ്കിലും നഗരമുണ്ടാകുമോ. 5 വർഷം മുൻപു ഞാനൊരു കുറിപ്പിൽ മാലിന്യം കൈ വിട്ടുപോകുന്ന പ്രശ്‌നമാകുമെന്നു ആശങ്ക പ്രകടിപ്പിച്ചിരുന്നു. അത് എന്റെ മാത്രം ആശങ്കയായിരുന്നില്ല. ആയിരക്കണക്കിനാളുകളുടെ ആശങ്കയായിരുന്നു. ആ കത്തു ഞാൻ മുഖ്യമന്ത്രിക്കും നൽകിയിരുന്നു-മോഹൻലാൽ പറയുന്നു.
ആളുകൾ മാലിന്യം കവറിലാക്കി വലിച്ചെറിയുന്നതുകൊണ്ടാണ് ഈ അവസ്ഥ വന്നതെന്നു പറയുന്നതു കേട്ടു. കൃത്യമായൊരു സംവിധാനം ഉണ്ടായാൽ ആരും മാലിന്യം കവറിലാക്കി കളയില്ല. അത്തരമൊരു സംവിധാനം നമുക്കില്ല എന്നതാണു പ്രധാന കാരണം.സംസ്‌കരിക്കാൻ മികച്ച സംവിധാനമുണ്ടായാൽ ജനം സ്വയം അത്തരം സംസ്‌കാരം പിൻതുടരും. പരസ്പരം കുറ്റം പറയുന്നതിനു പകരം നാം ചെയ്യേണ്ടത് എന്തു ചെയ്യുമെന്നും എപ്പോൾ നാം സംസ്‌കരണത്തിനു സജ്ജമാകുമെന്നാണെന്നാണ് നടൻ പറയുന്നു.
തിരുവനന്തപുരത്തെ മാലിന്യ സംസ്‌കരണ ചർച്ചയ്ക്കു വേണ്ടി 5 യോഗത്തിൽ ഞാൻ പങ്കെടുത്തു. എല്ലാ യോഗത്തിലും പറയുന്നത് ഒരേ കാര്യമായതോടെ ഞാനിനി വരുന്നില്ലെന്നു പറഞ്ഞു. ചർച്ച ചെയ്യുന്നതുകൊണ്ടു മാത്രം ഒന്നും നടക്കില്ല. നടപടി വേണം. മോഹൻലാൽ പറഞ്ഞു. കൊച്ചിയിലെ പുക അടങ്ങുമായിരിക്കും. എന്നാൽ ഇനിയും ഇത്തരം ദുരന്തം ഉണ്ടാകില്ലെന്നു പറയാനാകില്ല. കനൽ എവിടെയോ ബാക്കി കിടക്കുന്നുണ്ട്-ഓർമ്മിപ്പിക്കുകയാണ് മോഹൻലാൽ.
