കണ്ണൂർ: ശ്വാസകോശത്തിലെ അണുബാധയിൽ നിന്നും മുക്തി നേടിയതോടെ മുത്തപ്പന് വഴിപാടായി നേർന്ന വെള്ളാട്ടം നടത്താൻ പോർച്ചുഗലിലെ അവെറോ സ്വദേശി ജോസ് ഫിലിപ്പ് പെരേര കണ്ണൂരിലെത്തി. രോഗബാധയിൽ നിന്നും മോചിതനായതോടെ ഡിസംബർ 19നാണ് ഭാര്യ മദീന സിഗൻഷിനയ്‌ക്കൊപ്പം അറുപതുകാരനായ ഫിലിപ്പ് കേരളത്തിൽ എത്തിയത്.. തുടർന്ന് ജനുവരി എട്ടിന് വടുകുന്ദ ശിവക്ഷേത്രത്തിന് സമീപമുള്ള വേങ്ങരയിൽ സന്തോഷിന്റെ വീട്ടിൽ വെള്ളാട്ടം നടത്തുകയായിരുന്നു.

വഴിപാട് നടത്തിയതിന്റെ സന്തോഷത്തിലാണ് ഫിലിപ്പ്. വടക്കൻ കേരളത്തിൽ അഭ്യസിക്കുന്ന ആചാരപരമായ തെയ്യങ്ങളെക്കുറിച്ചുള്ള ഗവേഷണത്തിനായി 2019 ഡിസംബറിൽ കേരളം സന്ദർശിച്ചപ്പോഴാണ് ഫിലിപ്പിന് അണുബാധയുണ്ടായത്. പ്രായം കൂടിയതിനാൽ ചികിത്സിച്ച് ഭേദമാക്കുക വളരെ ബുദ്ധിമുട്ടായിരുന്നു.

അപ്പോഴാണ് ടൂർ ഓപ്പറേറ്ററും ഫിലിപ്പിന്റെ ദീർഘകാല സുഹൃത്തുമായ സന്തോഷ് വെള്ളാട്ടം നടത്താനുള്ള ആശയം നിർദ്ദേശിച്ചത്. ഒരു അവിശ്വാസിയാണെങ്കിലും തന്റെ അടുത്ത സന്ദർശനത്തിൽ വെള്ളാട്ടം നടത്താമെന്ന് ഫിലിപ്പ് പറഞ്ഞു. തുടർന്ന് പോർച്ചുഗലിലേക്ക് മടങ്ങി.ഫിലിപ്പ് ക്രമേണ സുഖം പ്രാപിച്ചു. ഇതോടെയാണ് വഴിപാട് നടത്താൻ ഫിലിപ്പും ഭാര്യയും കേരളത്തിൽ വീണ്ടും എത്തിയത്.

'ഞാൻ മതവിശ്വാസിയല്ലെങ്കിലും എന്റെ വഴിപാട് നിറവേറ്റിയതിൽ സന്തോഷമുണ്ട്.' ഫിലിപ്പ് പറഞ്ഞു.തെയ്യം പ്രേമികളായ ഫിലിപ്പും മദീനയും നൃത്തരൂപങ്ങളെക്കുറിച്ച് വളരെ ആഴത്തിൽ ഗവേഷണം നടത്തിയിട്ടുണ്ട്. 10 വർഷം മുമ്പ് നടത്തിയ ഒരു ഇന്ത്യാ സന്ദർശനത്തിലാണ് ഇവർ ഗവേഷണം ആരംഭിച്ചത്.

തുടർന്ന് തെക്കൻ മലബാറിന്റെ തനത് ആചാരം ആസ്വദിക്കാൻ ദമ്പതികളെ സന്തോഷ് കണ്ണൂരിലെത്തിക്കുകയായിരുന്നു. തെയ്യം കാലത്ത് ഇത് ആറാം തവണയാണ് ദമ്പതികൾ കണ്ണൂരിൽ എത്തുന്നത്.

'കോവിഡ് നിയന്ത്രണങ്ങൾ കാരണം അവർക്ക് രണ്ട് തെയ്യം സീസണുകൾ നഷ്ടമായി. അവർ മടങ്ങിവരാൻ താൽപ്പര്യപ്പെട്ടിരിക്കുകയായിരുന്നു, വീണ്ടും തെയ്യം കാണാൻ കഴിഞ്ഞതിനാൽ അവർ വളരെ സന്തേഷത്തിലാണ്. 10 വർഷമായി അവർക്ക് എല്ലാ പിന്തുണയും നൽകുന്നുണ്ട്.'സന്തോഷ് പറഞ്ഞു.

ആധുനിക ചുറ്റുപാടുകൾക്ക് പകരം പവിത്രമായ തോപ്പുകളാൽ ചുറ്റപ്പെട്ട പരമ്പരാഗത രീതിയിൽ വേണം തെയ്യങ്ങൾ നടത്തേണ്ടതെന്ന് ഫിലിപ്പ് അഭിപ്രായപ്പെട്ടു. കേരളത്തിലെ തെയ്യങ്ങളെക്കുറിച്ചുള്ള ഗവേഷണ പ്രവർത്തനങ്ങളിൽ നിന്ന് ഇടവേളയെടുത്ത് ഗോവയിലേക്ക് പോകുമ്പോൾ ജോസ് ഫിലിപ്പ് പെരേര സംതൃപ്തനാണ്.

ബുധനാഴ്ച രാത്രിയാണ് ഫിലിപ്പും മദീനയും ഗോവയിലേക്ക് പോയത്. ജനുവരി 31 ന് പോർച്ചുഗലിലേക്ക് മടങ്ങുന്നതിന് മുമ്പ് വീണ്ടും തെയ്യം കാണുന്നതിനായി അവർ കണ്ണൂരിലേക്ക് തിരിച്ച് വരും.

മറുനാടന്‍ മലയാളി

    മറുനാടന്‍ മലയാളി ബ്യൂറോ