'ഇന്ത്യൻ സർക്കാരിൽനിന്നു പിന്തുണയില്ല; അഫ്ഗാനിസ്ഥാനിൽ നിയമാനുസൃതമായി പ്രവർത്തിക്കുന്ന സർക്കാരിന്റെ അഭാവം; ജീവനക്കാരുടെ നിരാശ'; ന്യൂഡൽഹിയിലെ എംബസി പൂട്ടി അഫ്ഗാനിസ്ഥാൻ

ന്യൂഡൽഹി: ഇന്ത്യയിലെ അഫ്ഗാനിസ്ഥാൻ എംബസി പ്രവർത്തനം അവസാനിപ്പിച്ചു. ഇന്ത്യൻ സർക്കാരിൽനിന്നു പിന്തുണ ലഭിക്കാത്തതിനാലാണ് എംബസിയുടെ പ്രവർത്തനം ഞായറാഴ്ച മുതൽ നിർത്തുന്നതെന്ന് അധികൃതർ അറിയിച്ചു. അഫ്ഗാന്റെ പ്രതീക്ഷകൾ കൈവരിക്കാൻ സാധിക്കുന്നില്ലെന്നും ജീവനക്കാരുടെ കുറവുണ്ടെന്നും ഔദ്യോഗിക പത്ര പ്രസ്താവനയിലൂടെ അഫ്ഗാനിസ്ഥാൻ എംബസി അറിയിച്ചു.

ഇന്ത്യൻ സർക്കാറിന്റെ ഭാഗത്ത് നിന്നുള്ള നിസ്സഹരകരണം, അഫ്ഗാനിസ്ഥാന്റെ താൽപര്യങ്ങൾ നിറവേറ്റുന്നതിൽ പരാജയം, ഉദ്യോഗസ്ഥരുടെയും വിഭവങ്ങളുടെയും കുറവ്, ജീവനക്കാരുടെ അതൃപ്തി തുടങ്ങിയ കാരണങ്ങളാലാണ് ഇന്ത്യയിലെ പ്രവർത്തനം അവസാനിപ്പിക്കുന്നതെന്നാണ് കുറിപ്പിൽ വ്യക്തമാക്കുന്നത്.

''ഇന്ത്യയുമായി ദീർഘനാളത്തെ ബന്ധമാണുള്ളത്. വളരെ ആലോചിച്ചാണ് പ്രയാസകരമായ തീരുമാനത്തിലെത്തിയത്. ന്യൂഡൽഹിയിലെ എംബസി പ്രവർത്തനം നിർത്തുന്നുവെന്ന് വളരെ വേദനയോടെയും ദുഃഖത്തോടെയുമാണ് അറിയിക്കുന്നത്. ഇന്ത്യൻ സർക്കാരിന്റെ പിന്തുണ ഇല്ലാത്തതിനാൽ അഫ്ഗാൻ ജനതയുടെ താൽപര്യങ്ങൾ നേടുന്നതിനോ സംരക്ഷിക്കുന്നതിനോ സാധിക്കുന്നില്ല. അഫ്ഗാനിസ്ഥാനിൽ നിയമാനുസൃതമായ സർക്കാർ ഇല്ലാത്തതും പ്രവർത്തനത്തെ ബാധിക്കുന്നു. നയതന്ത്ര പ്രതിനിധികളുടെ വീസ സമയബന്ധിതമായി പുതുക്കാത്തതും ജീവനക്കാരുടെ നിരാശയും ദൈനംദിന പ്രവർത്തനം മുന്നോട്ടുകൊണ്ടുപോകാൻ കഴിയാത്ത സ്ഥിതിയിലെത്തിച്ചു.'' കുറിപ്പിൽ പറയുന്നു

ഫരീദ് മമുംദ്‌സെയുടെ നേതൃത്വത്തിലാണ് ന്യൂഡൽഹിയിൽ അഫ്ഗാൻ എംബസി പ്രവർത്തിച്ചിരുന്നത്. അഷ്‌റഫ് ഗനി സർക്കാർ നിയമിച്ച മമുംദ്‌സെ, 2021ൽ അഫ്ഗാൻ ഭരണം താലിബാൻ പിടിച്ചെടുത്ത ശേഷവും തുടരുകയായിരുന്നു. നയതന്ത്ര പ്രതിനിധിയുടെ ചുമതല താലിബാൻ തന്നെയാണ് ഏൽപ്പിച്ചിരിക്കുന്നതെന്ന് അറിയിച്ച് ഇന്ത്യയിലെ അഫ്ഗാൻ ട്രേഡ് കൗൺസിലർ ഖാദിർ ഷാ കേന്ദ്രസർക്കാരിന് കത്ത് നൽകിയിരുന്നു. ഇതിനു പിന്നാലെയാണ് എംബസിയുടെ പ്രവർത്തനം മന്ദഗതിയിലായത്.

2023 ഒക്ടോബർ 1 മുതൽ പ്രവർത്തനം അവസാനിപ്പിക്കാനുള്ള തീരുമാനം പ്രഖ്യാപിക്കുന്നതിൽ ഖേദിക്കുന്നതായി ന്യൂഡൽഹിയിലെ അഫ്ഗാനിസ്ഥാൻ എംബസി പ്രസ്താവനയിൽ പറഞ്ഞു. 'അഗാധമായ സങ്കടത്തോടും ഖേദത്തോടും നിരാശയോടും കൂടിയാണ് ന്യൂഡൽഹിയിലെ അഫ്ഗാനിസ്ഥാൻ എംബസി പ്രവർത്തനം നിർത്താനുള്ള ഈ തീരുമാനം പ്രഖ്യാപിക്കുന്നത്,' പ്രസ്താവനയിൽ പറയുന്നു.

അഫ്ഗാനിസ്ഥാനും ഇന്ത്യയും തമ്മിലുള്ള ചരിത്രപരമായ ബന്ധവും ദീർഘകാല പങ്കാളിത്തവും കണക്കിലെടുത്ത്, വളരെ ഖേദകരമാണെങ്കിലും ഈ തീരുമാനം എടുക്കേണ്ടി വന്നുവെന്നും എംബസി അറിയിച്ചു. 'ആതിഥേയ സർക്കാരിൽ നിന്നുള്ള പിന്തുണയുടെ അഭാവം' എന്ന കാര്യമാണ് അഫ്ഗാനിസ്ഥാൻ സർക്കാർ പ്രധാനമായും ഉയർത്തിക്കാണിക്കുന്നത്. ആതിഥേയ ഗവൺമെന്റിൽ നിന്ന് നിർണായകമായ പിന്തുണയുടെ അഭാവം അനുഭവപ്പെട്ടുവെന്നാണ് ആരോപണം. ഇത് ചുമതലകൾ ഫലപ്രദമായി നിർവഹിക്കാനുള്ള കഴിവിനെ തടസ്സപ്പെടുത്തിയെന്ന് അഫ്ഗസ്സ്ഥാൻ എംബസി പറഞ്ഞു.

'ഇന്ത്യയിലെ നയതന്ത്ര പിന്തുണയുടെ അഭാവവും കാബൂളിൽ നിയമാനുസൃതമായി പ്രവർത്തിക്കുന്ന സർക്കാരിന്റെ അഭാവവും കാരണം അഫ്ഗാനിസ്ഥാന്റെയും പൗരന്മാരുടെയും മികച്ച താൽപ്പര്യങ്ങൾ നിറവേറ്റുന്നതിലുള്ള ഞങ്ങളുടെ പോരായ്മകൾ ഞങ്ങൾ അംഗീകരിക്കുന്നു,' പ്രസ്താവനയിൽ പറയുന്നു. മുൻകൂട്ടിക്കാണാത്തതും നിർഭാഗ്യകരവുമായ സാഹചര്യങ്ങൾ കാരണം, അതിന് ലഭ്യമായ ഉദ്യോഗസ്ഥരിലും വിഭവങ്ങളിലും ഗണ്യമായ കുറവുണ്ടായിട്ടുണ്ടെന്നും, ഇത് പ്രവർത്തനം തുടരുന്നത് കൂടുതൽ വെല്ലുവിളിയാക്കിയെന്നും എംബസി വ്യക്തമാക്കുന്നു.

നയതന്ത്രജ്ഞർക്ക് മറ്റ് നിർണായക സഹകരണ മേഖലകളിലേക്കുള്ള വിസ പുതുക്കുന്നതിൽ നിന്ന് സമയബന്ധിതവും മതിയായതുമായ പിന്തുണ ലഭിക്കാത്തത് ഞങ്ങളുടെ ടീമിനെ നിരാശയിലേക്ക് നയിക്കുകയും പതിവ് ചുമതലകൾ ഫലപ്രദമായി നിർവഹിക്കാനുള്ള ഞങ്ങളുടെ കഴിവിനെ തടസ്സപ്പെടുത്തുകയും ചെയ്തു. ഈ സാഹചര്യങ്ങൾ കണക്കിലെടുത്ത് മിഷന്റെ കസ്റ്റഡി അധികാരം ആതിഥേയ രാജ്യത്തേക്ക് കൈമാറുന്നത് വരെ അഫ്ഗാൻ പൗരന്മാർക്കുള്ള അടിയന്തര കോൺസുലാർ സേവനങ്ങൾ ഒഴികെ മിഷന്റെ എല്ലാ പ്രവർത്തനങ്ങളും അവസാനിപ്പിക്കാനുള്ള പ്രയാസകരമായ തീരുമാനമെടുത്തതിൽ ഖേദമുണ്ടെന്നും എംബസി പറഞ്ഞു.

2020 മുതൽ എംബസിയിൽ ട്രേഡ് കൗൺസിലറായി ജോലി ചെയ്യുന്ന ഖാദിർ ഷാ, തന്നെ താലിബാൻ എംബസിയിലെ ചാർജ് ഡി അഫയറായി നിയമിച്ചതായി അവകാശപ്പെട്ട് ഏപ്രിൽ അവസാനം ഇന്ത്യൻ വിദേശ കാര്യ മന്ത്രാലയത്തിൽ കത്തെഴുതിയതിനെ തുടർന്നാണ് അധികാരത്തിനായുള്ള തർക്കം പൊട്ടിപ്പുറപ്പെട്ടത്. അതേസമയം, എംബസി പ്രവർത്തനം അവസാനിപ്പിക്കുന്നത് സംബന്ധിച്ച കുറിപ്പ് ലഭിച്ച സാഹചര്യത്തിൽ അതിന്റെ ആധികാരികത പരിശോധിക്കുകയാണെന്നാണ് കേന്ദ്ര സർക്കാർ അറിയിച്ചത്. കഴിഞ്ഞ കുറേ മാസങ്ങളായി അഫ്ഗാനിസ്ഥാൻ അംബാസഡർ ഇന്ത്യക്ക് പുറത്താണ്. ലഭിച്ച കുറിപ്പിന്റെ ആധികാരികതയും അതിലെ ഉള്ളടക്കങ്ങളും പരിശോധിച്ചുവരികയാണെന്ന് സർക്കാർ വൃത്തങ്ങൾ അറിയിച്ചു.

അഫ്ഗാനിലെ താലിബാൻ സർക്കാരിനെ അംഗീകരിക്കാൻ ഇന്ത്യ തയാറായിട്ടില്ല. എല്ലാവരെയും പ്രതിനിധീകരിക്കുന്ന സർക്കാർ രൂപവൽകരിക്കണമെന്നും അഫ്ഗാൻ മണ്ണ് ഭീകരരുടെ താവളമാകരുതെന്നുമാണ് ഇന്ത്യയുടെ ആവശ്യം.