വളാഞ്ചേരി: കാടാമ്പുഴ ക്ഷേത്രത്തിൽ ദ്രവ്യകലശത്തിന്റെ ആദ്യ ചടങ്ങായ ആചാര്യവരണം നടന്നു. കൂറയും പവിത്രവും നൽകി ആചാര്യനെ വന്ദിച്ചു. എക്‌സിക്യുട്ടീവ് ഓഫീസർ എ.എസ്. അജയകുമാർ പാരമ്പര്യട്രസ്റ്റി ഡോ. എം വി രാമചന്ദ്ര വാരിയർ മുഖേന കൂറയും പവിത്രവും തന്ത്രി അണ്ടലാടി ദിവാകരൻ നമ്പൂതിരിപ്പാടിനുവേണ്ടി പരമേശ്വരൻ നമ്പൂതിരിപ്പാടിന് കൈമാറി. ഉണ്ണി നമ്പൂതിരിപ്പാട് ചടങ്ങിൽ സംബന്ധിച്ചു. തുടർന്ന് നവധാന്യങ്ങൾ മുളയറയിൽ മുളയിട്ടശേഷം ശുദ്ധിക്രിയകൾ ആരംഭിച്ചു.
പ്രാസാദശുദ്ധി, അസ്ത്രകലശം, രക്ഷോഘ്‌ന ഹവനം, വാസ്തുഹോമം, വാസ്തുകലശം, വാസ്തുബലി, പുണ്യാഹം എന്നീ ശുദ്ധിക്രിയകളാണ് നടന്നത്. അത്താഴപൂജയോടെ ആദ്യദിവസത്തെ ചടങ്ങുകൾ അവസാനിച്ചു.
കുഞ്ഞൻ നമ്പൂതിരിപ്പാട്, വിഷ്ണു നമ്പൂതിരിപ്പാട്, കുട്ടൻ നമ്പൂതിരിപ്പാട്, മുണ്ടനാട് ശങ്കരൻ നമ്പൂതിരിപ്പാട്, പാവുട്ടി പരമേശ്വരൻ നമ്പൂതിരിപ്പാട് തുടങ്ങിയ വേദജ്ഞർ പങ്കെടുക്കും. ദിവസവും രാവിലെ അഞ്ചിന് തുടങ്ങി 11-വരെയും വൈകീട്ട് മൂന്നരയ്ക്ക് പുനരാംഭിച്ച് ആറുവരെയും ചടങ്ങുണ്ടാകും. ബ്രഹ്മകലശത്തോടെ എട്ടിന് സമാപിക്കും.
