കഠിനമായ ചൂടിൽ കെട്ടിടത്തിന്റെ കോൺക്രീറ്റ് മേൽക്കൂര വിണ്ടു കീറുകയും കമ്പികൾ പുറത്തു വരികയും ചെയ്തു; അഗ്‌നിരക്ഷാ ഉപകരണങ്ങൾ ഇല്ലാതിരുന്നത് തീ പടരുന്നതിനും കാരണമായി; വെമ്പായത്ത് കത്തിയെരിഞ്ഞത് ഒരു പ്രവാസിയുടെ ദീർഘകാല സ്വപ്‌നം; 10 കോടിയുടെ നഷ്ടത്തിനൊപ്പം വിലമതിക്കാനാകാത്ത ഒരു ജീവനും
വെമ്പായം: ഒരു അറ്റകുറ്റപ്പണിക്ക് പോലും ഇടനൽകാതെ വെമ്പായത്ത് അഗ്നിനാളകൾ വിഴുങ്ങിയത് ഒരു പ്രവാസിയുടെ ദീർഘകാല സ്വപ്‌നവും ഒപ്പം വിലപ്പെട്ട ഒരു ജീവനും. വെമ്പായത്തെ ഹൈപ്പർ മാർക്കറ്റിലുണ്ടായ തീപിടിത്തത്തിൽ അഞ്ചുനിലക്കെട്ടിടം പൂർണമായും നശിച്ച നിലയിലായി. വെമ്പായം എഎൻ ഹൈപ്പർ മാർക്കറ്റിൽ ശനി രാത്രി 8ന് ഉണ്ടായ തീപിടിത്തം പുലർച്ചെ രണ്ടു വരെ ശ്രമിച്ചതിനു ശേഷമാണ് നിയന്ത്രണവിധേയമായത്.
കന്യാകുളങ്ങര സ്വദേശി നിസാറുദ്ദീൻ കോവിഡ്കാലത്തെ പ്രതിസന്ധിയിലും പിടിച്ചു നിന്നത് നാട്ടിൽ ഒരു സ്ഥാപനം തുടങ്ങണമെന്നും നാട്ടുകാർക്ക് ജോലി നൽകണമെന്നുമുള്ള അടങ്ങാത്ത ആഗ്രഹമാണ്. തുടർന്ന് വെമ്പായം കേന്ദ്രമാക്കി എഎൻ ഹൈപ്പർമാർക്കറ്റ് 3 മാസം മുൻപ് ആരംഭിക്കുകയായിരുന്നു.വിവിധ സ്ഥലങ്ങളിൽ നിന്നും വായ്പകൾ തരപ്പെടുത്തിയും കയ്യിലുള്ള സമ്പാദ്യം ഉപയോഗിച്ചുമായിരുന്നു സ്ഥാപനം യാഥാർത്ഥ്യമാക്കിയത്.
പെയിന്റ്, സാനിട്ടറി ഉപകരണങ്ങൾ തുടങ്ങി ഒരു വീടിന്റെ നിർമ്മാണത്തിനാവശ്യമായ എല്ലാ സാധനങ്ങളും ഇവിടെ സജീകരിച്ചായിരുന്നു കട പ്രവർത്തനം ആരംഭിച്ചത്.ശനി രാത്രി 5 മണിക്കൂർ കൊണ്ട് കത്തിയമർന്നത് ഒരു പ്രവാസിയുടെ എല്ലാ സമ്പാദ്യവുമായിരുന്നു. കോടികളുടെ നഷ്ടമുണ്ടാവുകയും ഒരാളുടെ ജീവൻ നഷ്ടപ്പെടുകയും ചെയ്ത സംഭവത്തിൽ കുടുംബത്തിന്റെ ഭീതി ഇനിയും മാറിയിട്ടില്ല.കടയിൽ കൂടുതലും വീട് നിർമ്മാണത്തിനാവശ്യമായ സാധനങ്ങളും പെയിന്റ്, വാർണിഷ്, ടിന്നർ, ടർപ്പന്റയിൻ തുടങ്ങിയവയുമായിരുന്നു.
ശനിയാഴ്ച വൈകിട്ട് കെട്ടിടത്തിന്റെ അടിയിലുള്ള നിലയിൽ വെൽഡിങ് ജോലികൾ നടന്നിരുന്നു. ഇതുകാരണം ചൂടുള്ള തീപ്പൊരികൾ വീണതോ വെൽഡിങ് നടക്കുന്നതിനിടയിൽ ഷോർട്ട് സർക്യൂട്ട് ഉണ്ടായി തീയുണ്ടായതോ ആകാമെന്നാണു സംശയിക്കുന്നതെന്നു അധികൃതർ പറയുന്നു. തീപിടിച്ചതിനെത്തുടർന്നുള്ള കഠിനമായ ചൂടിൽ കെട്ടിടത്തിന്റെ കോൺക്രീറ്റ് മേൽക്കൂര വിണ്ടു കീറുകയും കമ്പികൾ പുറത്തു വരികയും ചെയ്തിട്ടുണ്ട്.
തീജ്വാലകൾക്കു നടുവിൽ ഓടി രക്ഷപ്പെടാൻ പോലും കഴിയാതെ മരണത്തിനു കീഴടങ്ങുകയായിരുന്നു തൊഴിലാളിയായ നിസാമുദ്ദീൻ.ഹൈപ്പർ മാർക്കറ്റിൽ തീ പിടിക്കുമ്പോൾ കടയിലുണ്ടായിരുന്നവർ എല്ലാവരും പുറത്തെത്തിയിരുന്നുവെന്നാണ് ആദ്യം കരുതിയത്. എന്നാൽ നിസാമുദ്ദീനെ കാണാനുണ്ടായിരുന്നില്ല. അപ്പോഴേക്കും തീ കെട്ടിടത്തിൽ വ്യാപകമായി പടർന്നിരുന്നു. മൂന്നാം നിലയിൽ കുടുങ്ങിയ നിസാമുദ്ദീൻ കടുത്ത പുക ശ്വസിച്ച് ബോധം നഷ്ടപ്പെട്ടു വീണെന്നാണ് കരുതുന്നത്.
അറ്റകുറ്റപ്പണികൾ നടത്താൻ കഴിയാത്ത തരത്തിൽ കെട്ടിടത്തിനു നാശം സംഭവിച്ചിട്ടുണ്ടെന്നു വിദഗ്ദ്ധർ പറയുന്നു. അപകട സമയത്തു ഉപയോഗിക്കാനുള്ള അഗ്‌നിരക്ഷാ ഉപകരണങ്ങൾ ഇല്ലാതിരുന്നത് തീ പടരുന്നതിനു കാരണമായി.നിസാറുദ്ദീൻ വിദേശത്തായതിനാൽ ഭാര്യ ഹസീനയാണ് കടയുടെ മേൽനോട്ടം വഹിച്ചിരുന്നത്.
കടയിൽ സാധനങ്ങൾ മാത്രം 5 കോടി രൂപയോളം വില വരുമെന്നും ആകെ 10 കോടി രൂപയുടെ നഷ്ടം സംഭവിച്ചിട്ടുണ്ടാകാമെന്നുമാണു സ്ഥാപനവുമായി ബന്ധപ്പെട്ടവർ പറയുന്നത്.മന്ത്രി ജി.ആർ.അനിൽ, അടൂർ പ്രകാശ് എംപി, ഡി.കെ. മുരളി എംഎൽഎ തുടങ്ങി വിവിധ രാഷ്ട്രീയ നേതൃത്വം വീട്ടിലെത്തി കുടുംബത്തെ ആശ്വസിപ്പിച്ചു.
