കോട്ടയം: പൊൻകുന്നം ജുമാ മസ്ജിദിൽ പട്ടാപകൽ മോഷണം. പള്ളിയിലെ ചീഫ് ഇമാമിന്റെ മുറിയിൽ കയറിയ കള്ളൻ ഇമാമിന്റെ മൊബൈൽ ഫോൺ മോഷ്ടിച്ചു കടന്നു. പള്ളിയിലെ സിസിടിവി ക്യാമറയിൽ പതിഞ്ഞ ദൃശ്യങ്ങളിലെ ആളെ കേന്ദ്രീകരിച്ച് പൊലീസ് അന്വേഷണം തുടങ്ങി. മസ്ജിദിനോട് ചേർന്നുള്ള ഉസ്താദുമാരുടെ മുറിയിൽ നിന്നുമാണ് ഫോൺ മോഷണം പോയത്.
ഉസ്താദുമാർ പകൽ നമസ്ക്കാരത്തിന് പോയ സമയത്താണ് പ്രതി മുറിക്കുള്ളിൽ കടന്നത്. എല്ലാം മുറികളിലും കയറി ഇറങ്ങിയ ശേഷമാണ് ചീഫ് ഇമാമിന്റെ മുറിയിൽ കയറിയത്. മുറിയിലുണ്ടായിരുന്ന മൊബൈൽ ഫോൺ എടുത്ത ശേഷം വേഗത്തിൽ കടന്നു കളഞ്ഞു. പ്രതി കയറുന്നതും ഇറങ്ങുന്നതും സിസിടിവി ദൃശ്യങ്ങളിലുണ്ട്. ഈ ദൃശ്യങ്ങൾ കേന്ദ്രീകരിച്ചാണ് അന്വേഷണം. രണ്ട് വർഷം മുമ്പും പള്ളിയിൽ മോഷണം നടന്നിട്ടുണ്ട്. പ്രതിയെ പറ്റി പൊലീസിന് സൂചന കിട്ടിയിട്ടില്ല.