കുളനടയില്‍ അപകടമുണ്ടാക്കിയത് അശ്വതി രാഹുല്‍ അല്ല; ഇന്നലെ ആ വാര്‍ത്തയ്‌ക്കൊപ്പം പ്രചരിച്ചത് തെറ്റായ ചിത്രം; രജിതയും രാജും കാട്ടിയത് കൊടും ഗതാഗത ലംഘനം
നടിക്കുണ്ടായ ബുദ്ധിമുട്ടില്‍ ഖേദം പ്രകടിപ്പിക്കുന്നു.
തിരുവനന്തപുരം: സീരിയല്‍ നടി മദ്യലഹരിയില്‍ ഓടിച്ച കാര്‍ മറ്റ് രണ്ട് വാഹനങ്ങളില്‍ ഇടിച്ചു. അപകടത്തെ തുടര്‍ന്ന് എം.സി റോഡില്‍ ഒരു മണിക്കൂറോളം ഗതാഗതക്കുരുക്ക്-ഈ വാര്‍ത്തയ്‌ക്കൊപ്പം നടി അശ്വതി രാഹുലിന്റെ പടം തെറ്റായി നല്‍കിയതില്‍ മറുനാടന്‍ മലയാളി ഖേദം പ്രകടിപ്പിക്കുന്നു. മുഖ്യധാരാ ടിവി ചാനലുകള്‍ അടക്കം പലരും ഈ തെറ്റ് ചെയ്തിരുന്നു. ഇതില്‍ നിന്നാണ് മറുനാടന്‍ മലയാളിയിലും ഈ പടം നല്‍കാനിടയായ സാഹചര്യം. ഇതില്‍ നടിക്കുണ്ടായ ബുദ്ധിമുട്ടില്‍ ഖേദം പ്രകടിപ്പിക്കുന്നു.
ഇത്തരം പ്രചരണത്തിലെ വേദന അശ്വതിയും പങ്കുവച്ചിരുന്നു. എന്നാല്‍ തനിക്ക് ലൈസന്‌സോ, വണ്ടി ഓടിക്കാനോ അറിയില്ലെന്നും എന്റെ ദൈവമേ ഇത് എപ്പോള്‍ സംഭവിച്ചു എന്നുമാണ് അശ്വതി സോഷ്യല്‍ മീഡിയ വഴി പ്രതികരിച്ചത്. വാര്‍ത്ത പ്രചരിപ്പിച്ചവര്‍ക്ക് എതിരെ നടപടി സ്വീകരിക്കും എന്നും രാഹുല്‍ മറുപടി നല്‍കി. എന്നാല്‍ തെറ്റായ വാര്‍ത്തകള്‍ പ്രചരിപ്പിക്കരുത്. ഉറപ്പായും ഇതിന് എതിരെ നിയമ നടപടി സ്വീകരിക്കും- അശ്വതി പറഞ്ഞു.
യഥാര്‍ത്ഥ വാര്‍ത്ത ഇങ്ങനെ
വ്യാഴാഴ്ച വൈകുന്നേരം 6.ന് കുളനട ജംഗ്ഷന് സമീപമുള്ള പെട്രോള്‍ പമ്പിന്റെ മുന്‍വശത്ത് ആയിരുന്നു അപകടം. തിരുവനന്തപുരം വെഞ്ഞാറമൂട് സ്വദേശി രജിതയാണ് മദ്യപിച്ച് വാഹനമോടിച്ച് അപകടമുണ്ടാക്കിയത്. ഈ വാര്‍ത്തയ്‌ക്കൊപ്പമാണ് അശ്വതിയുടെ പടം തെറ്റായി വന്നത്.
മദ്യലഹരിയില്‍ വാഹനമോടിച്ച് കാര്‍ ഇടിച്ചു കയറ്റി മൈനാഗപ്പള്ളിയില്‍ സ്ത്രീയെ കൊലപ്പെടുത്തിയ സംഭവത്തിന്റെ നടുക്കം മാറിയിട്ടില്ല. ഇതിനിടെ വീണ്ടും മദ്യലഹരിയില്‍ വാഹനമോടിച്ച് അപകടം. വന്‍ അപകടം ഒഴിവായി. മൈനാഗപ്പള്ളിയില്‍ വനിതാ ഡോക്ടറാണ് വില്ലത്തിയായതെങ്കില്‍ സീരിയല്‍ നടിയാണ് വിവാദത്തില്‍ പെട്ടത്. മദ്യലഹരിയില്‍ സീരിയല്‍ നടി ഓടിച്ച കാര്‍ രണ്ട് വാഹനങ്ങളില്‍ ഇടിച്ച് അപകടം ഉണ്ടാക്കുകയായിരുന്നു. കാറിന് വേഗത കുറഞ്ഞതു കൊണ്ടാണ് വലിയ അപകടം ഒഴിവായി. അപകടത്തെ തുടര്‍ന്ന് എം.സി റോഡില്‍ ഒരു മണിക്കൂറോളം ഗതാഗതക്കുരുക്കം ഉണ്ടായി. വ്യാഴാഴ്ച വൈകുന്നേരം 6.ന് കുളനട ജംഗ്ഷന് സമീപമുള്ള പെട്രോള്‍ പമ്പിന്റെ മുന്‍വശത്ത് ആയിരുന്നു അപകടം. തിരുവനന്തപുരം വെഞ്ഞാറമൂട് സ്വദേശി രജിത(31) മദ്യപിച്ച് വാഹനമോടിച്ച് അപകടമുണ്ടാക്കിയത്.
നടി മദ്യപിച്ചിരുന്നതായി മെഡിക്കല്‍ പരിശോധനയില്‍ സ്ഥിരീകരിച്ചിട്ടുണ്ട്. ശേഷം നടിക്കെതിരെ പോലീസ് കേസെടുത്തു. റോഡരികില്‍ പാര്‍ക്ക് ചെയ്തിരുന്ന ഒരു കാറില്‍ ഇടിച്ച ശേഷം മറ്റൊരു മിനി ലോറിയില്‍ ഇടുകയായിരുന്നു. അപകടത്തില്‍ ആര്‍ക്കും പരുക്കില്ല. നടിക്കൊപ്പമുണ്ടായിരുന്ന സുഹൃത്ത് രാജു(49)തിരെയും പൊലീസ് കേസെടുത്തിട്ടുണ്ട്. അടൂര്‍ ഭാഗത്തേക്ക് പോവുകയായിരുന്ന ലോറിയിലും സൈഡില്‍ നിര്‍ത്തിയിട്ടിരിക്കുകയായിരുന്ന കാറിലുമായി നടി ഓടിച്ചിരുന്ന സ്വിഫ്റ്റ് ഡിസയര്‍ കാര്‍ ഇടിക്കുകയായിരുന്നു. ഇവര്‍ കാറിലിരുന്ന് മദ്യപിച്ചോ എന്ന് സംശയമുണ്ട്.