മൊബൈല്‍ ഫോണും താക്കോലും തോക്കാണെന്ന് തെറ്റിദ്ധരിച്ചു കറുത്ത വര്‍ഗക്കാരനെ വെടിവെച്ച് കൊലപ്പെടുത്തിയ മുന്‍ ഒഹായോ പോലീസ് ഉദ്യോഗസ്ഥന് 15 വര്‍ഷം തടവ്
കൊളംബസ്, ഒഹായോ: മൊബൈല്‍ ഫോണും താക്കോലും കൈവശം വെച്ചിരുന്ന കറുത്ത വര്‍ഗക്കാരനായ ആന്‍ഡ്രെ ഹില്ലിനെ വെടിവെച്ച് കൊലപ്പെടുത്തിയ കേസില്‍ മുന്‍ ഒഹായോ പോലീസ് ഉദ്യോഗസ്ഥന് ആദം കോയിക്ക് 15 വര്‍ഷം ജീവപര്യന്തം തടവ് ശിക്ഷ വിധിച്ച് കോടതി. ഹില്ലിന്റെ കൈവശമുണ്ടായിരുന്നത് തോക്കാണെന്ന് തെറ്റിദ്ധരിച്ചാണ് വെടിയുതിര്‍ത്തതെന്ന് കോയ് കോടതിയില്‍ വാദിച്ചു.
2020 ഡിസംബറിലാണ് സംഭവം നടന്നത്. ഹില്‍ ഒരു വെള്ളി നിറമുള്ള റിവോള്‍വര്‍ കൈവശം വെച്ചിട്ടുണ്ടെന്ന് കരുതിയെന്നും തന്റെ ജീവന് ഭീഷണിയുണ്ടായതിനാലാണ് വെടിയുതിര്‍ത്തതെന്നും കോയ് ജൂറിയോട് പറഞ്ഞിരുന്നു. എന്നാല്‍, ഹില്‍ പോലീസിന്റെ നിര്‍ദ്ദേശങ്ങള്‍ പാലിച്ചിരുന്നെന്നും കോയിക്ക് ഒരിക്കലും ഭീഷണിയായിരുന്നില്ലെന്നും പ്രോസിക്യൂട്ടര്‍മാര്‍ വാദിച്ചു. ഹോഡ്ജ്കിന്‍ ലിംഫോമയ്ക്ക് ചികിത്സയിലുള്ള കോയ് വിധിക്കെതിരെ അപ്പീല്‍ നല്‍കുമെന്ന് അറിയിച്ചിട്ടുണ്ട്.
സംഭവത്തിന് തൊട്ടുമുമ്പുള്ള പോലീസ് ബോഡി ക്യാമറ ദൃശ്യങ്ങളില്‍, ഹില്‍ തന്റെ ഇടത് കൈയ്യില്‍ ഒരു മൊബൈല്‍ ഫോണ്‍ ഉയര്‍ത്തിപ്പിടിച്ച് ഒരു സുഹൃത്തിന്റെ ഗാരേജില്‍ നിന്ന് പുറത്തേക്ക് വരുന്നതായി കാണാം. വെടിയേറ്റതിന് ശേഷം ഏകദേശം 10 മിനിറ്റോളം ഹില്ലിന് വൈദ്യസഹായം ലഭിച്ചിരുന്നില്ല.
കോയിക്കെതിരെ മുന്‍പും പൗരന്മാരുടെ പരാതികള്‍ നിലനിന്നിരുന്നു. ഈ സംഭവത്തിന് ശേഷം പോലീസ് മേധാവിയെ മേയര്‍ പുറത്താക്കിയിരുന്നു. കൊളംബസ് നഗരം ഹില്ലിന്റെ കുടുംബത്തിന് 10 ദശലക്ഷം ഡോളര്‍ നഷ്ടപരിഹാരം നല്‍കാന്‍ സമ്മതിക്കുകയും, പരിക്കേറ്റവര്‍ക്ക് പോലീസ് ഉടന്‍ വൈദ്യസഹായം നല്‍കണമെന്ന് നിഷ്‌കര്‍ഷിക്കുന്ന ഒരു നിയമം പാസാക്കുകയും ചെയ്തു. അതേസമയം, ഇത് കൊലപാതകമല്ലെന്നും ഹൃദയഭേദകമായ ഒരു തെറ്റാണെന്നും ലോക്കല്‍ ഫ്രറ്റേണല്‍ ഓര്‍ഡര്‍ ഓഫ് പോലീസ് ചാപ്റ്റര്‍ അഭിപ്രായപ്പെട്ടു.