8-സ്പീഡ് ഓട്ടോമാറ്റിക് ഗിയർബോക്സ്; കൂടാതെ പനോരമിക് സൺറൂഫും ഉണ്ട്; വാഹനപ്രേമികളെ ആവേശത്തിലാക്കി പുതിയ 'സ്കോഡ കുഷാഖ്' വമ്പൻ മാറ്റങ്ങളോടെ വിപണിയിൽ

നൂതനമായ നിരവധി മാറ്റങ്ങളോടെ 2026 സ്കോഡ കുഷാഖ് ഫെയ്‌സ്‌ലിഫ്റ്റ് ഇന്ത്യയിൽ അവതരിപ്പിച്ചു. 10.69 ലക്ഷം രൂപ മുതൽ 18.99 ലക്ഷം രൂപ വരെയാണ് എക്‌സ്-ഷോറൂം വിലയിൽ ഈ പുതിയ എസ്‌യുവി ലഭ്യമാവുക. പുതുക്കിയ സ്റ്റൈലിംഗും, 8-സ്പീഡ് ഓട്ടോമാറ്റിക് ഗിയർബോക്സ്, പനോരമിക് സൺറൂഫ്, ഗൂഗിൾ ജെമിനി എഐ പിന്തുണയുള്ള ഇൻഫോടെയ്ൻമെന്റ് സിസ്റ്റം എന്നിവയടക്കം ഒട്ടേറെ പുതിയ ഫീച്ചറുകളാണ് വാഹനത്തിൽ ഒരുക്കിയിരിക്കുന്നത്.

വേരിയന്റുകൾ അനുസരിച്ച്, 1.0 ലിറ്റർ ടിഎസ്‌ഐ മാനുവൽ മോഡലുകളുടെ എക്സ്-ഷോറൂം വില 10.69 ലക്ഷം രൂപയിൽ ആരംഭിച്ച് 16.79 ലക്ഷം രൂപ വരെയും, 1.0 ലിറ്റർ ടിഎസ്‌ഐ ഓട്ടോമാറ്റിക് ട്രിമ്മുകൾക്ക് 12.69 ലക്ഷം മുതൽ 17.89 ലക്ഷം രൂപ വരെയും വരുന്നു. പ്രസ്റ്റീജ്, മോണ്ടെ കാർലോ എന്നീ ടോപ്പ്-എൻഡ് ട്രിമ്മുകളിൽ മാത്രം ലഭ്യമായ 1.5 ലിറ്റർ ടിഎസ്‌ഐ ഡിഎസ്‌ജി എഞ്ചിൻ-ഗിയർബോക്‌സ് കോമ്പിനേഷന് യഥാക്രമം 18.79 ലക്ഷം രൂപയും 18.99 ലക്ഷം രൂപയുമാണ് വില. ഈ വിലകളെല്ലാം എക്‌സ്-ഷോറൂം അടിസ്ഥാനമാക്കിയുള്ളതാണ്.

പുതിയ കുഷാഖ് ഫെയ്‌സ്‌ലിഫ്റ്റിൽ 115 ബിഎച്ച്പി കരുത്തുള്ള 1.0 ലിറ്റർ ടിഎസ്‌ഐ ടർബോ പെട്രോൾ എഞ്ചിൻ, പുതിയ 8-സ്പീഡ് ടോർക്ക് കൺവെർട്ടർ ഓട്ടോമാറ്റിക് ഗിയർബോക്‌സുമായി ഘടിപ്പിച്ചിരിക്കുന്നു. നേരത്തെ ഉണ്ടായിരുന്ന 6-സ്പീഡ് മാനുവൽ യൂണിറ്റിന് പകരമാണ് ഈ പുതിയ ഓട്ടോമാറ്റിക് ട്രാൻസ്മിഷൻ വരുന്നത്. കൂടാതെ, 150 ബിഎച്ച്പി കരുത്തുള്ള 1.5 ലിറ്റർ ടർബോ പെട്രോൾ എഞ്ചിൻ 7-സ്പീഡ് ഡിഎസ്ജി ഓട്ടോമാറ്റിക് ട്രാൻസ്മിഷനോടൊപ്പം ലഭ്യമാണ്.

ഫീച്ചറുകളുടെ കാര്യത്തിൽ, അപ്‌ഡേറ്റ് ചെയ്ത സോഫ്റ്റ്‌വെയറും ഗൂഗിൾ ജെമിനി എഐ പിന്തുണയുമുള്ള 10.1 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, 10.25 ഇഞ്ച് ഡിജിറ്റൽ ഡ്രൈവർ ഡിസ്‌പ്ലേ എന്നിവയും പുതിയതാണ്. പ്രസ്റ്റീജ് ട്രിമ്മിൽ ഡ്യുവൽ-ടോൺ ബ്ലാക്ക് ആൻഡ് ബീജ് ക്യാബിൻ തീം ലഭിക്കുമ്പോൾ, മോണ്ടെ കാർലോ വേരിയന്റിന് ക്രിംസൺ ഷേഡ് ലേഔട്ട് നൽകിയിരിക്കുന്നു.

പനോരമിക് സൺറൂഫ്, ഡ്യുവൽ-കളർ ആംബിയന്റ് ലൈറ്റിംഗ്, മസാജിംഗ് റിയർ സീറ്റുകൾ, ഫ്രണ്ട് പാർക്കിംഗ് സെൻസറുകൾ, 6-വേ വെന്റിലേറ്റഡ് പവർ ഫ്രണ്ട് സീറ്റുകൾ എന്നിവയും എസ്‌യുവിയിലെ ശ്രദ്ധേയമായ മറ്റ് സവിശേഷതകളാണ്. വയർലെസ് ആൻഡ്രോയിഡ് ഓട്ടോ, ആപ്പിൾ കാർപ്ലേ, വയർലെസ് ചാർജിംഗ് പാഡ്, 6-സ്പീക്കർ ഓഡിയോ സിസ്റ്റം എന്നിവ കണക്റ്റിവിറ്റി ഉറപ്പാക്കുന്നു. സുരക്ഷയ്ക്കായി ആറ് എയർബാഗുകൾ, ഹിൽ ഹോൾഡ് അസിസ്റ്റ്, ഇബിഡിയുള്ള എബിഎസ്, ട്രാക്ഷൻ കൺട്രോൾ എന്നിവ സ്റ്റാൻഡേർഡ് ഫീച്ചറുകളാണ്. ചെറി റെഡ്, സ്റ്റീൽ ഗ്രേ, ഷിംല ഗ്രീൻ എന്നീ മൂന്ന് പുതിയ എക്സ്റ്റീരിയർ കളർ ഓപ്ഷനുകളിലും കുഷാഖ് ഇപ്പോൾ ലഭ്യമാണ്.