ഉച്ച ഭക്ഷണം കഴിക്കാനായി വീട്ടിലേക്ക് പോകവേ അപകടം; കെഎസ്ആര്‍ടിസി ബസ് ശരീരത്തിലൂടെ കയറിയിറങ്ങി; നേമത്ത് യുവാവിന് ദാരുണാന്ത്യം
തിരുവനന്തപുരം: കെഎസ്ആര്‍ടിസി ബസിടിച്ച് ബൈക്ക് യാത്രികന് ദാരുണാന്ത്യം. കരമന-കളിയിക്കാവിള പാതയിലാണ് സംഭവം നടന്നത്. വെള്ളായണി കീര്‍ത്തി നഗര്‍ തിരുവോണത്തില്‍ വാടകയ്ക്ക് താമസിക്കുന്ന കരമന കാലടി സ്വദേശി മണികണ്ഠന്‍ (34) ആണ് മരിച്ചത്.
നേമം യുപി സ്‌കൂളിന് സമീപത്ത് ഉച്ചയ്ക്ക് രണ്ടരയോടെയാണ് അപകടം നടന്നത്. തിരുവനന്തപുരത്തേക്ക് ഭാഗത്തേയ്ക്ക് വരികയായിരുന്ന വിഴിഞ്ഞം ഡിപ്പോയിലെ ബസാണ് ഇടിച്ചത്.
നേമത്ത് തണ്ണിമത്തന്‍ വില്‍പ്പന നടത്തുന്ന കടയിലെ ജീവനക്കാരനായ മണികണ്ഠൻ ഉച്ചയ്ക്ക് ഭക്ഷണം കഴിക്കാനായി വീട്ടില്‍ പോകുന്നതിനിടെയാണ് അപകടം. ഇടിയിൽ ബസിനടിയില്‍പ്പെട്ട മണികണ്ഠന്‍റെ ശരീരത്തിലൂടെ ബസ് കയറിയിറങ്ങുകയായിരുന്നു.
രക്ഷാപ്രവർത്തനത്തിനായി നാട്ടുകാർ ഓടി എത്തിയെങ്കിലും തത്ക്ഷണം മരിച്ചിരുന്നു. മൃതദേഹം മെഡിക്കല്‍കോളേജ് ആശുപത്രിയില്‍. സംഭവത്തിൽ നേമം പോലീസ് കേസ് എടുത്തതായി അറിയിച്ചു.