പട്രോളിങ്ങിനിടെ കഞ്ചാവുമായി യുവാക്കൾ പിടിയിൽ; ചോദ്യം ചെയ്യലിൽ ലഭിച്ചത് നിർണായക വിവരം; പിന്നാലെ വാടക വീട്ടിൽ പരിശോധന; വിൽപ്പനയ്ക്കായി സൂക്ഷിച്ച കഞ്ചാവ് പിടിച്ചെടുത്ത് പോലീസ്

കോഴിക്കോട്: പോലീസ് പട്രോളിങ്ങിനിടെ പിടിയിലായ യുവാക്കളുടെ വീട്ടിൽ നിന്നും വിൽപനയ്ക്കും ഉപയോഗത്തിനുമായി സൂക്ഷിച്ച കഞ്ചാവ് പിടിച്ചെടുത്തു. കുന്ദമംഗലം പൊലീസാണ് പരിശോധന നടത്തി കഞ്ചാവ് പിടികൂടിയത്. പൊന്നാനി വെളിയങ്കോട് സ്വദേശി കുന്നനയിൽ വീട്ടിൽ മുഹമ്മദ് അൻഷാദ് (23), ചാത്തമംഗലം മണ്ണും കുഴിയിൽ സവാദ് (21), കട്ടാങ്ങൽ മേലെ വാവാട്ട് വീട്ടിൽ ആസിഫ് (ലച്ചു 21) എന്നിവരെയാണ് പൊലീസ് പിടികൂടിയത്. പൊലീസ് പട്രോളിങ്ങിനിടയിൽ പുള്ളാവൂരിലെ താമരക്കുളത്ത് കഞ്ചാവുമായി മൂന്ന് പേരെ തടഞ്ഞുവെച്ചിട്ടുണ്ടെന്ന വിവരം കുന്ദമംഗലം പൊലീസിന് ലഭിക്കുകയായിരുന്നു. തുടർന്ന് പൊലീസ് സംഘം സ്ഥലത്തെത്തി.

ചോദ്യം ചെയ്യലിൽ കഞ്ചാവ് വിൽപ്പനയുമായി ബന്ധപ്പെട്ട് നിർണായ വിവരം ലഭിച്ചതിനെ തുടർന്ന് പോലീസ് പ്രതികൾ താമസിക്കുന്ന വാടക വീട്ടിൽ പരിശോധന നടത്തി. ഇവിടെ നിന്ന് വിൽപനയ്ക്കായി സൂക്ഷിച്ച 22.7 ഗ്രാം കഞ്ചാവ് കണ്ടെടുക്കുകയായിരുന്നു. എൻഐടി കേന്ദ്രീകരിച്ച് പ്രവർത്തിക്കുന്ന മയക്കുമരുന്ന് വിൽപ്പന സംഘത്തിൽപ്പെട്ട അന്യസംസ്ഥാന തൊഴിലാളിയിൽ നിന്നാണ് കഞ്ചാവ് വാങ്ങിയതെന്നാണ് പൊലീസിന് ലഭിച്ചിരിക്കുന്ന വിവരം. കുന്ദമംഗലം പൊലീസ് സ്റ്റേഷൻ എസ്ഐ ഉമ്മർ, എഎസ്ഐ സജിന, എസ്‍സിപിഒ ജംഷീർ, സിപിഒ ഷമീർ എന്നിവർ ചേർന്നാണ് പ്രതിയെ കസ്റ്റഡിയിൽ എടുത്തത്.