സ്ത്രീകൾ എല്ലാ വേലികളും..തകർത്ത് ഇന്ത്യയുടെ പുരോഗതിക്ക് നിർണായക പങ്ക് വഹിക്കുന്നു; ഇതിലൂടെ അവരുടെ ജീവിത നിലവാരവും മെച്ചപ്പെട്ടു; ഡിജിറ്റൽ പേയ്മെന്റുകളുടെ ഉപയോഗം സമൂഹത്തിൽ വലിയ മാറ്റങ്ങൾ വരുത്തി; കർഷക ശാക്തീകരണത്തിലും സർക്കാർ കൂടുതൽ ശ്രദ്ധിക്കുന്നു; രാജ്യത്തെ അഭിസംബോധന ചെയ്ത് രാഷ്ട്രപതി

ഡൽഹി: 77-ാമത് റിപ്പബ്ലിക് ദിനത്തോടനുബന്ധിച്ച് രാഷ്ട്രപതി ദ്രൗപതി മുർമു രാഷ്ട്രത്തെ അഭിസംബോധന ചെയ്തു. ഇന്ത്യയുടെ ജനാധിപത്യം, ഭരണഘടനാ ആശയങ്ങൾ എന്നിവയ്ക്ക് ഊന്നൽ നൽകിയ രാഷ്ട്രപതി, സമ്പന്നവും സ്വാശ്രയത്വമുള്ളതുമായ ഒരു ഇന്ത്യ കെട്ടിപ്പടുക്കുന്നതിന് പൗരന്മാർ ഒറ്റക്കെട്ടായി പ്രവർത്തിക്കേണ്ടതിന്റെ പ്രാധാന്യം ചൂണ്ടിക്കാട്ടി. രാജ്യത്തിന്റെ പ്രധാന ദേശീയ നേട്ടങ്ങൾ എടുത്തുപറഞ്ഞുകൊണ്ട് സ്വാതന്ത്ര്യസമര സേനാനികൾക്ക് രാഷ്ട്രപതി ആദരാഞ്ജലികൾ അർപ്പിക്കുകയും ചെയ്തു.

രാജ്യത്തിന്റെ ഐക്യവും പ്രതിരോധശേഷിയും വർധിപ്പിക്കാൻ പൗരന്മാരോട് ആഹ്വാനം ചെയ്ത മുർമു, ഇന്ത്യൻ സ്ത്രീകൾ പരമ്പരാഗത ചിന്താഗതികൾ തകർത്ത് രാഷ്ട്രനിർമ്മാണത്തിൽ നിർണായക പങ്ക് വഹിക്കുന്നുണ്ടെന്ന് ഊന്നിപ്പറഞ്ഞു. കൃഷി, ബഹിരാകാശം, കായികം, സായുധ സേന തുടങ്ങിയ വിവിധ മേഖലകളിൽ സ്ത്രീകൾ കൈവരിച്ച നേട്ടങ്ങളെക്കുറിച്ച് അവർ വിശദീകരിച്ചു.

ആഗോള കായിക രംഗത്തെ ഇന്ത്യയുടെ വളർച്ചയ്ക്ക് ഉദാഹരണമായി വനിതാ ക്രിക്കറ്റിലെയും ചെസ്സിലെയും വിജയങ്ങളെ രാഷ്ട്രപതി ഉദ്ധരിച്ചു. കൂടാതെ, സ്വാശ്രയ സംഘങ്ങളുമായി ബന്ധപ്പെട്ട് പ്രവർത്തിക്കുന്ന 10 കോടിയിലധികം സ്ത്രീകൾ വികസന പ്രവർത്തനങ്ങൾക്ക് പുതിയ ദിശാബോധം നൽകുന്നുണ്ടെന്നും അവർ ചൂണ്ടിക്കാട്ടി. തദ്ദേശ സ്വയംഭരണ സ്ഥാപനങ്ങളിൽ ഏകദേശം 46 ശതമാനം സ്ത്രീ പ്രാതിനിധ്യമുണ്ടെന്നും, ഇത് വികസനത്തെ കൂടുതൽ ശക്തിപ്പെടുത്തുമെന്നും രാഷ്ട്രപതി കൂട്ടിച്ചേർത്തു.

സാങ്കേതികവിദ്യയുടെ സഹായത്തോടെയുള്ള ഭരണം ജനങ്ങൾക്ക് സേവനങ്ങൾ എളുപ്പത്തിൽ ലഭ്യമാക്കുന്നതിനും അവരുടെ ജീവിത നിലവാരം മെച്ചപ്പെടുത്തുന്നതിനും സഹായിക്കുന്നതായി മുർമു പറഞ്ഞു. ഇന്ത്യയുടെ ഡിജിറ്റൽ പേയ്‌മെന്റ് സംവിധാനങ്ങളുടെ വ്യാപകമായ ഉപയോഗം സമൂഹത്തിൽ വലിയ മാറ്റങ്ങൾ വരുത്തിയിട്ടുണ്ട്. ലോകമെമ്പാടുമുള്ള ഡിജിറ്റൽ ഇടപാടുകളിൽ പകുതിയിലധികവും ഇപ്പോൾ ഇന്ത്യയിലാണ് നടക്കുന്നതെന്ന് രാഷ്ട്രപതി സൂചിപ്പിച്ചു.

വികസിത ഇന്ത്യയെ കെട്ടിപ്പടുക്കുക എന്നത് ഓരോ പൗരന്റെയും ഉത്തരവാദിത്തമാണെന്നും, മറ്റ് ദേശീയ ലക്ഷ്യങ്ങൾ കൈവരിക്കുന്നതിൽ എല്ലാവരുടെയും സജീവ പങ്കാളിത്തം അനിവാര്യമാണെന്നും രാഷ്ട്രപതി ദ്രൗപതി മുർമു തന്റെ റിപ്പബ്ലിക് ദിന സന്ദേശത്തിൽ ഓർമ്മിപ്പിച്ചു.