'ഇന്ത്യയുടെ നിശബ്ദത, പലസ്തീനോടുള്ള നിസ്സംഗത'; സ്വാതന്ത്ര്യത്തിനും മനുഷ്യന്റെ അന്തസ്സിനും വേണ്ടി നിലകൊണ്ടിരുന്ന രാജ്യത്തിന്റെ ശബ്ദം ഇന്നില്ല; ഇസ്രയേൽ-പലസ്തീൻ സംഘർഷത്തിൽ മോദി സര്‍ക്കാരിന്റെ മൗനത്തെ വിമര്‍ശിച്ച് സോണിയ ഗാന്ധി
ന്യൂഡൽഹി: ഇസ്രയേൽ-പലസ്തീൻ സംഘർഷത്തിൽ നരേന്ദ്ര മോദി സർക്കാർ സ്വീകരിക്കുന്ന നിലപാടിനെതിരെ ശക്തമായ വിമർശനവുമായി കോൺഗ്രസ് നേതാവ് സോണിയ ഗാന്ധി രംഗത്തെത്തി. ഇത് മാനവികതയിൽ നിന്നും ധാർമ്മികതയിൽ നിന്നുമുള്ള പിൻവാങ്ങലാണെന്ന് അവർ കുറ്റപ്പെടുത്തി. 'നിശബ്ദത നിഷ്പക്ഷതയല്ല, മറിച്ച് കുറ്റകൃത്യത്തിൽ പങ്കാളിത്തമാണ്' എന്ന് സോണിയ ഗാന്ധി പറഞ്ഞു.
'ഇന്ത്യയുടെ നിശബ്ദത, പലസ്തീനോടുള്ള നിസ്സംഗത' എന്ന തലക്കെട്ടിൽ 'ദ ഹിന്ദു' ദിനപത്രത്തിൽ എഴുതിയ ലേഖനത്തിലാണ് സോണിയ ഗാന്ധിയുടെ പ്രതികരണം. സ്വാതന്ത്ര്യത്തിനും മനുഷ്യന്റെ അന്തസ്സിനും വേണ്ടി നിലകൊണ്ടിരുന്ന ഇന്ത്യയുടെ ശബ്ദം ഇന്ന് ഈ വിഷയത്തിൽ നിശബ്ദമായിരിക്കുകയാണെന്ന് അവർ ചൂണ്ടിക്കാട്ടി. ഈ വിഷയത്തിൽ ഇന്ത്യ അതിന്റെ ചരിത്രപരമായ നേതൃത്വം വീണ്ടെടുക്കണമെന്നും അവർ ആവശ്യപ്പെട്ടു.
സർക്കാരിന്റെ ഉത്തരവാദിത്തങ്ങൾ വ്യക്തിഗത സൗഹൃദങ്ങളെക്കാൾ ഉയർന്നുനിൽക്കേണ്ടതാണെന്ന് സോണിയ ഗാന്ധി വ്യക്തമാക്കി. ഇന്ത്യയുടെ ഭരണഘടനാ മൂല്യങ്ങളോ തന്ത്രപരമായ താത്പര്യങ്ങളോ അല്ല, മറിച്ച് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവും നരേന്ദ്ര മോദിയും തമ്മിലുള്ള വ്യക്തിപരമായ സൗഹൃദത്തിനാണ് ഊന്നൽ നൽകുന്നതെന്നും അവർ ആരോപിച്ചു. നീതി, മനുഷ്യാവകാശങ്ങൾ, അന്താരാഷ്ട്ര നിയമം എന്നിവയോടുള്ള പ്രതിബദ്ധത സർക്കാർ വീണ്ടും ഉറപ്പിക്കണമെന്നും സോണിയ ആവശ്യപ്പെട്ടു.
ഈ നയതന്ത്ര ശൈലി അംഗീകരിക്കാനാവില്ലെന്നും വിദേശനയം എന്ന് വിളിക്കാനാവില്ലെന്നും അവർ പറഞ്ഞു. 17,000 കുട്ടികൾ ഉൾപ്പെടെ 55,000-ത്തിലധികം പലസ്തീനികൾ ഇസ്രയേൽ ആക്രമണത്തിൽ കൊല്ലപ്പെട്ടത് വംശഹത്യയായി മാത്രമേ കാണാനാകൂ എന്നും, സഹായം പോലും മനഃപൂർവം തടയുകയാണെന്നും അവർ കൂട്ടിച്ചേർത്തു. ലോകം പ്രതികരിക്കുന്നതിലെ കാലതാമസം ഇസ്രയേലിന്റെ ആക്രമണങ്ങളെ സാധൂകരിക്കാൻ മാത്രമേ ഉപകരിക്കൂ എന്ന് സോണിയ ഗാന്ധി അഭിപ്രായപ്പെട്ടു. പലസ്തീനോട് ചരിത്രപരമായ സഹാനുഭൂതി പുലർത്താൻ ഇന്ത്യ കടപ്പെട്ടിരിക്കുന്നു എന്നും അവർ ഓർമ്മിപ്പിച്ചു.