ഖത്തിറിൽ വാഹനാപകടം; മൂന്നു മലയാളികൾ മരിച്ചു; അപകടം പെരുന്നാൾ അവധി ആഘോഷിക്കാൻ പോകുന്നതിനിടെ മരുഭൂമിയിലെ കല്ലിലിടിച്ച് നിയന്ത്രണം വിട്ട്

ദോഹ: ഖത്തറിൽ വാഹനാപകടത്തിൽ മൂന്ന് മലയാളികൾ മരിച്ചു. ഒന്നര വയസ്സുള്ള കുഞ്ഞ് ഉൾപ്പെടെ മൂന്നുപേർ രക്ഷപ്പെട്ടു. ആലപ്പുഴ മാവേലിക്കര സ്വദേശി സജിത്ത് മങ്ങാട്ട് (37), പൊന്നാനി മാറഞ്ചേരി പുറങ്ങുകുണ്ടുകടവ് കളത്തിൽപടിയിൽ താമസിക്കുന്ന റസാഖ് (31), മലപ്പുറം കീഴുപറമ്പ് സ്വദേശി മാരാൻകുളങ്ങര ഇയ്യക്കാട്ടിൽ മഹമൂദിന്റെ മകൻ എം കെ ഷമീം (35) എന്നിവരാണ് മരിച്ചത്.

സജിത്തിന്റെ ഭാര്യയും ഡ്രൈവറായിരുന്ന ശരൺജിത് ശേഖരനും പരിക്കുകളോടെ ഹമദ് മെഡിക്കൽ കോർപ്പറേഷൻ ആശുപത്രിയിൽ ചികിത്സയിലാണ്. സജിത്തിന്റെ ഒന്നര വയസ്സുള്ള കുഞ്ഞ് പരിക്കുകളില്ലാതെ രക്ഷപ്പെട്ടു.

പെരുന്നാൾ അവധി ആഘോഷത്തിനായി ചൊവ്വാഴ്ച ഉച്ച കഴിഞ്ഞ് മുഐതറിൽ നിന്നും രണ്ട് വാഹനങ്ങളിലായാണ് സുഹൃത്തുക്കൾ യാത്ര തിരിച്ചത്. വില്ലയിൽ അടുത്തടുത്ത മുറികളിൽ താമസിക്കുന്നവരായിരുന്നു ഇവർ. സംഘത്തിലെ ഒരു വാഹനം മിസഈദ് സീലൈനിൽ അപകടത്തിൽപ്പെടുകയായിരുന്നു.

ലാൻഡ്ക്രൂസർ വാഹനമാണ് അപകടത്തിൽപ്പെട്ടത്. വാഹനം മരുഭൂമിയിലെ ഓട്ടത്തിനിടയിൽ കല്ലിലിടിച്ച് നിയന്ത്രണം വിടുകയായിരുന്നെന്ന് ദൃക്സാക്ഷികൾ പറഞ്ഞു. മൂന്നുപേരും സംഭവസ്ഥലത്ത് വെച്ച് തന്നെ മരിച്ചു. പരിക്കേറ്റവരെ ഉടൻ എയർ ആംബുലൻസിൽ വക്റയിലെ ഹമദ് മെഡിക്കൽ കോർപ്പറേഷൻ ആശുപത്രിയിലെത്തിച്ചു. ഹമദ് ആശുപത്രിയിൽ സൂക്ഷിച്ചിരിക്കുന്ന മൃതദേഹങ്ങൾ പൊലീസ്, നടപടിക്രമങ്ങൾക്ക് വിധേയമാക്കും.