അലബാമ: ബാത്ത് ടബ്ബിൽ വെള്ളം തുറന്നുവിട്ട അഞ്ച് മാസം പ്രായമുള്ള ആൺ കുഞ്ഞിനെ അതിനകത്ത് വെച്ച് മുറിയിൽ പോയി വീഡിയോ ഗെയിം കളിച്ച പിതാവിനെ പൊലീസ് അറസ്റ്റ് ചെയ്തു.ഒരു മണിക്കൂറോളം വീഡിയോ ഗെയ്മിൽ ശ്രദ്ധ കേന്ദ്രീകരിച്ച് തിരിച്ചെത്തിയ പിതാവ് കുഞ്ഞ് ബാത്ത്ടമ്പിൽ അബോധാവസ്ഥയിൽ കിടക്കുന്നതാണ് കണ്ടത്. ഉടനെ പൊലീസിനെ അറിയിച്ചു.

അവർ കുട്ടിയെ ആശുപത്രിയിൽ എത്തിച്ചുവെങ്കിലും ജീവൻ രക്ഷിക്കാനായില്ല.ക ളിക്കുന്നതിനിടയിൽ കുഞ്ഞിന്റെ കാര്യം പിതാവ് കൊർഡേറിയസ് കോട്ടൻ (23) മറന്നു പോയതാണെന്ന് സെപ്റ്റംബർ 25 ചൊവ്വാഴ്ച ജെഫർസൺ കൗണ്ടി ഷെറിഫ് ഓഫീസ് അറിയിച്ചു.

പൊലീസിന് പിതാവ് ഇതേ വിശദീകരണമാണ് നൽകിയതെന്നും, സംഭവം നടക്കുമ്പോൾ മറ്റൊരു കുട്ടി വീട്ടിലുണ്ടായിരുന്നുവെന്നും മാതാവ് പുറത്തായിരുന്നുവെന്നും പൊലീസ് പറഞ്ഞു.റെക്ലസ് മാൻ സ്ലോട്ടറിന് പിതാവിനെതിരെ കേസ്സെടുത്തു അറസ്റ്റ് ചെയ്തതായി സെർജന്റ് ജേക്ക് സെൽഫ് പറഞ്ഞു.

1 മുതൽ 4 വയസ്സ് വരെയുള്ള കുട്ടികളുടെ മുങ്ങിമരണ തോത് വർദ്ധിച്ചു വരുന്നതായി സി ഡി സി റിപ്പോർട്ട് ചെയ്യുന്നു. കുറച്ചുവെള്ളത്തിലാണെങ്കിൽ പോലും കുട്ടികളെ അശ്രദ്ധമായി വിടരുതെന്ന് അധികൃതർ മുന്നറിയിപ്പ് നൽകിയിട്ടുണ്ട്.