ധോണീ, ആയിരം ദിവസങ്ങളുള്ള ആയിരം വർഷം നിങ്ങൾ ജീവിക്കൂ: ഇന്ത്യൻ ക്യാപ്റ്റനു പിറന്നാൾ ആശംസയേകി സച്ചിൻ ടെൻഡുൽക്കറുടെ ഫേസ്‌ബുക്ക് പോസ്റ്റ്

മുംബൈ: 'ആയിരം ദിവസങ്ങളുള്ള ആയിരം വർഷം നിങ്ങൾ ജീവിക്കൂ. എല്ലാ ആശംസകളും. ഇന്ത്യൻ ഏകദിന-ട്വന്റി 20 ക്രിക്കറ്റ് ടീം ക്യാപ്റ്റൻ എം എസ് ധോണിക്ക് ലഭിച്ച പിറന്നാൾ ആശംസകളിൽ ഫേസ്‌ബുക്കിൽ ഏറ്റവുമധികം ലൈക്ക് ലഭിച്ച ഒരു പോസ്റ്റാണിത്.

മറ്റാരുമല്ല, ക്രിക്കറ്റ് ഇതിഹാസം സച്ചിൻ ടെൻഡുൽക്കറാണ് തന്റെ പ്രിയ ക്യാപ്റ്റന്മാരിൽ ഒരാളായ എം എസ് ധോണിക്ക് പിറന്നാൾ ആശംസകൾ നേർന്നുകൊണ്ട് ഫേസ്‌ബുക്കിൽ പോസ്റ്റിട്ടത്. 2011 ലോകകപ്പ് ഫൈനലിൽ ശ്രീലങ്കയെ തോൽപ്പിച്ച ശേഷം  ധോണിയെ ആശ്ലേഷിക്കുന്ന ചിത്രത്തോടൊപ്പമാണ് സച്ചിൻ പിറന്നാൾ ആശംസകൾ അറിയിച്ചിരിക്കുന്നത്.

മണിക്കൂറുകൾക്കുള്ളിൽ തന്നെ രണ്ടരലക്ഷത്തിലേറെ പേരാണ് ഈ പോസ്റ്റ് ലൈക്കു ചെയ്തത്. രണ്ടായിരത്തി അഞ്ഞൂറിലേറെ പേർ ഈ ആശംസാ വാചകം ഷെയർ ചെയ്യുകയും ചെയ്തു.

എം എസ് ധോണിയുടെ 34-ാം പിറന്നാളായിരുന്നു ഇന്ന്. ആരാധകരും സുഹൃത്തുക്കളും സഹതാരങ്ങളുമുൾപ്പെടെയുള്ളവർ ധോണിക്ക് പിറന്നാൾ ആശംസകൾ അറിയിച്ചിരുന്നു. ഇതിനൊപ്പമാണ് വൈകുന്നേരം ക്രിക്കറ്റ് ഇതിഹാസത്തിന്റെ ആശംസയും ധോണിക്കു ലഭിച്ചത്.