അമ്മയ്‌ക്കൊപ്പം ഉറങ്ങിക്കിടന്ന കുട്ടിയുടെ ദേഹത്ത് മേൽക്കൂരയിൽ നിന്നും പാമ്പ് വീണു; മൂക്കിൽ കടിയേറ്റ് മലമ്പുഴയിൽ നാലരവയസ്സുകാരന് ദാരുണാന്ത്യം; അമ്മ സംഭവം അറിഞ്ഞത് പാമ്പ് അമ്മയുടെ കഴുത്തിലൂടെ ഇഴഞ്ഞപ്പോൾ; മരണപ്പെട്ടത് കാളിപ്പാറ വി.കെ.എൻ. എൽ.പി. സ്‌കൂളിലെ എൽ.കെ.ജി. വിദ്യാർത്ഥി
മലമ്പുഴ: അമ്മയ്‌ത്തൊപ്പം വീട്ടിൽ ഉറങ്ങുന്നതിനിടെ മേൽക്കൂരയിൽനിന്ന് ദേഹത്തേക്ക് വീണ പാമ്പിന്റെ കടിയേറ്റ് നാലരവയസ്സുകാരൻ മരിച്ചു.മലമ്പുഴ അകമലവാരം വലിയകാട് എൻ. രവീന്ദ്രന്റെ മകൻ അദ്വിഷ് കൃഷ്ണയാണ് മരിച്ചത്.കുട്ടിയുടെ മൂക്കിലാണ് പാമ്പുകടിയേറ്റത്. ശംഖുവരയനാണ് കടിച്ചതെന്ന് ബന്ധുക്കൾ പറഞ്ഞു.
ശനിയാഴ്ച പുലർച്ചെ രണ്ടരയോടെയാണ് സംഭവം. അമ്മ ബിബിതയുടെ വാരണി കുനുപ്പുള്ളിയിലെ വീട്ടിൽവച്ചാണ് പാമ്പുകടിയേറ്റത്. വീട്ടിലെ കിടപ്പുമുറിയിൽ നിലത്ത് പായ വിരിച്ച് അമ്മയോടൊപ്പം ഉറങ്ങിയതായിരുന്നു അദ്വിഷെന്ന് ബന്ധുക്കൾ പറഞ്ഞു. ബിബിതയുടെ കഴുത്തിൽക്കൂടി ഇഴഞ്ഞതോടെയാണ് മുറിയിൽ പാമ്പെത്തിയത് അറിഞ്ഞത്.
വൈകാതെ കുട്ടി അസ്വസ്ഥത പ്രകടിപ്പിക്കുകയും തൊണ്ടവേദനയുള്ളതായി പറയുകയും ചെയ്തു. ദേഹത്ത് നീർക്കെട്ട് വരികയും ചെയ്തതോടെ പാമ്പിന്റെ കടിയേറ്റതായി സംശയം തോന്നുകയും ഉടൻ ജില്ലാ ആശുപത്രിയിൽ എത്തിക്കുകയും ചെയ്തു. തുടർന്ന് വിദഗ്ധചികിത്സയ്ക്കായി തൃശ്ശൂർ മെഡിക്കൽ കോളേജ് ആശുപത്രിയിലേക്ക് മാറ്റാൻ ശ്രമിച്ചെങ്കിലും അപ്പോഴേക്കും മരിച്ചു.
കൊട്ടേക്കാട് കാളിപ്പാറ വി.കെ.എൻ. എൽ.പി. സ്‌കൂളിലെ എൽ.കെ.ജി. വിദ്യാർത്ഥിയാണ് അദ്വിഷ്. സഹോദരൻ: അദ്വൈത് കൃഷ്ണ.
