'ആർആർആറി'നെയും 'വലിമൈ'യെയും മറികടന്ന് 'ആറാട്ട്'; ഏറ്റവും അധികം പ്രതീക്ഷയുള്ള ചിത്രങ്ങളുടെ ഐഎംഡിബി പട്ടികയിൽ ഒന്നാമത്; ചിത്രം തിയേറ്ററിലെത്തുന്നത് വെള്ളിയാഴ്ച
തിരുവനന്തപുരം: ഏറ്റവുമധികം പ്രതീക്ഷിക്കപ്പെടുന്ന ഇന്ത്യൻ സിനിമകളുടെയും ഷോകളുടെയും ഐഎംഡിബി ലിസ്റ്റിൽ ഒന്നാം സ്ഥാനത്ത് മലയാള ചിത്രം ആറാട്ട് . പ്രമുഖ ഓൺലൈൻ ഡേറ്റാബേസ് ആയ ഐഎംഡിബിയുടെ റിയൽ ടൈം പോപ്പുലാരിറ്റി അടിസ്ഥാനമാക്കിയുള്ള ലിസ്റ്റ് ആണിത്. പ്രമുഖ തമിഴ്, തെലുങ്ക്, ഹിന്ദി ചിത്രങ്ങളൊക്കെ ലിസ്റ്റിൽ ആറാട്ടിനേക്കാൾ പിന്നിലാണ്.
ഐഎംഡിബിയിലെ പേജ് വ്യൂസിന്റെ അടിസ്ഥാനത്തിലുള്ളതാണ് ലിസ്റ്റ്. ലിസ്റ്റിലുള്ള ആകെ ചിത്രങ്ങളുടെ പേജ് വ്യൂസിൽ 66.6 ശതമാനവും ആറാട്ടിന് ലഭിച്ച പേജ് വ്യൂസ് ആണ്. രണ്ടാം സ്ഥാനത്തുള്ള ഗംഗുഭായി കത്തിയവാടിക്ക് 11.2 ശതമാനവും മൂന്നാം സ്ഥാനത്തുള്ള എ തേസ്‌ഡേയ്ക്ക് 4.1 ശതമാനവും പേജ് വ്യൂസ് ആണ് ഉള്ളത്.
ലിസ്റ്റിൽ മോഹൻലാൽ ചിത്രം പിന്നിലാക്കിയ സിനിമകളുടെ കൂട്ടത്തിൽ അലിയ ഭട്ടിന്റെ ഗംഗുഭായി കത്തിയവാടി, രാജമൗലിയുടെ രാം ചരൺ- ജൂനിയർ എൻടിആർ ചിത്രം ആർആർആർ , അയ്യപ്പനും കോശിയും തെലുങ്ക് റീമേക്ക് ഭീംല നായക്, അജിത്തിന്റെ വലിമൈ , മമ്മൂട്ടിയുടെ ഭീഷ്മ പർവ്വം, പ്രഭാസിന്റെ രാധേ ശ്യാം എന്നിവയൊക്കെയുണ്ട്. ലിസ്റ്റിലെ സ്ഥാനങ്ങൾ ഇങ്ങനെ.
ഐഎംഡിബി മോസ്റ്റ് ആന്റിസിപ്പേറ്റഡ് ഇന്ത്യൻ സിനിമകൾ
1. ആറാട്ട്
2. ഗംഗുഭായി കത്തിയവാടി
3. എ തേസ്‌ഡേ
4. ആർആർആർ
5. ബച്ചൻ പാണ്ഡേ
6. ഭീംല നായക്
7. വലിമൈ
8. ഭീഷ്മ പർവ്വം
9. രാധേ ശ്യാം
10. ആജ മെക്‌സിക്കോ ചലിയേ
നെയ്യാറ്റിൻകര ഗോപൻ എന്നാണ് ആറാട്ടിൽ മോഹൻലാൽ അവതരിപ്പിക്കുന്ന നായക കഥാപാത്രത്തിന്റെ പേര്. നെയ്യാറ്റിൻകര ഗോപന്റെ ആറാട്ട് എന്നാണ് ചിത്രത്തിന്റെ മുഴുവൻ ടൈറ്റിൽ. സ്വദേശമായ നെയ്യാറ്റിൻകരയിൽ നിന്നും ഒരു പ്രത്യേക ലക്ഷ്യത്തോടെ ഗോപൻ പാലക്കാട്ടെ ഒരു ഗ്രാമത്തിൽ എത്തുന്നതും തുടർ സംഭവങ്ങളുമാണ് ചിത്രത്തിന്റെ പ്ലോട്ട്. ബോക്‌സ് ഓഫീസിൽ മികച്ച സക്‌സസ് റേറ്റ് ഉള്ള ഉദയകൃഷ്ണയാണ് ചിത്രത്തിന്റെ രചന. മോഹൻലാൽ നിറഞ്ഞാടി അഭിനയിക്കുന്ന മാസ് മസാല ചിത്രമെന്നാണ് ഉദയകൃഷ്ണ ചിത്രത്തെക്കുറിച്ച് പറഞ്ഞിരിക്കുന്നത്. ആർ ഡി ഇല്യൂമിനേഷൻസും ശക്തിയും (എംപിഎം ഗ്രൂപ്പ്) ചേർന്നാണ് ചിത്രത്തിന്റെ നിർമ്മാണം.
വിജയരാഘവൻ, സായ് കുമാർ, സിദ്ദിഖ്, റിയാസ് ഖാൻ, ജോണി ആന്റണി, നന്ദു, കോട്ടയം രമേശ്, ഇന്ദ്രൻസ്, ശിവജി ഗുരുവായൂർ, കൊച്ചുപ്രേമൻ, പ്രശാന്ത് അലക്‌സാണ്ടർ, അശ്വിൻ, ലുക്മാൻ, അനൂപ് ഡേവിസ്, രവികുമാർ, ഗരുഡ റാം, പ്രഭാകർ, ശ്രദ്ധ ശ്രീനാഥ്, രചന നാരായണൻകുട്ടി, സ്വാസിക, മാളവിക മേനോൻ, നേഹ സക്‌സേന, സീത തുടങ്ങി വലിയ താരനിരയാണ് ചിത്രത്തിൽ അണിനിരന്നിരിക്കുന്നത്.
