ബിവി ശ്രീനിവാസ് എന്ന വ്യക്തി ചെയ്യുന്ന കാരുണ്യ പ്രവർത്തനങ്ങൾ കാണുന്ന ഒരാളാണ് ഞാൻ; അതു കൊണ്ട് ഇത് പാവങ്ങൾക്ക് ഗുണം ചെയ്യും; അതുകൊണ്ടാണ് ഞാൻ ഇത് തന്നു വിടുന്നത് ' ഓക്‌സിടോ മീറ്ററുകൾ ശേഖരിക്കാൻ ചെന്നപ്പോഴുള്ള അനുഭവം പങ്കുവെച്ച് യൂത്ത് കോൺഗ്രസ് നേതാവ് അബിൻ വർക്കി കോടിയാട്ട്
കൊച്ചി: യൂത്ത് കോൺഗ്രസ് ദേശീയ ജനറൽ സെക്രട്ടറി എബ്രഹാം റോയ് മാണിയുടെ നിർദേശപ്രകാരം അഖിലേന്ത്യാ പ്രസിഡന്റ് ബി.വി ശ്രീനിവാസിന് ഡൽഹിയിൽ വിതരണം ചെയ്യുന്നതിനായി ഓക്‌സോ മീറ്ററുകൾ ശേഖരിക്കുന്നതിനായി പിറവം കോലഞ്ചേരിയിലെ ഒരു വ്യാപാരിയെ സമീപിച്ചപ്പോഴും തുടർന്ന് കൊച്ചി എയർ കാർഗോയിലെ സൂപ്പർവൈസറിൽ നിന്നും തനിക്കുണ്ടായ അനുഭവം പങ്കു വെക്കുകയാണ് യൂത്ത് കോൺഗ്രസ് സംസ്ഥാന ജന: സെക്രട്ടറി അബിൻ വർക്കി കോടിയാട്ട്
അബിൻ വർക്കി ഫേസ് ബുക്കിൽ പങ്ക് വെച്ച ലേഖനം
ഇന്നലെ ഉച്ചയ്ക്കാണ് യൂത്ത് കോൺഗ്രസ് ദേശീയ ജനറൽ സെക്രട്ടറി Abraham Roy Mani അടിയന്തരമായി കുറച്ച് ഓക്‌സിടോമീറ്ററുകൾ ഡൽഹിക്ക് വേണം എന്ന് ആവശ്യപ്പെട്ട് കൊണ്ട് വിളിക്കുന്നത്. ഡൽഹിയിൽ തുടരുന്ന ഓക്‌സിജൻ ക്ഷാമവും മറ്റ് ഉപകരണങ്ങളുടെ ക്ഷാമവും മൂലമുള്ള ദുരന്ത കഥകൾ നാം തുടരെ കേട്ട് കൊണ്ടിരിക്കുകയാണ്. പ്രിയപ്പെട്ട അബ്രഹാം റോയ് മാണി തന്ന കൊണ്ടാക്ടുകൾ വച്ച് പരിശോധിച്ചപ്പോൾ എന്റെ സമീപ പ്രദേശമായ കോലഞ്ചേരിയിൽ ഇത് ലഭ്യമാണ്. കടയുടെ ഉടമസ്ഥനുമായി സംസാരിക്കുമ്പോൾ ആദ്യം ഇത് തരാൻ സാധിക്കില്ല എന്ന് സംശയലേശമന്യേ അദ്ദേഹം പറഞ്ഞു. കാരണം ഇത് ഇനി കേരളത്തിൽ ലഭിക്കാൻ ഇടയില്ലാത്ത ഒന്നാണ് , കേരളത്തിൽ ഒരു അടിയന്തര ആവശ്യം വന്നാൽ അദ്ദേഹത്തിന്റെ നിലവിലുള്ള കസ്റ്റമേഴ്‌സിന് കൊടുക്കേണ്ടി വരും എന്നതായിരുന്നു പറഞ്ഞ കാരണം. ഇത് കേട്ട് ഇറങ്ങാൻ നേരം ഞാൻ, യൂത്ത് കോൺഗ്രസ് അഖിലേന്ത്യാ അധ്യക്ഷൻ ശ്രീ ശ്രീനിവാസ് ബി.വി പറഞ്ഞിട്ട് അദ്ദേഹത്തിന് ഡൽഹിയിൽ വിതരണം ചെയ്യാനാണ് ഈ ഓക്‌സിടോമീറ്ററുകൾ എന്ന് പറഞ്ഞപ്പോൾ രാഷ്ട്രീയമായി വലിയ പരിചയങ്ങൾ ഒന്നും ഇല്ലാത്ത അദ്ദേഹം എന്നോട് നിൽക്കാൻ പറഞ്ഞു. 30 എണ്ണം പാക്ക് ചെയ്ത് തന്നു. മാർക്കറ്റ് പ്രൈസിനെക്കാൾ വില കുറച്ച് തന്നു. എന്നിട്ട് എന്നോട് പറഞ്ഞു
' കോവിഡ് തുടങ്ങിയ കാലം മുതൽ ഡൽഹിയിൽ ബി.വി ശ്രീനിവാസ് എന്ന വ്യക്തി ചെയ്യുന്ന കാരുണ്യ പ്രവർത്തനങ്ങൾ കാണുന്ന ഒരാളാണ് ഞാൻ , അദ്ദേഹത്തിന് ആയതുകൊണ്ട് ഇത് ഏതെങ്കിലും പാവങ്ങൾക്ക് ഗുണം ചെയ്യും എന്ന് എനിക്ക് ഉറപ്പാണ്. അതുകൊണ്ടാണ് ഞാൻ ഇത് തന്നു വിടുന്നത് '
ആ പാക്കറ്റ് സുരക്ഷിതമായി കൊച്ചി എയർ കാർഗോയിൽ എത്തിച്ചപ്പോൾ ഡൊമസ്റ്റിക് എയർ കാർഗോയിലെ അവിടത്തെ സൂപ്പർവൈസർ പയ്യൻ എന്നോട് ചോദിക്കുകയാണ് ' ശ്രീനി അണ്ണന് സുഖമാണോ എന്ന് '
എങ്ങനെ അദ്ദേഹത്തിനെ അറിയും എന്ന് ചോദിച്ചപ്പോൾ ആ ചെറുപ്പക്കാരൻ പറയുകയാണ് , അവന്റെ ഡൽഹിയിലെ സുഹൃത്തിന് പ്ലാസ്മ ആവശ്യമായി വന്നപ്പോൾ ശ്രീനിവാസ് ബി.വി യെ വിളിച്ച് പറഞ്ഞ് അദ്ദേഹം ആണ് അത് തയ്യാറാക്കി കൊടുത്തത് എന്ന്..
അതാണ്..ഈ രാജ്യം ദുരന്തങ്ങളെ നേരിട്ട് വിറങ്ങലിച്ചു നിന്നപ്പോൾ ഒക്കെ ഒരു പൊതു പ്രവർത്തകന്റെ കടമ നിറവേറ്റിയ യുവ നേതാവിന്റെ പേരാണ്
ബി.വി ശ്രീനിവാസ്. ദേശീയ മാധ്യമങ്ങൾ പോലും ഒരു ആവശ്യത്തിന് ശ്രീനിവാസ് ബി.വി യെ വിളിക്കുന്നിടത്താണ് ആ വ്യക്തിയുടെയും ഈ സംഘടനയുടെയും പ്രസക്തി.
