തൊടുപുഴ: കോളപ്ര തലയനാട് മഞ്ഞപ്രയിൽ യുവതിക്ക് നേരെ ആസിഡ് ആക്രമണം നടത്തിയ കേസിൽ പ്രതി അറസ്റ്റിൽ. സംഭവത്തിൽ യുവതിയുടെ ഭർത്താവായ ഇല്ലിചാരി പള്ളിക്കത്തടത്തിൽ രാജന്റെ മകൻ രാഹുൽ രാജി(34)നെയാണ് മുട്ടം പൊലീസ് അറസ്റ്റു ചെയ്തത്. ഗുരുതരമായി പൊള്ളലേറ്റ കരിങ്കുന്നം ഇല്ലിചാരി സ്വദേശിനി വാഴമലയിൽ സോനയെ(25) തൊടുപുഴ താലൂക്കാശുപത്രിയിലും തുടർന്ന് കോട്ടയം മെഡിക്കൽ കോളജ് ആശുപത്രിയിലും പ്രവേശിപ്പിച്ചിരുന്നു. സോന അപകടനില തരണം ചെയ്തതായി പൊലീസ് അറിയിച്ചു.

ഇവരുടെ വിവാഹ മോചന കേസ് കുടുംബക്കോടതിയിൽ തുടരുകയാണ്. ഇതിനിടയിലും നിരന്തരം സോനയുമായി വഴക്കിടുമായിരുന്നു രാഹുൽ. വീടുകളിൽ ഹോം നഴ്സായി ജോലിക്ക് നിൽക്കുകയായിരുന്നു സോന. കഴിഞ്ഞ ആഴ്ചയിലും ഇവർ ജോലിക്കു നിന്ന വീട്ടിൽച്ചെന്ന് രാഹുൽ വഴക്കുണ്ടാക്കിയിരുന്നു.തുടർന്ന് തലയനാട് മഞ്ഞപ്രയിലെ ബന്ധു ഷീബയുടെ വീട്ടിൽ മാറിനിൽക്കുകയായിരുന്നു സോന. ഇത്തരം സാഹചര്യങ്ങളിൽ സോന ഇങ്ങനെ ചെയ്യാറുണ്ട്.

ഞായറാഴ്ചയാണ് സോന ഈ വീട്ടിലെത്തിയത്. വിവരമറിഞ്ഞ് ഇന്ന് രാവിലെ ഷീബയുടെ വീട്ടിലെത്തിയ രാഹുൽ വീടിന്റെ മുറ്റത്തുനിൽക്കുകയായിരുന്ന സോനയുമായി തർക്കത്തിലായി.കൂടെ വരണമെന്നായിരുന്നു രാഹുലിന്റെ ആവശ്യം. അത് നിരസിച്ചതോടെ വഴക്കായി. ഷീബയുടെ ഭർതൃപിതാവ് കുട്ടിയും മകളും മാത്രമാണ് അപ്പോൾ അവിടെയുണ്ടായിരുന്നത്. വഴക്ക് മൂർച്ഛിച്ചതിനെ തുടർന്ന് രാഹുലിനെ തടയാൻ ഇവർ ശ്രമിച്ചെങ്കിലും സാധിച്ചില്ല. തുടർന്ന് എളിയിൽ കുപ്പിയിൽ കരുതിയിരുന്ന ആസിഡ് സോനയ്ക്ക് നേരെ ഒഴിക്കുകയായിരുന്നു. .മുഖത്തും നെഞ്ചത്തും കൈകകളിലും പുറത്തും ആസിഡ് വീണ് പൊള്ളലേറ്റു.

കുട്ടിയാണ് അയൽവാസികളെയെല്ലാം വിളിച്ചു കൂട്ടി സോനയെ ആശുപത്രിയിലെത്തിച്ചത്. നാൽപ്പത് ശതമാനത്തോളം പൊള്ളലേറ്റതായി താലൂക്കാശുപത്രിയിലെ ഡോക്ടർമാർ പറഞ്ഞു.പിന്നീട് കൂടുതൽ വിദഗ്ധ ചികിൽസയ്ക്കായാണ് കോട്ടയത്തേയ്ക്ക് കൊണ്ടുപോയത്. ആസിഡാക്രമണത്തിന് ശേഷം അവിടെ നിന്നും ഓടി രക്ഷപ്പെട്ട രാഹുലിനെ പൊലീസ് പതിനൊന്നു മണിയോടെ മുട്ടം ടൗണിലെ ബാറിനു സമീപത്തുനിന്നാണ് പിടികൂടിയത്.

തൊടുപുഴ ഡി.വൈ.എസ.പി. എ ജി. ലാലിന്റെ നേതൃത്വത്തിൽ മുട്ടം എസ്.എച്ച്.ഒ ശിവകുമാർ.വി.,എസ്‌ഐമാരായ സുബൈർ, അനിൽകുമാർ, വർഗീസ് മാണി, എ .എസ്‌ഐമാരായ അബ്ദുൾ ഖാദർ ,മഞ്ജു, ജയേന്ദ്രൻ സീനിയർ സി .പി .ഒ. മാരായ സബീന, ദീപു ബാലൻ, സി .പി .ഒ മാരായ അജിൻസ്, പ്രദീപ്, അനൂപ് ,അലിയാർ എന്നിവരുടെ നേതൃത്വത്തിലുള്ള പൊലീസ് സംഘമാണ് രാഹുലിനെ പിടികൂടിയത്.പ്രതിയെ ബുധനാഴ്ച കോടതിയിൽ ഹാജരാക്കും.

ഇല്ലിചാരി എൻഎപി ജംഗ്ഷനിലെ താമസക്കാരനായ അവിര സണ്ണിയുടെയും കുട്ടിയമ്മയുടെയും മകളാണ് സോന. ഒരു സഹോദരനുമുണ്ട്. പ്രത്യകിച്ച് ജോലിയൊന്നുമില്ലാത്ത രാഹുൽ ഇടയ്ക്ക് പെയിന്റിംഗിനൊക്കെ പോകാറുണ്ട്.

പ്രകാശ് ചന്ദ്രശേഖര്‍

    മറുനാടന്‍ മലയാളി ലേഖകന്‍.