ഹൈദരാബാദ്: തെലുങ്ക് ഹാസ്യതാരം വിജയ് സായ് (38)തൂങ്ങി മരിച്ചു. ഹൈദരാബാദിലുള്ള സ്വവസതിയിൽ ഇന്നലെ രാവിലെയാണ് താരത്തെ മരിച്ച നിലയിൽ കണ്ടെത്തിയത്. മരണ കാരണം വ്യക്തമല്ല. വിജയ് സായിയുടെ പിതാവാണ് മകനെ തൂങ്ങി മരിച്ച നിലയിൽ കണ്ടെത്തിയത്. കിടക്ക വിരി കഴുത്തിൽ കുരുക്കിയാണ് ഇയാൾ തൂങ്ങിമരിച്ചത്. ആത്മഹത്യാ കുറിപ്പ് കണ്ടെത്തിയിട്ടില്ലെന്ന് പൊലീസ് അറിയിച്ചു.

പതിവു പോലെ പ്രഭാതഭക്ഷണം കഴിച്ച ശേഷം മുറിയിൽ കയറി വിജയ് വാതിൽ അടയ്ക്കുകയായിരുന്നെന്ന് ഇയാളുടെ അമ്മ പറയുന്നു. എന്നാൽ ആ സമയത്തൊന്നും മകനെ ദുഃഖിതനായി കാണപ്പെട്ടില്ലെന്നം ഇവർ പറയുന്നു. ഉറങ്ങാൻ പോയതാകാമെന്നാണ് കുടുംബാംഗങ്ങൾ കരുതിയത്. പിന്നീട് വിളിച്ചിട്ട് വാതിൽ തുറക്കാതായപ്പോൾ വാതിൽ തകർത്ത് അകത്ത് കയറിയപ്പോഴാണ് വിജയ് സായിയെ തൂങ്ങി മരിച്ച നിലയിൽ കണ്ടെത്തിയത്.

വിവാഹബന്ധം തകർന്നയിൽ വിജയ് മാനസിക പ്രയാസം അനുഭവിച്ചിരുന്നതായി ജൂബിലി ഹിൽസ് പൊലീസ് അറിയിച്ചു. ഇതാകാം മരണകാരണമെന്നാണ് പ്രാഥമിക നിഗമനം. 1992ൽ പുറത്തിറങ്ങിയ സ്വാതി കിരണം എന്ന ചിത്രത്തിലൂടെ ബാലതാരമായി രംഗത്ത് വന്നയാളാണ് വിജയ് സായ്. 2013ൽ റിലീസ് ചെയ്ത അമൈലു അബൈലു ആണ് ഏറ്റവും ശ്രദ്ധേയമായ ചിത്രം.