തെന്നിന്ത്യൻ സിനിമകളിലും ബോളിവുഡിലും തിളങ്ങിയ നടി മേഘ്‌ന നായിഡുവിന്റെ വീട്ടിൽ മോഷണം. നടിയുടെ ഗോവയിലെ വീട്ടിൽ ആണ് മോഷണം നടന്നത്.മേഘ്‌നയുടെ ഉടമസ്ഥതയിലുള്ള ഗോവയിലെ അപാർട്‌മെന്റിൽ വാടകയ്ക്ക് താമസിച്ചിരുന്ന ദമ്പതികളാണ് നടിയെ പറ്റിച്ചത്. വാടക കൊടുക്കാതെ മുങ്ങിയെന്ന് മാത്രമല്ല അടിവസ്ത്രം അടക്കം വീട്ടിലുള്ള സകലസാമഗ്രികളും അവർ അടിച്ചുമാറ്റിക്കൊണ്ടുപോയതായി നടി ഫേസ്‌ബുക്ക് പോസ്റ്റിലൂടെ പറയുന്നു.

മേഘനയുടെ സഹായിയായ യുവതിയാണ് ഈ അപാർട്‌മെന്റ് നടത്തിയിരുന്നത്. അതിനിടെയാണ് ന്യൂസിലാൻഡിൽ ജോലി ചെയുന്ന ദമ്പതികൾ എന്ന വ്യാജേന രണ്ടുപേർ ഇത് വാടകയ്ക്ക് എടുക്കുന്നത്. വ്യാജ ആധാർ കാർഡും ലൈസൻസും നൽകി വാടകയും തരാതെ ഉള്ളതെല്ലാം അടിച്ചുമാറ്റി അന്ന് തന്നെ അവർ സ്ഥലംവിട്ടു. ചെരുപ്പും ഷൂസും ബാഗും സ്പീക്കറും അടക്കം സ്വന്തം എന്ന് പറയാവുന്ന എല്ലാ സാധനങ്ങളും കൊണ്ട് പോയി എന്നാണ് മേഘ്‌ന കുറിപ്പിൽ പറയുന്നത്. വീടിനുള്ളിൽ ഒന്നും തന്നെ ബാക്കി വെക്കാത്ത രീതിയിൽ അവരുടെ ബാഗിൽ എന്തൊക്കെ കൊണ്ട് പോകാമോ അതെല്ലാം എടുത്തു കടന്നു കളഞ്ഞു എന്നാണ് പറയുന്നത്. എന്തിന് തന്റെ അടിവസ്ത്രവും സോക്‌സും വരെ കൊണ്ടുപോയെന്നാണ് നടി പറയുന്നു.

വീട്ടിലെ വിലപിടിപ്പുള്ള പ്രതിമയും ഫ്രെയിമുകളും ഉടച്ചെന്നും ഫർണിച്ചറുകളും മറ്റും നശിപ്പിച്ചെന്നും നടി വ്യക്തമാക്കി. ഇതുകൂടാതെ സഹായിയായ യുവതിയെ പറ്റിച്ച് 85000 രൂപയും ഇവർ മോഷ്ടിച്ചിട്ടുണ്ട്. യുവതിയുടെ മകളെ ന്യൂസിലാൻഡിന് കൊണ്ടുപോകാമെന്ന് വിശ്വസിപ്പിച്ചാണ് പൈസ കൊണ്ടുപോയത്. ഈ ദമ്പതികൾ ഇതിനു മുമ്പും പലരെയും പറ്റിച്ചു ഇത് പോലെ തട്ടിപ്പു നടത്തിയിട്ടുണ്ടെന്നും നടി പറയുന്നു. ഗോവയിൽ വരുന്നവരും താമസിക്കുന്നവരും ഇവരെ സൂക്ഷിക്കണം എന്നും നടി മേഘ്‌ന കൂടി ചേർത്തു. യുവതിയുടെ മകൾക്കൊപ്പം നിൽക്കുന്ന ചിത്രം പോസ്റ്റ് ചെയ്തായിരുന്നു നടിയുടെ കുറിപ്പ്. മാത്രമല്ല ആ ചിത്രത്തിൽ തട്ടിപ്പ് നടത്തിയ യുവതി അണിഞ്ഞിരിക്കുന്നത് തന്റെ വേഷമാണെന്നും രോഷത്തോടെ നടി പറയുന്നു.

തെന്നിന്ത്യൻ സിനികളിലും ബോളിവുഡ് സിനിമകളിലും ഐറ്റം ഡാൻസുകളിലൂടെ പ്രസിദ്ധി നേടിയ താരം ആണ് മേഘ്ന നായിഡു. ആന്ധ്രക്കാരിയാണ് മേഘ്ന. ബഡാ ദോസ്ത് എന്ന മലയാളം സിനിമയിലും അഭിനയിച്ചിട്ടുണ്ട് മേഘ്ന.