‘ഇതാ നമ്മുടെ മാവേലിക്കര പൊലീസ്... ഇതാവണം നമ്മുടെ പൊലീസ്'; തന്റെ പരാതി ഫലം കണ്ടതിന്റെ സന്തോഷത്തിൽ നടി ശ്രീയ

നടി ശ്രീയയുടെ പരാതി ഫലം കണ്ടു. കടകളുടെ അനധികൃത നിർമ്മാണവുമായി ബന്ധപ്പെട്ട് നടി ശ്രീയ രമേശ് ഫേസ്‌ബുക്കിൽ പങ്കുവച്ച കുറിപ്പ് വൈറലായിരുന്നു. മാവേലിക്കരയിലെ കടകളുടെ അനധികൃത നിർമ്മാണത്തിൽ കുടുങ്ങിപ്പോയ ദിശ സൂചക ബോർഡിന്റെ ചിത്രമായിരുന്നു നടി പങ്കുവച്ചത്. സംഭവം ശ്രദ്ധയിൽപ്പെട്ടതോടെ പൊലീസ് സ്ഥലത്തെത്തി നടപടി സ്വീകരിച്ചു. ‘ഇതാ നമ്മുടെ മാവേലിക്കര പൊലീസ്... ഇതാവണം നമ്മുടെ പൊലീസ്', ദിശാസൂചക ബോർഡിന്റെ പുതിയ ചിത്രങ്ങൾ പങ്കുവച്ച് ശ്രീയ കുറിച്ചു. പൊലീസിന്റെ പെട്ടന്നുള്ള നടപടിയിൽ പ്രശംസനീയമാണെന്നും നടി പറഞ്ഞു.

‘വെറുതെയല്ല ഞങ്ങളുടെ മാവേലിക്കര ഒരിക്കലും നന്നാവാത്തത്', കടകളുടെ അനധികൃത നിർമ്മാണത്തിൽ കുടുങ്ങിപ്പോയ ദിശാ സൂചക ബോർഡിന്റെ ചിത്രം പങ്കുവച്ച് നടി ശ്രീയ രമേശ് സമൂഹമാധ്യമത്തിൽ കുറിച്ച വാക്കുകളാണിത്. മാവേലിക്കര മിച്ചൽ ജങ്ഷന് തെക്കുവശത്തുള്ള റോഡരികിലാണ് ഈ ദിശാസൂചക ബോർഡ് സ്ഥാപിച്ചിരിക്കുന്നത്.

മാന്നാർ, കായംകുളം, ചെങ്ങന്നൂർ എന്നിവടങ്ങളിലേയ്ക്കുള്ള വിവരങ്ങൾ നൽകുന്ന സൂചക ബോർഡ് കടകളുടെ അനധികൃത നിർമ്മാണം കാരണം കാണാൻ വയ്യാത്ത അവസ്ഥയിലായിരുന്നു. എന്നാൽ ശ്രീയയുടെ പരാതി കണ്ട മാവേലിക്കര പൊലീസ് ഉടൻ തന്നെ സ്ഥലത്തെത്തി വേണ്ട നടപടികൾ സ്വീകരിക്കുകയായിരുന്നു.ലൂസിഫർ, എന്നും എപ്പോഴും, ഒപ്പം, ഒടിയൻ എന്നീ സിനിമകളിൽ ചെറിയ വേഷങ്ങളിലൂടെ ശ്രദ്ധേയയാണ് നടി.

നാടകത്തിലും സീരിയലുകളിലൂടെയുമാണ് ശ്രീയ രമേശ് (ശ്രീക്കുട്ടി രമേശ്‌ ) അഭിനയ രം​ഗത്തെത്തുന്നത്. അച്ഛൻ രാമചന്ദൻ പിള്ള, അമ്മ രത്നമ്മ. ആലപ്പുഴ എസ് ഡി കോളേജിൽ നിന്നും ബിരുദം പൂർത്തിയാക്കി. ഭർത്താവ് രമേശുമൊത്ത്‌ ദുബായിൽ താമസം. കുങ്കുമപ്പൂവ്‌ എന്ന സീരിയലിലൂടെയാണ് ശ്രീയ അഭിനയ രംഗത്തേയ്ക്ക് വരുന്നത്. തുടർന്ന് നിരവധി സീരിയലുകളിൽ അഭിനയിച്ചു. ആദ്യ ചലച്ചിത്രം 'എന്നും എപ്പോഴും'. പിന്നീട് വേട്ട, അനീസ്യ, ഒപ്പം, ഡഫേദാർ തുടങ്ങിയ ചിത്രങ്ങളിലും അഭിനയിച്ചു. ചലച്ചിത്ര നടൻ മോഹൻലാലിന്റെ കസിനാണ് ശ്രീയ രമേശ്