ഇവനാണ് ഞങ്ങൾക്കിടയിലെ മൂന്നാമൻ; ഒടുവിൽ സർപ്രൈസ് പൊളിച്ച് ആദിലയും നൂറയും; ഇരുവർക്കും ലഭിച്ച അപ്രതീക്ഷിത സമ്മാനത്തെ പരിചയപ്പെടുത്തി ലെസ്‌ബിയൻ പ്രണയിനികൾ
ചെന്നൈ: തങ്ങൾക്കിടയിലെ മൂന്നാമനെ പരിചയപ്പെടുത്തി ലെസ്‌ബിയൻ പ്രണയിനികളായ ആദിലയും നൂറയും. ഇൻസ്റ്റഗ്രാം ലൈവിലൂടെയാണ് റോഡ്‌വീലർ ഇനത്തിൽ പെട്ട നായ്ക്കുട്ടിയെ ഇരുവരും തങ്ങളുടെ ആരാധകർക്കായി പരിചയപ്പെടുത്തിയിരിക്കുന്നത്.തങ്ങളെ സ്‌നേഹിക്കുന്നവർക്കായി ഒരു സർപ്രൈസ് നൽകുമെന്ന് ഇരുവരും കഴിഞ്ഞ ദിവസം ഇൻസ്റ്റഗ്രാമിലൂടെ പ്രഖ്യാപിച്ചിരുന്നു.
ആദിലയ്ക്കു ലഭിച്ച പിറന്നാൾ സമ്മാനമാണ് നായ്ക്കുട്ടി. ടൈഗർ എന്നാണ് നായ്ക്കുട്ടിക്ക് ഇരുവരും നൽകിയിരിക്കുന്ന പേര്. തങ്ങൾക്ക് ഇഷ്ടമുള്ള ബ്രീഡ് ആയതുകൊണ്ടാണ് റോഡ്‌വീലർ ഇനത്തിൽ പെട്ട നായ്ക്കുട്ടിയെ തെരഞ്ഞെടുത്തതെന്ന് ആദിലയും നൂറയും പറഞ്ഞു.
മൂന്നാമനെ പരിചയപ്പെടുത്തുന്നതിനു മുന്നോടിയായി ആദിലയും നൂറയും ഇൻസ്റ്റഗ്രാം സ്റ്റോറിയിൽ പറഞ്ഞത് ഇങ്ങനെ- 'ഞങ്ങൾക്ക് ഒരു അറിയിപ്പ് നൽകാനുണ്ട്. ഞങ്ങളുടെ കുടുംബത്തിലേക്ക് ഒരു പുതിയ അംഗത്തെ സ്വാഗതം ചെയ്യാൻ ഒരുങ്ങുകയാണ്. അവനെ ഞങ്ങൾ ഉടൻ നിങ്ങൾക്ക് പരിചയപ്പെടുത്താം. ഇനി ത്രികോണ പ്രണയം.'
എട്ട് ദിവസം നീണ്ട നിയമ പോരാട്ടത്തിനൊടുവിലാണ് ആദില നസ്രിനും ഫാത്തിമ നൂറയും ഒന്നിച്ചത്. 2022 മെയ് 31നാണ് ആദിലയ്ക്കും നൂറയ്ക്കും ഒന്നിച്ചു ജീവിക്കാനുള്ള അനുമതി കേരള ഹൈക്കോടതി നൽകുന്നത്. തന്റെപക്കൽ നിന്നും വീട്ടുകാർ കൂട്ടിക്കൊണ്ടുപോയ നൂറയെ വിട്ടുകിട്ടുന്നതിന് ഹേബിയസ് കോർപ്പസ് ഹർജിയുമായി ആദില ഹൈക്കോടതിയെ സമീപിക്കുകയായിരുന്നു.
തങ്ങളുടെ കുടുംബവുമായി ഇപ്പോഴും ബന്ധമൊന്നും ഇല്ലെന്ന് ദമ്പതികൾ ഇൻസ്റ്റഗ്രാം ലൈവിൽ പറഞ്ഞു. ചെന്നൈ നഗരത്തിൽ ഒരേ ഐടി കമ്പനിയിൽ ജോലിചെയ്താണ് ദമ്പതികൾ ഇപ്പോൾ ജീവിതം സന്തോഷപ്രദമായി മുന്നോട്ടു കൊണ്ടുപോകുന്നത്. തങ്ങളുടെ ഓഫീസ് എൽജിബിടിക്യൂ ഫ്രണ്ട്‌ലിയാണെന്ന് ദമ്പതികൾ അടുത്തയിടെ പ്രമുഖ മാധ്യമത്തിന് നൽകിയ അഭിമുഖത്തിൽ പറഞ്ഞിരുന്നു. തങ്ങളുടെ ഐഡന്റിറ്റി പുറത്തായതുകൊണ്ടുതന്നെ പരിഗണന ലഭിക്കാറുണ്ടെന്നും ഇരുവരും പറയുന്നു.
