'എല്ലാവരും മാറണം ഞാൻ ഒഴികെ; പിണറായി സഖാവിന്റെ വീട്ടുകാരും പാർട്ടി സെക്രട്ടറിയുടെ വീട്ടുകാരും ഹാപ്പി'; സിപിഎം മന്ത്രിമാരുടെ പട്ടികയെ പരിഹസിച്ച് കോൺഗ്രസ് നേതാവ് അഡ്വ. വീണ എസ് നായർ

തിരുവനന്തപുരം: രണ്ടാം പിണറായി മന്ത്രിസഭയിൽ കെ കെ ശൈലജയെ ഉൾപ്പെടുത്താത്തതിനെതിരെ പ്രതിഷേധം ഉയരുന്നതിനിടെ സിപിഎം മന്ത്രിമാരുടെ പട്ടികയെ പരിഹസിച്ച് കോൺഗ്രസ് നേതാവ് അഡ്വ. വീണ എസ് നായർ. 'എല്ലാവരും മാറണം ഞാൻ ഒഴികെ' എന്നായിരുന്നു വീണയുടെ ആദ്യ പ്രതികരണം. കഴിഞ്ഞ മന്ത്രിസഭയിൽ ഉണ്ടായിരുന്നതിൽ മുഖ്യമന്ത്രി പിണറായി വിജയൻ മാത്രമാണ് ഇത്തവണയും തുടരുന്നത്. ഇതിനെ പരിഹസിച്ചുകൊണ്ടാണ് വീണ രംഗത്തെത്തിയത്. ഫേസ്‌ബുക്കിലൂടെയാണ് വീണയുടെ പ്രതികരണം.

തൊട്ടടുത്ത പോസ്റ്റിൽ 'പിണറായി സഖാവിന്റെ വീട്ടുകാരും പാർട്ടി സെക്രട്ടറിയുടെ വീട്ടുകാരും ഹാപ്പി' എന്നും വീണ ഫേസ്‌ബുക്കിലൂടെ പ്രതികരിച്ചു. ഡിവൈഎഫ്ഐ അഖിലേന്ത്യ പ്രസിഡന്റ് പി എ മുഹമ്മദ് റിയാസ് രണ്ടാം പിണറായി മന്ത്രിസഭയുടെ ഭാഗമാകുന്നതിനെ പരിഹസിച്ചാണ് വീണയുടെ പ്രതികരണം.

ആരോഗ്യ രംഗത്തെ പ്രവർത്തനത്തിന് അന്തർദേശീയ തലത്തിൽ പോലും ശ്രദ്ധ നേടിയ കെകെ ശൈലജയെ ഒഴിവാക്കിയതിൽ കടുത്ത അതൃപ്തിയാണ് സാമൂഹ്യ മാധ്യമങ്ങളിലൂടെ നിരവധി പേർ പങ്കുവയ്ക്കുന്നത്. 60963 ന്റെ ചരിത്ര ഭൂരിപക്ഷവുമായാണ് മട്ടന്നൂരിൽ നിന്നും ഇത്തവണ കെക ശൈലജ വിജയിച്ചത്.

കെകെ ശൈലജ രണ്ടാം ഘട്ടത്തിൽ സ്ഥാനാർത്ഥിയാവണോയെന്ന കാര്യത്തിൽ പോലും ചർച്ച നടന്നിരുന്നു. ഒടുവിൽ വലിയ പ്രതിഷേധം ഉയർന്നതോടെ മട്ടന്നൂരിൽ മത്സരിപ്പിക്കുകയായിരുന്നു. കെകെ ശൈലജയെ മാറ്റി നിർത്തിയതിൽ സിപിഐഎം ദേശീയ നേതൃത്വത്തിനും അതൃപ്തിയുണ്ടെന്നാണ് റിപ്പോർട്ട്.

സിപിഎം പാർലമെന്ററി പാർട്ടി നേതാവായും മുഖ്യമന്ത്രിയായും പിണറായി വിജയനെ തെരഞ്ഞെടുത്ത സിപിഎം മന്ത്രിമാരായി എംവി ഗോവിന്ദൻ, കെ രാധാകൃഷ്ണൻ, കെഎൻ ബാലഗോപാൽ, പി രാജീവ്, വിഎൻ വാസവൻ, സജി ചെറിയാൻ, വി ശിവൻകുട്ടി, മുഹമ്ദ് റിയാസ്, ഡോ. ആർ ബിന്ദു, വീണാ ജോർജ്, വി അബ്ദുൾ റഹ്‌മാൻ, എന്നിവരെ നിശ്ചയിച്ചു. സ്പീക്കർ സ്ഥാനാർത്ഥിയായി എംബി രാജേഷിനേയും പാർട്ടി വിപ്പായി കെകെ ശൈലജയേയും തെരഞ്ഞെടുത്തു. പാർലമെന്ററി പാർട്ടി സെക്രട്ടറിയായി ടിപി രാമകൃഷ്ണനേും തെരഞ്ഞെടുത്തു.