കൊളംബോ: ശ്രീലങ്കയിൽ ജൂണിൽ നടക്കേണ്ടിയിരുന്ന ഏഷ്യാ കപ്പ് ടി20 ക്രിക്കറ്റ് ടൂർണമെന്റ് കോവിഡ് വ്യാപനത്തിന്റെ പശ്ചാത്തലത്തിൽ മാറ്റിവച്ചതായി റിപ്പോർട്ട്. ശ്രീലങ്കൻ ക്രിക്കറ്റ് ബോർഡ് തലവൻ ആഷ്ലി ഡി സിൽവ ഇക്കാര്യം അറിയിച്ചതായാണ് അന്താരാഷ്ട്ര വാർത്താ ഏജൻസിയായ എഎഫ്‌പി റിപ്പോർട്ട് ചെയ്തത്.

ശ്രീലങ്കയിൽ നിലവിലെ സാഹചര്യത്തിൽ ജൂണിൽ ടൂർണമെന്റ് നടത്താൻ കഴിയില്ല എന്നാണ് ആഷ്ലി ഡി സിൽവയുടെ പ്രതികരണം. അടുത്ത വർഷത്തെ ഏഷ്യാ കപ്പിന് പാക്കിസ്ഥാൻ വേദിയാവേണ്ടതിനാൽ ലങ്കയുടെ ടൂർണമെന്റ് 2023ലേക്ക് മാറ്റിയേക്കും. ഇന്ത്യയിൽ ഒക്ടോബർ-നവംബർ മാസങ്ങളിലായി നടക്കേണ്ട ടി20 ലോകകപ്പിന് ഒരുക്കമായാണ് ഇത്തവണത്തെ ഏഷ്യാ കപ്പിനെ ടീമുകൾ കണ്ടിരുന്നത്.

കഴിഞ്ഞ വർഷം സെപ്റ്റംബറിൽ പാക്കിസ്ഥാനിൽ ടൂർണമെന്റ് നടത്താനായിരുന്നു ആദ്യ തീരുമാനം. എന്നാൽ പിന്നീട് ആതിഥേയത്വം വഹിക്കാനുള്ള അവകാശം ശ്രീലങ്കയ്ക്ക് കൈമാറുകയായിരുന്നു. യുഎഇയിൽ 2018ലാണ് ഏഷ്യാ കപ്പ് അവസാനമായി നടന്നത്. ഏകദിന ഫോർമാറ്റിൽ നടന്ന ടൂർണമെന്റിൽ ദുബായിയിലും അബുദാബിയിലുമായിരുന്നു മത്സരങ്ങൾ. അന്ന് ബംഗ്ലാദേശിനെ മൂന്ന് വിക്കറ്റിന് തോൽപിച്ച് ഇന്ത്യ കപ്പുയർത്തി.

അതേസമയം ഇന്ത്യ വേദിയാകേണ്ട ടി20 ലോകകപ്പും കോവിഡ് പ്രതിസന്ധിയിൽ അനിശ്ചിതത്വത്തിലാണ്. ലോകകപ്പിനെ കുറിച്ച് ചർച്ച ചെയ്യാൻ ബിസിസിഐ പ്രത്യേക പൊതുയോഗം വിളിച്ചുചേർത്തിട്ടുണ്ട്. ജൂൺ ഒന്നിന് നടക്കാനിരിക്കുന്ന ഐസിസി യോഗത്തിന് മുന്നോടിയായാണ് ബിസിസിഐ അടിയന്തരമായി യോഗം ചേരുന്നത്. രാജ്യത്തെ സ്ഥിതിഗതികൾ മെച്ചപ്പെട്ടില്ലെങ്കിൽ ടി20 ലോകകപ്പ് യുഎഇയിലേക്ക് മാറ്റുമെന്ന് ബിസിസിഐ ജനറൽ മാനേജർ ധീരജ് മൽഹോത്ര നേരത്തെ വ്യക്തമാക്കിയിരുന്നു.

 

ഏഷ്യാ കപ്പിന്

സ്പോർട്സ് ഡെസ്ക്

    സ്പോർട്സ് ഡെസ്ക്